ICIPANDE ICIKALAMBA
Bushe Inte sha kwa Yehova ni Bani?
“Naishibene na ba Mike akale sana. Ba Mike ni Nte ya kwa Yehova, lelo uko bapepa kulampapusha. Ici calengele nalayipusha nati, Bushe Yehova wine nani? Cinshi ba Nte bashisefeshako amaholide? Bushe ba Mike balepepa kwi calici ilishaishibikwa bwino?”—Ba Becky abekala ku California, mu America.
“Ilyo abena mupalamano batendeke ukusambilila Baibolo ne Nte sha kwa Yehova, naletontonkanya ati: ‘Bushe ili line ishina ilya kuti Inte sha kwa Yehova lyalola mwi? Nshaumfwapo icalici ilyakwata ishina lya ifi.’”—Ba Zenon, abekala ku Ontario, mu Canada.
“Twalemona kwati icalengele ba Nte baleisa ni co balishibe ukutila tatwaleya ku calici, kanshi balefwaya ukutusenda ku calici ku mwabo. Twaletontonkanya no kuti apo tatwatemenwe ifyo aba mu mipepele imbi balesambilisha, ninshi te kuti tutemwe ne mipepele iishaishibikwa bwino pamo nga Inte sha kwa Yehova.”—Ba Kent, abekala ku Washington, mu America.
“Nshaishibe ifyo ba Nte basumina kabili nshabeshibe bwino.”—Ba Cecilie, abekala ku Esbjerg, mu Denmark.
Nalimo mwalimonapo ba Nte ninshi baleshimikila pa mayanda ya bantu nelyo mu fifulo umusangwa sana abantu, balepeela abantu impapulo ishilanda pali Baibolo nelyo balesambilisha abantu Baibolo. Nalimo na ino ine magazini mulebelenga e bamupeele. Na lyo line, nalimo mucili mulayipusha amuti, bushe Inte sha kwa Yehova ni bani? Mufwile na imwe mwalitontonkanyapo nga aba tulandilepo.
Nga mwalitontonkanyapo pali aya amepusho, ni kwi mwingasanga amasuko? Bushe kuti mwaishiba shani ifyo Inte sha kwa Yehova basumina, uko bafumya indalama babomfya, e lyo ne cilenga baleshimikila pa mayanda yenu na mu fifulo umusangwa sana abantu?
Ba Cecilie abo tulandilepo kale batile: “Nalibelengele ifintu ifingi pa Intaneti ifyalelanda pa Nte sha kwa Yehova. Nalyumfwile abantu balelanda ifintu ifingi ifyabipa pali ba Nte. Ici calengele impate sana ba Nte.” Lelo, ilyo papitile inshita, ba Cecilie abene balilanshenye na ba Nte kabili ba Nte balyaswike amepusho yonse ayo bakwete.
Bushe kuti mwatemwa ukwishiba amasuko ya cine ku mepusho mwakwata pa Nte sha kwa Yehova? Tulemukoselesha ukubelenga ino magazini pantu ba Nte abene, e bailemba. (Amapinda 14:15) Ino magazini yalamwafwa ukwishiba bwino ba Nte, ukwishiba bwino ifyo basumina e lyo ne milimo babomba.