AMASUKO KU MEPUSHO YA MU BAIBOLO

Cinshi Kristu akabwelela?

Ilyo Yesu Kristu ashilaya ku muulu mu 33 C.E., alandile ukuti akabwela. Aipashenye ku mwaume umukankaala uwaile ku calo cimbi pa nshita ntali kabili uwabwelele ninshi na bamupeela ubufumu. Ico Yesu akabwelela pano calo, kwisa mu kuteka abantu pa kuti bakaleikala bwino.—Belengeni Luka 19:11, 12.

Bushe Kristu akabwela no mubili wa musango nshi? Abuushiwe no mubili wa mupashi. (1 Petro 3:18) Lyena aile ku muulu no kwikala ku kwa kulyo kwa kwa Lesa. (Amalumbo 110:1) Mu kupita kwa nshita, Yesu balimupalamike ku “Uwa Nshiku ne Nshiku,” Yehova Lesa, uwamupeele amaka ya kuteka abantunse. Kanshi Yesu takabwele no mubili wa buntunse, akabwela mu mubili wa mupashi kabili akaba Imfumu.—Belengeni Daniele 7:13, 14.

Finshi Yesu akacita ilyo akabwela?

Ilyo Yesu akesa mu mupashi na bamalaika, akapingula abantunse. Apo akaba Imfumu, akonaula ababifi, lelo akapeela umweo wa muyayaya ku bamumfwila.—Belengeni Mateo 25:31-33, 46.

Ilyo Yesu akalateka, akalenga icalo ukuba paradaise. Akabuusha abafwa pa kuti bakaleikala umuyayaya mu Paradaise pano pene pa calo. —Belengeni Luka 23:42, 43.

Nga mulefwaya ukwishibilapo na fimbi, belengeni pa mabula 73 ukufika ku 85 aya ici citabo, Bushe Cinshi Baibolo Isambilisha? icalembwa ne Nte sha kwa Yehova

Kuti mwakopolola ici icitabo pa Intaneti pa www.jw.org

[Icikope pe bula 16]

Yesu akateka bwino abantunse