AMASUKO KU MEPUSHO YA MU BAIBOLO
Bushe imipepele yonse ilacindika Lesa?
Ilyo mulekutika ku malyashi ayacitika mwi sonde, mufwile mulamona ukuti ifilonganino fya mapepo balafibomfya pa kucita ifyabipa. Kanshi te mipepele yonse iyafuma kuli Lesa wa cine. (Mateo 7:15) Abantu abengi nga nshi balibalufya.—Belengeni 1 Yohane 5:19.
Na lyo line, Lesa alamona abantu abafumacumi abatemwa icalungama. (Yohane 4:23) Lesa aleta abantu ba musango yu pa kuti basambilile icine icaba mu Cebo cakwe, Baibolo.—Belengeni 1 Timote 2:3-5.
Bushe kuti mwaishiba shani ukupepa kwa cine?
Yehova Lesa alelenga abantu abali mu mipepele iyalekanalekana ukuba abaikatana ilyo alebasambilisha icine no kubasambilisha ukuba abatemwana. (Mika 4:2, 3) Kanshi kuti mwaishiba ukuti uku kupepa kwa cine nga mwamona ifyo ababamo batemwana no kwikatana.—Belengeni Yohane 13:35.
Yehova Lesa aleikatanya abantu aba misango yonse mu kupepa kwa cine.—Amalumbo 133:1.
Bakapepa ba cine balicetekela Baibolo kabili balakonka amafunde yabamo muli fyonse ifyo bacita. (2 Timote 3:16) Balacindika ishina lya kwa Lesa. (Amalumbo 83:18) Kabili balabila pa Bufumu bwa kwa Lesa ukuti e bukapwisha fye amafya ya bantu. (Daniele 2:44) Balapashanya Yesu ilyo baleka ‘ulubuuto lwabo ukubalika,’ e kutila ukucita ifisuma ku bantu bambi. (Mateo 5:16) Kanshi Abena Kristu ba cine kuti mwabeshibila na ku mulimo babomba uwa kutandalila abena mupalamano no kubebako pa mbila nsuma ya Bufumu bwa kwa Lesa.—Belengeni Mateo 24:14; Imilimo 5:42; 20:20.