Cinshi Baibolo Isambilisha?

Bushe Lesa alasuka amapepo yonse?

BUSHE KUTI MWATILA ALASUKA AMAPEPO . . .

• Ya bantu bonse

• Ya bantu bamo

• Takwaba abo asuka

IFYO BAIBOLO ILANDA

“Yehova aba mupepi na bonse . . . abalilila kuli ena mu cishinka.”—Amalumbo 145:18.

FINSHI FIMBI IFYO TUSAMBILILAKO KU FYO BAIBOLO ILANDA?

• Lesa takutika ku mapepo ya bantu abashimumfwila ku mufulo fye. (Esaya 1:15) Na lyo line, kuti ‘bawamya bucibusa’ bakwata nankwe nga baleka ukucita ifyabipa.—Esaya 1:18.

• Pa kuti Lesa asuke ipepo, lifwile ukulingana no kufwaya kwakwe, nga fintu atweba muli Baibolo.—1 Yohane 5:14.

Bushe tufwile ukufukama, ukwikala, nelyo ukwiminina ilyo tulepepa?

ABANTU BAMO BATILA lyonse nga balepepa bafwile ukufukama, ukukontama, nelyo ukubika amaboko pamo. Inga imwe mutontonkanyapo shani?

IFYO BAIBOLO ILANDA

Lesa alyaswike amapepo ya bantu ‘abaikele,’ ‘abaiminine,’ ‘abaleele pa nshi’ e lyo na ‘bafukeme.’ (1 Imilandu 17:16; 2 Imilandu 30:27; Esra 10:1; Imilimo 9:40) Ifi fyonse twalandapo te fikabilwa pa kuti Lesa asuke amapepo.

FINSHI FIMBI IFYO TUSAMBILILAKO KU FYO BAIBOLO ILANDA?

• Lesa alasuka amapepo ya bantu abaicefya.—Amalumbo 138:6.

• Kuti mwapepa mu lulimi ululi lonse kabili kuti mwapepa na mu mutima.—2 Imilandu 6:32, 33; Nehemia 2:1-6.