Mulandu Nshi Tulingile Ukubikila Amano ku Bufumu bwa kwa Lesa?

Abantu abengi nga nshi pano calo basumina ukuti Ubufumu bwa kwa Lesa e bukawamya fye ifintu pe sonde. Bakonka ifyo Yesu alesambilisha, uwaebele abasambi bakwe ukulapepa ati: “Ubufumu bwenu bwise. Ukufwaya kwenu kucitwe pano isonde nga mu muulu.”—Mateo 6:10.

Ica kupapusha ca kuti, nangula abantu abengi balafwaisha ukusambilila pa Bufumu bwa kwa Lesa, imipepele iingi tayabika amano ku kusambilisha pa Bufumu. Kalemba we lyashi lya kale H. G. Wells alembele ukuti Yesu “alibikile sana amano . . . ku kusambilisha pa Bufumu bwa ku muulu” lelo “imipepele iingi iya batila Bena Kristu . . . tayabika amano ku kusambilisha pa Bufumu.”

Ukupusanako ne iyi mipepele, Inte sha kwa Yehova bena balabila sana pa Bufumu bwa kwa Lesa. Natulangilile: Magazini yesu iyi mulebelenga, baisabankanya mu ndimi 220. Lyonse nga yafuma, bapulinta amakope mupepi na 46 milioni, kabili e magazini iisabankanishiwa sana mu calo conse. Nomba cinshi iyi magazini ilandapo sana? Umutwe wa iyi magazini utila: Ulupungu lwa kwa Kalinda Ulusabankanya Ubufumu bwa kwa Yehova.a

Mulandu nshi Inte sha kwa Yehova babikila sana mano ku kusabankanya nelyo ukubila pa Bufumu bwa kwa Lesa? Pantu, twasumina ukuti Ubufumu bwa kwa Lesa e bo Baibolo, icitabo icacindamisha mu calo conse, ilandapo. Na kabili, twalishininkisha ukuti Ubufumu bwa kwa Lesa e bukapwisha fye amafya ayo abantu balepitamo pali lelo.

Apo Inte sha kwa Yehova balesha na maka ukukonka filya fine Yesu alecita, balibika sana amano ku Bufumu bwa kwa Lesa. Ilyo Yesu ali pano calo, abikile sana amano ku Bufumu bwa kwa Lesa kabili e bo aleshimikilapo. (Luka 4:43) Mulandu nshi Ubufumu bwacindamine sana kuli Yesu? Bushe kuti mwanonkelamo shani? Tulemukoselesha ukuti mumone ifyo Baibolo ya-asuka aya amepusho mu fipande fikonkelepo.