Ababelenga Ino Magazini Balepusha Ukuti . . .

Bushe Ing’anda ya Bufumu Cinshi?

▪ Ing’anda ya Bufumu cikuulwa ca kupepelamo ico Inte sha kwa Yehova balonganinamo. Mu calo conse mwaba Amayanda ya Bufumu ayengi ayo Inte sha kwa Yehova babomfya. Cila mulungu, ifilonganino fya Nte sha kwa Yehova ukucila 105,000 balalongana muli aya yene mayanda.

Mu Ng’anda ya Bufumu iili yonse mwaliba umuputule uukalamba umwikala abantu ilyo balesambilila Baibolo. Ilingi line Ing’anda ya Bufumu ilakwata ifipuna apengekala abantu 100 nelyo 300. Mu Mayanda ya Bufumu ayengi mulaba ne cisebele apeminina abaletungulula ukulongana. Limo ilakwata ne kalasi limo nelyo yabili, kuti mwaba ne ofeshi e lyo na laibrari iinono umuba impapulo sha Baibolo e lyo ne mpapulo shimbi isha kufwayamo ifyebo fimo kabili umuntu onse fye uwa mu cilonganino kuti abelengamo.

Lelo mu Ng’anda ya Bufumu tamuba ifipailo nelyo ifimpashanya, ifilubi nangu imisalaba ifisangwa mu macalici ayengi. Mulandu nshi mushibela ifi fyonse? Pantu Inte sha kwa Yehova basumina ukuti ukubomfya ifya musango yu kwalipusana ne funde lya mu Baibolo ilitila “fulumukeniko ku kupepa utulubi.” (1 Abena Korinti 10:14; Yohane 4:24) Mu macalici ayengi na matempele balayemfyamo sana ne fintu fyalekanalekana. Lelo Amayanda ya Bufumu yena bayakuula fye ayalinga, kabili bayabomfya fye ku kupepelamo. Amasambililo ya mu Baibolo ayo basambilila muli ici cikuulwa e yacindama sana te mikuulile iyo.

Mulandu nshi baitila ukuti Ing’anda ya Bufumu? Pa kulongana ukubela pa Ng’anda ya Bufumu, ico basambilisha sana masambililo ya mu Baibolo e lyo ne mbila nsuma iya “bufumu bwa kwa Lesa,” ilyashi lyacindama sana ilyo Yesu alesambilisha. (Luka 4:43) Muli ba 1930 e lyo batendeke ukwita ici cifulo ca kulonganinapo ukuti Ing’anda ya Bufumu. Ili shina lilalondolola bwino ifyo ifi fikuulwa fibomba, e pabela ukupepa kwa cine kabili e cifulo cikalamba apabela ifyakuma “imbila nsuma iya bufumu.” (Mateo 24:14) Kanshi, Ing’anda ya Bufumu taibomfiwa ku kubombelapo imilimo ya mu bwikashi, nelyo amakwebo. Indalama sha kukuulila, isha kuwamisha e lyo ne sha kubomfya kuli fimbi shifuma ku bantu abasangula mu kuitemenwa. Pa kuti abantu basangule, tabapishamo imbale. Lelo mwaliba akabokoshi ako babika pa cifulo cimo pa kuti uuli onse uulefwaya ukusangula indalama kuti apoosamo.

Umulimo Amayanda ya Bufumu yonse yabomba umo wine, lelo yapusana fye imikuulile. Ubukulu ne fyo bakuula filapusana ukulingana ne fya kukuulila ifyaba kuli iyo ncende, imiceele, e lyo ne ndalama ba Nte ba kuli iyo ncende bakwata. Yamo bayakuulila ukubomfya amatafwali, yamo amapulanga e lyo yambi amabwe. Yambi tabakuulilako ifibumba mu mbali, babikako fye insengu e lyo babikapo umutenge wa fyani.

Umuntu fye onse kuti asangwako ku kulongana ukubela pa Ng’anda ya Bufumu. (AbaHebere 10:25) Cila mulungu kulaba ukulongana kwa bantu bonse, ukulanda sana pa lyashi likalamba ilya mu Baibolo ilyo abantu fye bonse batemwa ukumfwako, nampo nga ba mu cilonganino nelyo abesa mu kusangwako fye. Ala kuti cawama nga nshi nga mwasangilwe ku kulongana ukuba pa Ng’anda ya Bufumu iyabela uko mwikala!

[Icikope pe bula 31]

Malawi, Africa

[Ifikope pe bula 31]

England, Great Britain