IFYALEMBELWE KALE IFITWAFWA NA MUNO NSHIKU
Mwilasakamikwa
ILEMBO ILINGAMWAFWA: “Mwilasakamikilwa imyeo yenu.”—Mateo 6:25.
Bushe aya amashiwi yalola mwi? Yesu alandile aya amashiwi mu Lyashi lya pa Lupili. Dikishonari imo iilanda pa fya mu Baibolo yalondolola ishiwi lya mu ciGriki ilyo bapilibula ukuti ‘ukusakamikwa,’ ukutila lilanda pa fyo “umuntu acita nga ca kuti mupiina, ali ne nsala, nelyo akwata amafya yambi ayo fwe bantu tukwata cila bushiku.” Ukutontonkanya pa fya ku ntanshi ilingi line e kulenga tulesakamikwa. Tacabipa ukusakamikwa pa fyo tukabila e lyo na pa fyo imikalile ya balupwa lwesu ne fibusa ikaba ku ntanshi. (Abena Filipi 2:20) Na lyo line, ilyo Yesu atile ‘mwilasakamikwa,’ aleeba abasambi bakwe ukuti tabalingile ukulasakamikwa ukucila mu cipimo pa fya ku ntanshi ica kuti balafilwa no kuba ne nsansa.—Mateo 6:31, 34.
Bushe ili ilembo kuti lyatwafwa na muno nshiku? Tulingiile ukulaumfwila ifyo Yesu alandile. Mulandu nshi? Ifitabo fimo filanda ukuti umuntu nga alesakamikwa sana, “kuti alwala ifilonda fya mu mala, amalwele ya ku mutima e lyo ne cifuba icifwasa.”
Yesu alilondolwele ukuti tatufwile ukulasakamikwa pantu ukusakamikwa takwafwa nangu panono. Atile, “Nani pali imwe nga ca kuti alesakamikwa engalundako ubumi bwakwe panono?” (Mateo 6:27) Nga tulesakamikwa, te kuti tulundeko inshiku tukekala pa calo kabili te kuti tulenge ukuti tuleikala bwino. Na kuba, ilingi line ifintu tafibipa nga fintu twaletontonkanya. Uwasambilila sana umo atile: “Nga tulesakamikwa ninshi tulepoosa fye inshita, pantu ilingi line ifintu tafibipa nga fintu twaletontonkanya.”
Finshi twingacita pa kuti twilasakamikwa sana? Ica ntanshi ico tulingile ukucita, kucetekela Lesa. Nga ca kuti Lesa alapeela ifyuni ifya kulya kabili alafwika na maluba pa kuti yalemoneka bwino, bushe kuti afilwa ukupeela abantu abamupepa ifyo bakabila? (Mateo 6:25, 26, 28-30) Ica bubili ca kuti, tatulingile ukulasakamikwa pa fya ku ntanshi. Yesu atile, “Mwilasakamikwa pa bushiku bwa mailo, pantu ubwa mailo bukaba na masakamika ya buko.” Bushe tamulesumina ukuti “amafya ya mu bushiku bumo yalilinga kuli ubo bwine bushiku”?—Mateo 6:34.
Nga tulecita ifyo Yesu alandile, tukalaicingilila ku mafya ayengi. Ne cacilapo ukucindama ca kuti tukaba no mutende wa cine cine uo Baibolo, itila “umutende wa kwa Lesa.”—Abena Filipi 4:6, 7.