Bushe Utuyofi Tulanga—Ukuti Lesa Munkalwe?
IFYO BAMO BALANDA: “Lesa e uteka icalo kanshi e ulenga ukuti kube utuyofi, e co munkalwe.”
IFYO BAIBOLO ILANDA: “Icalo conse calaala mu maka ya mubifi.” (1 Yohane 5:19) Bushe “umubifi” ni nani? Baibolo itila ni Satana. (Mateo 13:19; Marko 4:15) Tontonkanyeni pali ici: Nga ca kuti Satana e uteka icalo, ninshi e ulenga na bantu ukuba abaitemwa, ukuba abafunushi kabili e ulenga no kuti belatontonkanya pa fyo bacita ukutila, kuti fyabaletelela. Bushe ifi twalandapo tafilelanga fye ukuti e filenga abantu ukonaula isonde? Abasambilila abengi balanda ukuti ukonaula ifyaba mwi sonde kuti kwalenga utuyofi nelyo ukulenga utuyofi ukufulilako nelyo ukulenga abantu ukulacula sana ku tuyofi.
Nomba mulandu nshi Lesa asuminishisha Satana ukulateka icalo? Icalenga ni co abafyashi besu aba kubalilapo balipondokele Lesa, uwali Kateka wabo. Ukutula ilya nshita abantu abengi balapondokela Lesa nga filya abafyashi besu bacitile. Ukupondokela Lesa kwalilenga abantu ukulatekwa na Satana, umulwani wa kwa Lesa. E mulandu wine Yesu aitile Satana ati “kateka wa ici calo.” (Yohane 14:30) Bushe Satana akatwalilila fye ukuteka? Awe, iyo!
Yehovaa tauma umutima, akafumyapo amacushi yonse ayo Satana aleta pa bantu. Na kuba, Lesa alomfwa sana ububi abantu nga balecula. Ku ca kumwenako ilyo abena Israele baculile sana, Baibolo ilanda pali Lesa ukuti: “Lyonse ilyo balecula, na o alecula.” (Esaya 63:9) Nomba line fye, Lesa wa cikuuku akafumyapo Satana. Alisala Umwana wakwe Yesu Kristu, Imfumu iyalungama kabili iya mulinganya ukuteka umuyayaya.
IFYO YESU AKATUCITILA: Nangu ca kuti Satana alifilwa ukulesha utuyofi, Yesu ena akapwisha utuyofi. Inshita imo Yesu alicingilile abasambi bakwe ku cikuuku ca mwela icabipisha. Baibolo ilanda ukuti: ‘Awe . . . alikalipile umwela no kweba bemba ati: “Talala! Ba tondolo!” No mwela walilekele, awe kwatalele na tondolo.’ E lyo abasambi batile: “Nga kanshi uyu nani, uwa kuti no mwela na bemba filamuumfwila?” (Marko 4:37-41) Ifyo Yesu acitile filatulenga ukucetekela ukuti akacingilila abantunse bonse abacumfwila ilyo akalateka.—Daniele 7:13, 14.
[Futunoti]
a Baibolo itila ishina lya kwa Lesa ni Yehova.
[Icikope pe bula 4]
Lesa alipeele Umwana wakwe amaka aya kulesha utuyofi