Ifyo Mwingacita pa Kumfwikisha Ifyaba mu Baibolo

3. Lekeni Bambi Bamwafwe

Edward John Eyre, uwale-endauka mu ncende shalekanalekana mu kufwailisha ifintu aimine ubulendo bwa kupulinkanya incende ikalamba umushaba abantu iyo beta ati Nullarbor Plain. Ilyo abena Aborijini bamusambilishe ifya kusanga amenshi mu mucanga na ku fimuti fya milemu ifyo beta ati eucalyptus, alikutiike kabili alicitile ifyo bamwebele kabili tafwile ku cilaka. Icalengele ca kuti alyumfwilile ifyo abaishibe bwino ilya ncende bamwebele.

ICI ica kumwenako cilelanga ukuti pa kuti tubombe bwino umulimo uwa-afya, kano umuntu umo uwaishiba bwino bwino uyo mulimo atwafwa. E fyo caba na ku kusambilila Baibolo.

Yesu tale-enekela ukuti abasambi bakwe bali no kumfwikisha ifyalembwa mu Baibolo ukwabula uwa kubafwa. Inshita imo, “abalengele ukuti beshibe bwino bwino umwalola Amalembo.” (Luka 24:45) Yesu alishibe ukuti umuntu nga alebelenga Baibolo alakabila aba kumwafwa pa kuti omfwikishe ifyo Amalembo yasambilisha.

Ni Bani Bengamwafwa?

Yesu apeele abasambi bakwe aba cine umulimo wa kwafwa abantu. Ilyo talaya ku muulu, abebele ukuti: “E ico kabiyeni, kalengeni aba nko shonse ukuba abasambi, . . . mulebasambilisha ukulakonka fyonse ifyo namwebele.” (Mateo 28:19, 20) Umulimo ukalamba uo Abena Kristu babomba wa kusambilisha, uusanshamo no kulondolola ifyo twingakonka amafunde ya mu Baibolo mu mikalile yesu. Abena Kristu ba cine balafwa abantu ukwishiba ifyaba mu Baibolo.

Ilyo papitile fye inshita iinono apo Yesu apeelele abasambi bakwe uyu mulimo, kwalicitike icintu cimo icisuma. Baibolo ilanda pali cilolo umwina Etiopia uwalebelenga ukusesema kumo ukwaba mwi buuku lya kwa Esaya. Abelengele amashiwi yamo ayo afililwe ukumfwa. Baibolo ilanda ukutila amashiwi ayo afililwe ukumfwa umo yalolele yatila: “Asendelwe nge mpaanga ku kwipaiwa, kabili filya umwana wa mpaanga aba tondolo ilyo balemubeya amasako, e fyo na o ekala tondolo. Balimucushishe babikapo no kumufyenga. Nani uukalondolola fyonse ifya nkulo yakwe? Pantu ali no kufwa.”—Imilimo 8:32, 33; Esaya 53:7, 8.

Uyu cilolo aipwishe Filipi, Umwina Kristu uwaishibe bwino Amalembo, ukuti: “Nani uo kasesema alelandapo? Bushe mwine atemwa muntu umbi?” (Imilimo 8:34) Ulya mwina Etiopia uwalefwaisha ukusambilila alefuma ku Yerusalemu mu kupepa, kabili afwile alipepele ukuti umo amwafwe pa kuti omfwikishe ifyo alebelenga. Ukwabula no kutwishika, alefwaisha ukwishiba ifyo alebelenga kabili ali uwaicefya. Na lyo line, alifililwe ukumfwa umwalolele amashiwi alebelenga. E ico aliicefeshe kabili alombele Filipi ukuti amulondolwele umwalolele amashiwi alebelenga. Ifyo Filipi alondolwele fyalengele uyu mwaume ukusekelela nga nshi ica kuti asangwike no Mwina Kristu.—Imilimo 8:35-39.

Inte sha kwa Yehova balikonkanyapo ukubomba umulimo uo Filipi na Bena Kristu ba kubalilapo balebomba. Mu fyalo ukucila pali 235, Inte sha kwa Yehova mu kuitemenwa balafwa abantu ukwishiba ifyo Baibolo isambilisha. Pa kwafwa abantu ukwishiba ifyo Baibolo isambilisha, balasambilila na bo amalyashi ayalekanalekana aya mu Baibolo. Ilyo balesambilila, balanda pa malyashi ayalekanalekana no kumona ifyo Baibolo yalandapo.a—Belengeni pa kabokoshi akaleti “Amasuko Yene Yene ku Mepusho ya mu Baibolo.”

“Balyaswike Amepusho Yandi Yonse”

Ba Steven, ba Valvanera, na ba Jo-Anne, abo tulandilepo mu cipande ca kubalilapo, batendeke ukusambilila Baibolo ne Nte sha kwa Yehova. Ba Steven batile: “Calimpapwishe pantu ilingi line nga twabelenga fye Amalembo nelyo amalyashi mu Baibolo, ninshi ne casuko twacisanga muli Baibolo ine. Ilyo nshilatendeka ukusambilila Baibolo ne Nte sha kwa Yehova, takwali nangu umo uwansambilishe ifya kusanga amasuko. Nalyumfwile bwino sana ukwishiba ukuti ifyaba mu Baibolo fyalilondololwa bwino bwino ica kuti tamufwile no kulakansana pa kulanshanya, mwakaana no kusanga amasuko yene yene.”

Ifi fine e fyo na ba Valvanera na bo basumina. Batile: “Fyonse ifyo nalesambilila kuli baNte fyali ifyalondoloka kabili fyaleumfwika. Ifyo nalesambilila fyali fya cine, te pa mulandu fye wa kuti e fyo ‘Icalici’ lyalesambilisha, lelo mulandu wa kuti fyonse ifyo balelanda balelondolola no mulandu cabela ifyo.” Ba Jo-Anne bashimika ukuti: “Filya bayaswike amepusho yandi yonse ukubomfya Baibolo, canengele ukuba sana na katiina kuli Lesa, uwatupeela Baibolo, pantu nalimwene ukuti alikwata sana amano pa kulenga ukuti mu Cebo cakwe mube amasuko yonse ayo abantu bengepusha.”

Bushe mwalishibako baNte uko mwikalila? Ala kuti cawama nga nshi nga mwabepwishe ifyo bacita pa kusambilila Baibolo! Nga tamwaishibako baNte abali bonse, mukwai kuti mwalemba kalata ukubomfya adresi ili pe bula 4 muli ino ine magazini. Tamwakafilwe ukumfwikisha ifyalembwa mu Cebo ca kwa Lesa nga ca kuti umupashi wa mushilo uwa kwa Lesa wamwafwa, e lyo na imwe nga mwaba no mutima wa kufwaya ukusambilila kabili nga mwasumina no kuti umuntu uwaishiba bwino ukusambilisha Baibolo amwafwe. Kanshi na imwe bene kuti mwaumfwikisha ifyalembwa mu Baibolo!

[Futunoti]

[Akabokoshi ne Cikope pe bula 8]

Amasuko Yene Yene ku Mepusho ya mu Baibolo

Amalyashi yamo ayo Inte sha kwa Yehova balanshanya na bantu nga balesambilila nabo Baibolo ni aya:

• Bushe Lesa afwaya isonde ukuba shani?

• Abafwa baba kwi?

• Bushe tuleikala mu “nshiku sha kulekelesha”?

• Cinshi Lesa asuminishisha ukucula?

• Finshi ningacita pa kuti ulupwa lwandi lube ne nsansa?

[Ifikope pe bula 7]

Pa kumfwikisha ifyaba mu Baibolo . . . mulelomba umupashi wa kwa Lesa, muleba no mutima wa kufwaya ukusambilila, kabili lekeni bambi bamwafwe