Finshi Tufwile Ukucita pa Kwafwa Abali mu Kukabila?

BA FRANÇOIS ni baeluda kabili bekala mu calo icipiina. Batile: “Pa numa ya kusala ukwaliko mu calo, abantu batendeke ukulwa pantu abalushile muli uku kusala balikeene ukusumina ukuti nababacimfya. Ba Nte abengi balifulumwike no kusha amayanda yabo. Ifya kulya no muti fyalicepele nga nshi kabili fyalikosele sana umutengo. Balisele amabanki kabili bamashini ba kufumishapo indalama tabalebomba.”

Bwangu bwangu bamunyinefwe pa maofeshi ya Nte sha kwa Yehova batendeke ukutwala indalama, ifya kulya, imiti ne fintu fimbi kuli ba Nte abalesungilwa pa Mayanda ya Bufumu. Aba mu tubungwe twalelwishanya balicilike imisebo, lelo apo balishibe ukuti ba Nte tabaibimba mu fikansa fya calo, imyotoka ishalefuma ku musambo baleshisuminisha ukupita.

Ba François batile: “Bushiku bumo ilyo twaleya ku Ng’anda ya Bufumu, abashilika ababeleme batendeke ukulasa motoka twalimo. Lelo ifipolopolo fyalitupushile. Ilyo twamwene umushilika aleisa alebutukila uko twali, ninshi nakwata ne mfuti, twalyalwishe motoka bwangu bwangu no kubwelelamo ku musambo. Twalitashishe Yehova pa fyo twapuswike. Ubushiku bwakonkelepo, bamunyinefwe 130 abali pali ilya Ing’anda ya Bufumu bafulumukile ku ncende shimbi ukwaliko bwino. Bamo baishile ku musambo kabili twalibasakamene mu fya kwa Lesa na mu fyo balekabila ukufikila ilyo uku kulwa kwapwile.”

Ba François batile: “Bamunyinefwe ukufuma mu ncende shalekanalekana balitumine amakalata ayengi ku musambo aya kutasha. Ilyo bamwene ifyo bamunyinabo mu ncende shalekanalekana babafwile, balicetekele sana Yehova.”

Nga ca kutila bamunyinefwe baponenwa no tuyofi, tatubeba fye ukuti ‘mukangabuke no kwikuta.’ (Yako. 2:15, 16) Lelo tulabafwa. E fyo cali na mu nshiku sha batumwa, ilyo baumfwile ukuti kwali no kuba icipowe, “umusambi umo na umo atumine ifya kukumbusuka ku ba bwananyina abaikele mu Yudea ukulingana na po akwatile.”—Imil. 11:28-30.

Fwe babomfi ba kwa Yehova, tulafwaisha ukwafwa abantu abalekabila ubwafwilisho. Lelo abantu balakabila ne fya kwa Lesa. (Mat. 5:3) Pa kubafwa ukwishiba ukuti balakabila ifya kwa Lesa na pa kuti basambilile, Yesu apeele abasambi bakwe umulimo wa kulenga abantu ukuba abasambi. (Mat. 28:19, 20) Pa kuti ifwe umo umo tubombe uyu mulimo, tulabomfya inshita yesu, amaka, ne fyuma fyesu. E lyo lintu tuleafwa abantu nge cilonganino, tubomfya indalama shimo ishisangulwa, nomba imisangulo iingi ibomfiwa sana ku milimo ya Bufumu na ku kusalanganya imbila nsuma. Ilyo tucita ifi, tulanga ukuti twalitemwa Lesa na bantu banensu.—Mat. 22:37-39.

Bonse abasangula indalama ku mulimo wa mwi sonde lyonse uwa Nte sha kwa Yehova balingile ukwishiba ukuti indalama shabo shilabomfiwa bwino bwino. Bushe kuti mwayafwilishako bamunyinenwe abali mu kukabila? Bushe mulafwaya ukutungilila umulimo wa kulenga abantu ukuba abasambi? Nga e fyo cili, ‘mwitana ifisuma ku balefikabila, ilyo muli na maka ya kubapeela.’—Amapi. 3:27.

[Akabokoshi pe bula 9]

IFYO BAMO BASANGULA IMISANGULO YA MULIMO WA MWI SONDE LYONSE

Nga filya cali mu nshita ya mutumwa Paulo, abengi muno nshiku ‘balapaatulako fimo’ nelyo ukupekanishisha libela indalama sha kubika mu tubokoshi twa misangulo utwalembwapo ati, “Umulimo wa mwi Sonde Lyonse.” (1 Kor. 16:2) Cila mweshi, ifilonganino filatuma ishi ndalama ku maofeshi ya Nte sha kwa Yehova aya mu calo cabo. Na kabili, kuti mwatuma imisangulo yenu ku kabungwe akaba mu calo cenu akabomfiwa ne Nte sha kwa Yehova. Nga mulefwaya ukwishiba ishina lya kabungwe akaba mu calo cenu ako Inte sha kwa Yehova shibomfya, ipusheni ku maofeshi ya Nte sha kwa Yehova ayaba mu calo cenu. Adresi ya maofeshi ya Nte sha kwa Yehova kuti mwaisanga pa Intaneti pa www.jw.org. Imisangulo iyo mwingatuma mu kulungatika ni iyi:

UBUPE BWA MU KULUNGATIKA

• Indalama, ifibeekobeeko, nelyo ifipe fimbi ifya mutengo.

• Mufwile ukulemba na kalata iya kulangilila ukuti indalama nelyo ifintu ifyo mutumine, bupe.

UBUPE UBWABA NGO KUSEEKESHA

• Ubupe ubo bengabwesesha uwapeele nga alefwaya ukuti bamubweseshe.

• Mukwai kuti mwaipusha ku maofeshi ayangalila icalo cenu nga mulefwaya ukwishibilapo na fimbi.

UKUPEKANYA UKUPEELA MU KUITEMENWA

Ukulunda pa kupeela indalama ne fipe fimbi ifya mutengo, kwaliba inshila na shimbi isha kupeelelamo ku kwafwilisha umulimo wa Bufumu uwa mwi sonde lyonse. Ishi nshila e ishi shili pe samba. Te mulandu ne nshila mwingasala ukubomfya pa kupeela ubupe, kuti cawama intanshi mwalanshanya na ba pa maofeshi ababombela icalo cenu pa kuti mwishibe inshila shaba mu calo cenu. Apo amafunde ya kukonka na ya misonko yalapusanapusana, calicindama ukwipusha abaishiba bwino ifya mafunde ne fya misonko ilyo tamulasala inshila ya kubomfya pa kupeela ubupe.

Inshuwalansi: Umuntu kuti alembesha akabungwe ako Inte sha kwa Yehova babomfya ukuti e kakapoka indalama sha cipangano ca inshuwalansi nelyo isha penshoni.

Indalama sha ku Banki: Umuntu kuti alemba icipangano ca kuti nga afwa, indalama sha ku banki, ifipepala ifilanga ukuti umuntu alibikako indalama ku banki nelyo indalama sha penshoni, fikapeelwe ku kabungwe akabomfiwa ne Nte sha kwa Yehova ukulingana na mafunde ye banki abikako indalama.

Nsonsela: Bamo abakwata indalama ishingi mu twampani kuti batila nsonsela wabo aleya ku kabungwe akabomfiwa ne Nte sha kwa Yehova nge ndalama sha bupe. E lyo bambi na bo, kuti baumana akapi no kubika pamo indalama shabo no kushitwala ku banki, e lyo batila nsonsela wabo aleya ku kabungwe akabomfiwa ne Nte sha kwa Yehova nangu kuti batila nga bafwa e ko indalama shikaye.

Impanga ne Fikuulwa: Impanga, ifikuulwa ne ng’anda ifyo bengashitisha kuti bapeela ubupe. Uulepeela ubupe kuti alemba fye icipangano na kabungwe akabomfiwa ne Nte sha kwa Yehova ukuti nga afwa, e bakaba abene ba ng’anda.

Ubupe bwa Kulapeelwako Akanono: Umuntu kuti akuushisha indalama mu kabungwe akabomfiwa ne Nte sha kwa Yehova. Ena nangu umuntu umbi uo alefwaya kuti alepokako akandalama kalinga cila mwaka mpaka akafwe.

Ifya Cishale no Kuseekesha: Umuntu kuti alemba no kusuminishanya na kabungwe akabomfiwa ne Nte sha kwa Yehova ukuti nga afwa ifipe fyakwe nelyo indalama fikabe fyabo, nelyo kuti aseekesha ifipe atemwa indalama kuli aka kene kabungwe. Limo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Nge fyo amashiwi ya kuti “ukupekanya ukupeela mu kuitemenwa” yatulanga, uulesangula ukubomfya ishi nshila twalandapo afwile ukupekanishisha kabela. Nga mulefwaya ukupeela mu kuitemenwa, kuti mwalembela ku maofeshi ya Nte sha kwa Yehova no kwipusha nelyo ukubatumina foni ukubomfya inambala ili pe samba.

TREASURY

Watch Tower Bible and Tract Society of Pennsylvania

Box 33459

Lusaka 10101

Foni: 260 211 272062