PALAMENI KULI LESA
Tulamona Imibele ya kwa Lesa mu fyo Apanga
Bushe mwalicetekela ukuti Lesa e ko aba? Nga mwalicetekela, bushe kuti mwalanda icalenga mucetekele ukuti e ko aba? Ukwabula no kutwishika, kwaliba ifintu ifingi ifyo Lesa apanga ifyo tumona ifilanga ukuti Kabumba alikwata amano na maka e lyo no kutemwa. Finshi fingalenga twashininkisha ukuti cine cine Lesa e ko aba? Nga mulefwaya ukwishiba icasuko, belengeni ifyo umutumwa Paulo alembeele Abena Kristu ba mu Roma.
Paulo atile: “Imibele yakwe [Lesa] ukutula fye apo abumbile umuntu, bailukila ku fyo abumba, muli ifi e mo belukila amaka yakwe aya pe pamo na buLesa bwakwe, ica kuti tabakwata umwa kubepesha.” (Abena Roma 1:20) Muli aya mashiwi, Paulo alangile ukuti ifyo Kabumba abumba e filanga ukuti e ko aba. Natubale tumone ifyo Paulo apilibwile ilyo alandile aya mashiwi.
Paulo alembele ukuti “ukutula fye apo [Lesa] abumbiile umuntu,” abantu balamona imibele ya kwa Lesa. E ico, Paulo alelanda ukuti ukutula fye ilyo abantunse babumbilwe, balemona imibele ya kwa Kabumba mu fyo apanga.
Tulamona imibele ya kwa Lesa mu fyo apanga, ifyaba fye mpanga yonse. Ku ca kumwenako, tuleluka ukuti kwaliba Kabumba uwakwata imibele iisuma nga twamona ifintu ifinono ne fikalamba ifyo apanga. Bushe ifyo Lesa apanga bwino ifintu, tafilenga twailuka ukuti alikwata amano? Bushe nga twalolesha intanda nelyo twaumfwa iciunda cisuma ica mabimbi, tafilenga twaishiba ukuti Lesa alikwata amaka? Inga ifya kulya fyalekanalekana ifyo tuipakisha e lyo ne fyo akasuba kamoneka bwino nga kaletula no kuwa, bushe na fyo tafilenga twashininkisha ukuti Lesa alitutemwa?—Amalumbo 104:24; Esaya 40:26.
Bushe bushininkisho nshi umuntu engafwaya ubwa cila pali ubu? Tapaba. Kanshi abashimona ubu bushinkisho e lyo na bakaana ukucetekela ukuti Lesa e ko aba tabakwata “umwa kubepesha.” Umwaume umo uwasoma alangilile muli iyi nshila: Elenganyeni ukuti namutekenya takonkele ifyo balembele pa cipampa apaleti, “Mufwile Ukukonka Umusebo Uwalukiile ku Kuso.” Kapokola amwimika kabili atendeka ukulemba ipepala lya kumulipilishapo. Namutekenya aesha ukukaanako ati tacimona icipampa. Lelo kapokola akaana ukumfwa ifyo alelanda pantu icipampa caciba fye apashafisama kabili namutekenya alamona fye bwino takwata ubwafya bwa menso. Na kuba, namutekenya onse afwile ukulalolekesha no kulakonka ifilembelwe pa fipampa. E fyo caba na ku fyo Lesa apanga, filanga fye apabuuta ukuti e ko aba. Kanshi nga twamona ifyo apanga, tuleluka ukuti Lesa e ko aba. Takwaba umwa kubepesha ati tatumona ubu bushininkisho bwa kuti Lesa e ko aba.
Ukwabula no kutwishika ububumbo bulatweba ifingi pali Kabumba wesu. Na kabili kwaliba ibuuku ililenga twaishiba ifingi pali Lesa, ne li ibuuku ni Baibolo. Nga twabelenga Baibolo, kuti twasanga icasuko ku cipusho cacindama ica kuti: Mulandu nshi Lesa apangile icalo e lyo na bantu abaikalamo? Nga mwaishiba icasuko, kuti camwafwa ukupalama kuli Lesa uo “imibele yakwe bailukila” ku fyo abumba.
Amalembo ya kubelenga mu August
[Amashiwi pe bula 11]
Ifyo Kabumba abumba e filanga ukuti e ko aba