AMEPUSHO YA MU BAIBOLO YA-ASUKWA

Bushe Kaseebanya aishilebako shani?

Lesa te wapangile Kaseebanya. Lelo, apangile malaika uwaishileba Kaseebanya nelyo Satana. Yesu alandile ukuti pa nshita imo Kaseebanya aali ni malaika wa kwa Lesa uwa cishinka kabili talecita ifyabipa.—Belengeni Yohane 8:44.

Cali shani pa kuti malaika abe Kaseebanya?

Malaika uwaishileba Kaseebanya alipondokele Lesa kabili atunkile abantu bakubalilapo babili ukupondokela Lesa. Kanshi kuti twatila mwine aipangile ukuba Satana, icalola mu kuti “Uukanya.”—Belengeni Ukutendeka 3:1-5; Ukusokolola 12:9.

Nga filya fine cali ku fibumbwa fyonse ifya mano, malaika uwaishileba Kaseebanya na o alikwete ubuntungwa bwa kusalapo ukucita icalungama nelyo icabipa, lelo aishilekwata ulunkumbwa lwa kufwaya ukulamupepa. Ulunkumbwa lwa kufwaya ukumucindikisha lwalikulile sana ukucila ifyo alefwaya ukusekesha Lesa.—Belengeni Mateo 4:8, 9; Yakobo 1:13, 14.

Bushe Kaseebanya atwalilila shani ukutunka abantu? Bushe mulingile ukulamutiina? Kuti mwasanga ifyasuko mu Baibolo.

Nga mulefwaya ukwishibilapo na fimbi, belengeni icipandwa 10 muli ici citabo, icalembwa ne Nte sha kwa Yehova