Sambilileni Icebo ca kwa Lesa

Bushe Kuti Mwapalama Shani Kuli Lesa?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti batemwa nga nshi ukulanshanya na imwe aya masuko.

1. Bushe Lesa alakutika ku mapepo yonse?

Yehova aeba aba mu nko shonse ukulalanda nankwe mwi pepo pa kuti bapalame kuli ena. (Amalumbo 65:2) Lelo takutika ku mapepo yonse. Ku ca kumwenako, ilyo abena Israele baletwalilila ukucita ifyabipa, Lesa alekaana ukukutika ku mapepo yabo. (Esaya 1:15) Lesa takutika na ku mapepo ya mwaume uucusha umukashi wakwe. (1 Petro 3:7) Na lyo line, Lesa alakutika ku mapepo ya babembu abakamamo na menshi nga ca kutila balapila.—Belengeni 2 Imilandu 33:9-13.

2. Bushe tufwile ukupepa shani?

Ukulanda na Lesa mwi pepo lishuko ilikalamba nga nshi kabili lubali lwa kupepa kwesu, e co tufwile ukupepa fye kuli Yehova epela. (Mateo 4:10; 6:9) Apo tuli babembu, tulingile ukupepela mwi shina lya kwa Yesu pantu e o Lesa asala ukuba “inshila” ya kupepelamo. (Yohane 14:6) Yehova tafwaya ukuti tulesungila fye amapepo ku mutwe nelyo ukulapepa amapepo ayo balembela libela. Lelo afwaya tulepepa ukufuma pa nshi ya mutima.—Belengeni Mateo 6:7; Abena Filipi 4:6, 7.

Kabumba wesu alomfwa na mapepo ya mu mutima. (1 Samwele 1:12, 13) Atweba ukuti tulepepa lyonse, pamo nga pa kulaala na pa kubuuka, pa kulya, na lintu twakwata amafya.—Belengeni Amalumbo 55:22; Mateo 15:36.

3. Mulandu nshi Abena Kristu balonganina pamo?

Taca-anguka ukupalama kuli Lesa pantu twikala na bantu abashatetekela Lesa kabili abapumya ukuti ubulayo bwakwe ubwa kuleta umutende pe sonde tabwakafikilishiwe. (2 Timote 3:1, 4; 2 Petro 3:3, 13) Kanshi tulakabila ukulongana pamo na ba bwananyina pa kuti tulekoseleshanya.—Belengeni AbaHebere 10:24, 25.

Kuti mwapalama kuli Lesa nga mwapanga icibusa na bantu abatemwa Lesa. Ukulongana kwa Nte sha kwa Yehova kulalenga icitetekelo cesu ukukosa pantu nga twaya ku kulongana, tulamona ifyo icitetekelo ca banensu cakosa.—Belengeni Abena Roma 1:11, 12.

4. Bushe kuti mwapalama shani kuli Lesa?

Kuti mwapalama kuli Yehova nga muletontonkanya sana pa fyo mwasambilila mu Cebo cakwe. Muletontonkanya pa fyo acita, pa mafunde yakwe, na pa malayo yakwe. Ukulapepa kuli Lesa no kulatontonkanya pa fyo acita kukalenga tuletasha sana pa fyo akwatisha amano na pa fyo atutemwa.—Belengeni Yoshua 1:8; Amalumbo 1:1-3.

Kuti mwapalama fye kuli Lesa nga ca kuti mwamucetekela no kumutetekela. Lelo icitetekelo caba kwati cimenwa icikabila ukucisakamana. E ico, mufwile ukulasakamana icitetekelo cenu lyonse ukupitila mu kulatontonkanya pa fyo mwasambilila mu Cebo ca kwa Lesa.—Belengeni 1 Abena Tesalonika 5:21; AbaHebere 11:1, 6.

5. Bushe ukupalama kuli Lesa kuti kwamwafwa shani?

Yehova alasakamana abamutemwa. Alabacingilila ku fintu ifingonaula icitetekelo cabo ne subilo lyabo ilya kwikala umuyayaya. (Amalumbo 91:1, 2, 7-10) Alatusoka ukutaluka ku fintu ifingonaula ubumi bwesu ne fingalenga twiba ne nsansa. Yehova alatusambilisha inshila ishisuma.—Belengeni Amalumbo 73:27, 28; Yakobo 4:4, 8.

Nga mulefwaya ukwishibilapo na fimbi, belengeni icipandwa 17 mu citabo citila Bushe Cinshi Baibolo Isambilisha icalembwa ne Nte sha kwa Yehova.