Yehova Alapaala Bonse Abaipeelesha

KABUMBA wesu alilanga ukuti alicindika abantunse pa kubapeela insambu sha kuisalila ifyo balefwaya. Kabili alapaala bonse abaipeelesha mu kulundulula ukupepa kwa cine, na bonse abalenga ishina lya kwa Lesa ukuba ilya mushilo no kutungilila ubufwayo bwa kwa Lesa. Yehova tafwaya abantu ukumumfwila pa mulandu wa kuti fye baletiina ukukandwa nelyo pa mulandu fye wa kuti e fyo Baibolo yalanda. Lelo alatemwa sana nga ca kuti abantu balemumfwila pa mulandu wa kuti balimutemwa na pa mulandu wa kuti balatasha pa fyo abacitila.

Ku ca kumwenako, ilyo abena Israele bali mu matololo ya Sinai, Yehova abebele ukukuula umwa kupepela. Atile: “Leteleni Yehova umusangulo ukufuma mu bantu benu. Lekeni onse uwaitemenwa alete umusangulo kuli Yehova.” (Ukufu. 35:5) Umwina Israele onse alepela conse ico akwete, kabili umusangalo onse uwa kuitemenwa walebomfiwa ukulingana no kufwaya kwa kwa Lesa. Bushe abantu bacitile shani ilyo babebele ifi?

“Bonse abo umutima waimishe” kabili “bonse abo umutima walengele ukuitemenwa” baliletele umusangulo wakuitemenwa. Abaume na banakashi ‘muikutemenwa’ baletele fyo bakwete ku mulimo wa kwa Yehova, baletele: Ifipini, amasikiyo, inindaminwe, golde, silfere, umukuba, ubushishi bwa bluu, amasako ya mpaanga ayatumpikwa mu fyakashikila, insalu shakashika, insalu ishisuma, amasako ya mbushi, imikupo ya basukusuku, imikupo ya silu, ifimuti fya mushita, amabwe yauma umutengo, amafuta ayafuma ku miti, na mafuta. Kabili “ifyaletelwe fyali ifyalinga ku mulimo onse uwali no kubombwa, kabili fyalicililenapo.”—Ukufu. 35:21-24, 27-29; 36:7.

Icalengele Yehova ukuti atemwe te mituulo iyo abantu baletele, lelo fintu baipeeleshe ku kutungilila ukupepa kwa cine. Kabili balibomfeshe inshita na maka yabo. Baibolo itila: “Abanakashi bonse abaishiba incito bapikwile ku minwe yabo.” Ca cine, “abanakashi bonse abacenjela abo imitima yabo yaimishe, bapyatile amasako ya mbushi.” Kabili Yehova alengele ukuti Besalele “abe na mano, no mucetekanya no kwishiba na pa kuti abe uwacenjela mu kupanga ifyalekanalekana.” Na kuba Yehova alengele ukuti Besalele na Oholiabu beshibe ifya kubomba umulimo abapeele.—Ukufu. 35:25, 26, 30-35.

Ilyo Yehova aebele abena Israele ukuleta imitulo alishibe ukuti “bonse abaitemenwe” baletungilila ukupepa kwa cine. Bonse abaipeeleshe, Yehova alibatungulwile kabili alengele ukuti babe ne nsansa sana. Ifi Yehova apaalile ababomfi bakwe abaipeeleshe, filangilila ukuti te kuti afilwe ukupeela ababomfi bakwe ifya kubomfya nelyo ukufilwa ukubasambilisha ifya kubomba umulimo wakwe. (Amalu. 34:9) Nga mwaitemenwa ukubombela Yehova, akamupaala icine cine.

IFYO BAMO BASANGULA IMISANGULO YA MULIMO WA MWI SONDE LYONSE

Nga filya cali mu nshita ya mutumwa Paulo, abengi muno nshiku ‘balapaatulako fimo’ nelyo ukupekanishisha libela indalama sha kubika mu tubokoshi twa misangulo utwalembwapo ukuti, “Umulimo wa mwi Sonde Lyonse.” (1 Kor. 16:2) Cila mweshi, ifilonganino filatuma iyi misangulo kwi ofeshi lya Nte sha kwa Yehova ilya mu calo cabo. Na kabili, kuti mwatuma imisangulo yenu kwi ofeshi lya Nte sha kwa Yehova ilyaba mu calo cenu. Adresi ye ofeshi lya Nte sha kwa Yehova kuti mwaisanga pa Intaneti pa www.jw.org. Imisangulo iyo mwingatuma mu kulungatika ni iyi:

UBUPE

Kuti mwatuma imisangulo ya ndalama ukubomfya banki nelyo amakardi ya ku banki. Pa kutuma imisangulo ku maofeshi yamo aya Nte sha kwa Yehova kuti mwabomfya Webu saiti ya jw.org nelyo Webu saiti imbi iyo babomfya ukutuminapo imisangulo.
Indalama nelyo ifintu fimbi. Mufwile ukulemba na kalata iya kulangilila ukuti indalama nelyo ifintu fimbi ifyo musangwile, bupe.

INDALAMA ISHO BENGAMUBWESESHA

Misangulo ya ndalama iyo bengabwesha nga ca kuti uwapeele alefwaya ukuti bamubweseshe.
Mufwile ukulemba na kalata iya kulangilila ukuti indalama isho mutumine musangulo uwa kuseekesha fye.

UBUPE BUMBI

Ukulunda pa kupeela indalama ne fintu fimbi, kwaliba inshila na shimbi isha kupeelelamo ku kwafwilisha umulimo wa Bufumu uwa mwi sonde lyonse. Ishi nshila, shili pe samba. Inshila yonse iyo mwingasala pa kupeela ubupe, kuti cawama mwabala mwalanshanya naba pe ofeshi lya mu calo cenu pa kuti mwishibe inshila sha kupeelelamo isho babomfya mu calo cenu. Apo amafunde ya kukonka na ya misonko yalapusanapusana, cisuma ukwipusha abaishiba bwino amafunde ne fya misonko ilyo tamulasala inshila ya kubomfya pa kupeela ubupe.

Inshuwalansi: Umuntu kuti alembesha ukuti iofeshi lya Nte sha kwa Yehova elikapoka indalama sha cipangano ca inshuwalansi nelyo isha penshoni.

Indalama sha ku Banki: Umuntu kuti alemba icipangano ca kuti nga afwa, indalama sha ku banki, ifipepala ifilanga ukuti umuntu alibikako indalama ku banki nelyo indalama sha penshoni, fikapeelwe kwi ofeshi lya Nte sha kwa Yehova ukulingana na mafunde ye banki ilyo abikako indalama.

Nsonsela: Bamo abakwata indalama ishingi mu twampani kuti batila nsonsela yabo ileba bupe kwi ofeshi lya Nte sha kwa Yehova.

Impanga ne Fikuulwa: Impanga, ifikuulwa ne ng’anda ifyo bengashitisha kuti bapeela ubupe. Uulepeela kuti alemba fye icipangano ne ofeshi lya Nte sha kwa Yehova ukuti nga afwa, e bakaba abene ba ng’anda.

Ubupe bwa Kulapeelwako Akanono: Umuntu kuti apeela indalama iofeshi lya Nte sha kwa Yehova. E lyo ena nangu umuntu umbi uo alefwaya kuti alepokako akandalama kalinga cila mwaka mpaka akafwe.

Ifya Cishale no Kuseekesha: Umuntu kuti alemba no kusuminishanya ne ofeshi lya Nte sha kwa Yehova, ukuti nga afwa ifipe fyakwe nelyo indalama fikabe fyabo, nangu kuti alumbula fye mu kulungatika ukuti Watch Tower Society eyo bakapeela ifipe nelyo indalama nga ca kuti afwa. Ukubomfya iyi inshila nalimo kuti kwalenga ukuti kwiba ukulipila imisonko.

Nge fyo amashiwi ya kuti “ukupeela mu kuitemenwa” yatulanga, uulesangula ukubomfya ishi nshila twalandapo afwile ukupekanishisha kabeela. Pa kwafwa abalefwaya ukutungilila umulimo wa mwi sonde lyonse uwa Nte sha kwa Yehova ukubomfya imisangulo ya kupeela mu kuitemenwa, broshuwa iileti “Charitable Planning to Benefit Kingdom Service Worldwide” naipekanishiwa mu lulimi lwa ciNgeleshi no lwa ciSpanish. Iyi broshuwa naikwata ifyebo pa nshila shalekanalekana isho twingapeelelamo ifya bupe pali nomba nelyo inshita imbi, nge fya cishale. Ifyebo ifili muli iyi broshuwa nalimo te kuti fibombe sana kuli imwe pa mulandu wa misonko nelyo amafunde yambi ayaba mu calo mwikala. Kanshi, nga mwabelenga iyi broshuwa, mufwile ukwipusha abaishiba amafunde pa misonko pa kuti bamwebako ifya kucita. Abengi ababomfya ishi nshila sha kupeela mu kuitemenwa, balafwilisha umulimo wesu uwa mwi sonde lyonse kabili imisangulo yabo ilabomfiwa ku kwafwa bamunyinefwe abaponenwa na masanso kabili ukupeela imisangulo ukubomfya iyi inshila kulalenga abalepeela ukukanalipila indalama ishingi ku misonko. Iyi broshuwa nga kuti yasangwa mu calo mwikala, kuti mwapokako kope imo kuli kalemba mu cilonganino cenu.

Nga mulefwaya ukwishibilapo na fimbi, kuti mwaipusha iofeshi lya musambo ilyaba mu calo cenu.