Ifyo Tulingile Ukulamona Ifilubo

Ba Don na ba Margareta balibatandalile ku mwana wabo umukashana no lupwa lwakwe. Ilyo abeni bali mu kubwelelamo, ba Margaret abalebomba incito ya kwipika kale, balipike macaroni iyo babikamo cheese, pantu e fya kulya abeshikulu babo batemenwe sana.

Ilyo bonse baikele pa kuti batendeke ukulya, ba Margaret baliletele ifya kulya bonse balelolela no kufibika pa kati ke tebulo. Ilyo bakupukwilepo, balyumfwile ububi ilyo basangile ukuti baipike fye cheese yeka yeka ukwabula ukubikamo macaroni.

Bonse fye tulapanga ifilubo, nampo nga tuli bakalamba nelyo abaice. Tulalufyanya mu fyo tulanda nelyo ifyo tucita, kabili limo icilenga ni co tulacita ifintu ukwabula ukwishiba nelyo ukutontonkanya pa fishinka fyonse. Cinshi tupangila ifilubo? Finshi tulingile ukucita nga twapanga ifilubo? Bushe paliba ifyo twingacita pa kuti twilapanga sana ifilubo? Ukwishiba ifyo tufwile ukulamona ifilubo kuti kwatafwa ukwasuka aya amepusho.

IFYO TUMONA IFILUBO NE FYO LESA AFIMONA

Nga pali ifisuma ifyo tucitile, tulatemwa abantu nga batutasha nelyo balanda pa fyo tucitile. Kanshi nga twalufyanya, tufwile ukusumina ukuti natulufyanya. Tatufwile ukusumina fye ukuti natulufyanya nga ca kuti abantu nabeshiba ifyo tucitile nelyo twacilufyanisha ku mufulo. Nomba pa kuti tusumine ukuti natulufyanya, tufwile ukuicefya.

Nga twalikwata icilumba, tukalapeela bambi imilandu pa fyo tucitile, ukwangusha icilubo tucitile nelyo ukukaana ukuti natulufyanya. Ukucita ifi ilingi line kulaleta amafya. Kulalenga ubwafya bwakaana ukupwa kabili kulalenga twalapeela imilandu abantu bakaele. Na kabili nangu ca kuti tapali ifyabipa ifitucitikiile pa filubo tucitile, tufwile ukwishiba ukuti mu kuya kwa nshita, “bonse umo umo tukalubulula kuli Lesa.”—Abena Roma 14:12.

Ifyo Lesa amona ifilubo e fyo tulingile ukulafimona. Mwi buuku lya Amalumbo, Baibolo yalanda ukuti Lesa “wa nkumbu kabili wa mutembo.” Ilanda no kuti “tekalila fye ukufwailisha ifilubo kabili takalifiwa umuyayaya.” Alishiba ukuti tuli babembu kabili alishiba ne fyo tushingacita pantu “alebukisha ukuti tuli lukungu.”—Amalumbo 103:8, 9, 14.

Nga filya ciba kuli wishi uwaba no luse, Lesa afwaya fwe bana bakwe tulemona ifilubo nga ifyo afimona. (Amalumbo 130:3) Muli Baibolo mwaliba ifyebo ifingi ifitwafwa ukwishiba ifyo tulingile ukucita nga twalufyanya nelyo abantu batulufyanya.

IFYO TUFWILE UKUCITA NGA TWALUFYANYA

Ilingi line, abantu nga balufyanya balapoosa inshita iikalamba na maka pa kuti baipokolole nelyo ukupeela bambi umulandu. Nomba nga mwalanda amashiwi ayakalifya umuntu, mufwile fye ukulomba ubwelelo kabili mulingile ukukosha bucibusa bwenu na uyo muntu. Bushe mwalicitapo icilubo icamukalifye, icakalifye bambi nelyo icaletele amafya yambi? E ico mu nshita ya kulaipeela imilandu nangu ukulapeela bambi imilandu, mulingile ukubombesha ukupwisha ubwafya. Ukulamona kwati bambi e balufyenye kulalenga ubwafya ukukanapwa bwangu kabili kulalenga ubwafya ukukulilako. Kanshi ico mufwile ukucita kusambililako no kubombela pa cilubo.

Nga ca kuti umuntu umbi alufyanya, cilanguka ukumupeela umulandu. Nomba cilawama sana nga tulecita filya Yesu Kristu alandile ukuti: “Fyonse ifyo mufwaya abantu ukuti balemucitila, e fyo na imwe mulebacitila.” (Mateo 7:12) Nga mwalufyanya, mufwile mulafwaya abantu bamubelela uluse nelyo ukukanabika amano ku fyo mucitile. Kanshi mufwile ukucita cimo cine ku bantu bambi.—Abena Efese 4:32.

IFYO TWINGACITA PA KUTI TWILAPANGA SANA IFILUBO

Dikishonari imo itila, icilenga ukupanga ifilubo “kukanapingula bwino pa fintu, ukukanaishiba ifishinka fyonse nelyo ukukanabika amano ku fintu.” Kwena icishinka ca kuti, kulaba inshita shimo ilyo bonse tucita fimo pali ifi twalandapo. Na lyo line, tatwakulapanga sana ifilubo nga ca kuti tulekonka ifyo Baibolo ilanda.

Cimo ico twingacita cintu Baibolo yalandapo pa Amapinda 18:13 apatila, “Uwasuka ilyo talati omfwikishe umulandu, buwelewele kuli ena kabili ni nsoni.” Ca cine ukuti nga mulelolela mwaishiba ifishinka fyonse ilyo tamulalanda kabili muletontonkanya pa fyo mwalalanda, tamwakulalanda ifikalakalifya bambi. Na kabili nga mulebika amano ku fintu, tamwakulalufyanya pa kupingula pa fintu kabili tamwakulapanga sana ifilubo.

Na kabili Baibolo itila: “Mule-esha na maka yenu yonse ukuba aba mutende ku bantu bonse.” (Abena Roma 12:18) Mulebombesha pa kuti muleumfwana na bambi. Nga mulebomba na bantu bambi, mufwile ukuba no mucinshi e lyo no kulabalangulukilako kabili mufwile ukulabatasha no kubakoselesha. Nga mulecita ifi, mukalaelelana nga paba uwalanda ifyakalifya umunankwe, kabili cikalayanguka ukupwisha amafya ayakalamba.

Mufwile ukulasambililako ku fyo mulelufyanya. Mu nshita ya kulaipokolola pa fyo mulandile nelyo ukucita, mufwile ukusambililako pa kuti mwabelako abantu abasuma. Nga mulecita ifi, mukaba ne mibele iisuma pamo nga ukutekanya, icikuuku, ukuilama, ubufuuke, umutende no kutemwa. (Abena Galatia 5:22, 23) Na kabili, mukeshiba ifyo mushilingile ukucita. Nangu ca kuti tamulingile ukulapanga ifilubo ku mufulo, tamufwile ukulabika sana amano ku filubo mulepanga. Nga muli ne mipuulwe, tamwakulaumfwa sana ububi nga pali ico mwalufyanya.

TULANONKELAMO NGA TULEMONA IFILUBO IFYO TULINGILE UKUFIMONA

Nga twalamona ifilubo ifyo tulingile ukufimona, tukeshiba ifya kucita nga twalufyanya. Tukalaumfwana sana na bantu kabili tatwakulaumfwa sana ububi nga twalufyanya. Nga tulesambilila ku filubo tulepanga, tukaba sana na mano kabili abantu bakatutemwa. Tatwakulaipeela imilandu nelyo ukulamona kwati tuli bantu ababi. Ukwishiba ukuti abantu bambi nabo balafwaya ukuleka ukupanga ifilubo, kukalenga tukabatemwe sana. Ne cacindama sana ca kuti, tulanonkelamo sana nga tulepashanya ifyo Lesa atutemwa ne fyo atubelela uluse.—Abena Kolose 3:13.

Bushe ifyo ba Margaret abo tulandilepo pa kubala bacitile fyalilengele aba mu lupwa baumfwa ububi? Awe. Icacitike calengele bonse, ukubikako fye na ba Margaret, ukutendeka ukuseka, kabili baliliile filya ifya kulya nangu ca kuti tamwali macaroni. Ilyo abeshikulu babo bakulile bakwata ne ndupwa shabo, baleshimikilako abana babo icacitike. Na kuba, icilubo bapangile cali fye icinono.