Icine Kuti Ca-alula Ubumi Bwenu
NALIMO mwalyumfwapo nelyo balimusambilishapo ubufi bumo pali Lesa ubo tulandilepo muli fino fipande. Na lyo line, kuti mwashimunuka ukuleka ifyo mwasuminamo, maka maka nga ca kutila e fyo mwasumina ukutula ku bwaice.
Kwena, ca cine kuti mwashimunuka ukufileka. Amacalici yamo tayafwaya ukulinganya ifyo yasambilisha ku fyo Baibolo ilanda. Bambi balesha ukuipokolola, batila ifya mu Baibolo fyalyafya ukumfwa, te bonse bengafyumfwa. Lelo, abasambi ba kwa Yesu abengi bali fye bantu yaweyawe, tabasambilile sana, nomba balyumfwile ifyo Yesu alesambilisha.—Imilimo 4:13.
Na imwe nalimo kuti mwashimunuka ukuceeceeta ifyo mwasuminamo ukutontonkanya ukutila nga mwacite fyo kuti camoneka kwati tamwakwata icitetekelo. Lelo bushe kuti cabamo amano ukutontonkanya ukuti Lesa te kuti atemwe nga mwalinganya ifyo mwasuminamo ku fyo Baibolo ilanda pa kuti mwishibe bwino bwino ifyo Lesa afwaya mulecita? Awe nakalya, Icebo cakwe cimukoselesha ukulabebeta Amalembo pa lwenu, citila: “Mushininkishe mwe bene ico Lesa afwaya, icisuma, icapokelelwa kabili icapwililika.”—Abena Roma 12:2.
Ukusambilila icine pali Lesa kwalicindama nga nshi, te kwishiba fye ifintu ifyo mushaishibe kale, lelo kuti kwalenga imikalile yenu ukuwama. (Yohane 8:32) Ba Deanne, abo tulandilepo mu cipande ca kubalilapo, nomba balicetekela sana Icebo ca kwa Lesa. Bashimike ukuti: “Nshaishibe ukutila kuti naumfwa ifyo Amalembo yalanda mpaka ilyo natendeke ukusambilila Baibolo. Nomba nalishiba Yehova, nalishiba ukuti alasakamana kabili Mufyashi wandi uwa ku muulu. Ici calenga ukuti mbe ne nsansa.”
Nalimo kale mwalisambililepo Baibolo lelo mwamwene kwati tapali ifyo mwanonkelemo. Nga e fyo cali, te kwesha ukufuupuka. Nga ca kutila ifyo bamusambilishe pali Lesa fya bufi, ukwesha ukumfwikisha ifyaba mu Baibolo kuti kwaba kwati kwesha ukulungisha mashini ukubomfya ifyela fya kuli mashini imbi iyapusana na mashini iifwile. Nalimo ifyela fimo ifya kuli iyo mashini kuti fyalinga, lelo ifingi kuti fyakaana ne ci kuti calenga mwaumfwa icifukushi ica kuti mwaleka no kulungisha. Pa kuti mulungishe mashini iifwile, mufwile ukubomfya ifyela fya iyo ine mashini.
Bushe kuti mwatemwa ukwishiba icine pali Lesa? Tulemukoselesha ukumona Inte sha kwa Yehova uko kwine mwikala pa kuti mulesambilila nabo Baibolo nelyo kuti mwalembela abalemba ino magazini ukubomfya adresi yalinga iili pe bula 4.
[Amashiwi pe bula 9]
“Mushininkishe mwe bene ico Lesa afwaya, icisuma, icapokelelwa kabili icapwililika.”—ABENA ROMA 12:2