3 Ifingatwafwa Ukulashipikisha Ilyo Tuli na Mafya

UKULWALILILA

Ba Rose batile: “Nalilwala ubulwele ubushipola kabili ubulenga ndeumfwa sana ubukali. Ubumi bwandi bwalibipa sana.” Cimo icalelenga baleumfwa sana ububi ni co limo balefilwa ukumfwa nga balebelenga Baibolo nelyo baleisambilisha ifya kwa Lesa. Amashiwi Yesu alandile pali Mateo 19:26 yalibafwile sana, atile: “Lesa kuti acita ifintu fyonse.” Ba Rose basangile ukutila kwaliba inshila ishingi isha kusambililamo ifya kwa Lesa. Apo baleumfwa sana ubukali ica kuti inshita shimo balefilwa no kubelenga, balekutika kuli Baibolo na ku mpapulo shimbi isho babelenga.a Balandile ukuti: “Akubula ifi fintu nga nalibwelele pa numa mu fya kwa Lesa.”

Nga ca kuti ba Rose baumfwa ububi pa mulandu wa kufilwa ukucita ifyo balecita kale, balomfwako bwino nga batontonkanya pa mashiwi yaba pali 2 Abena Korinti 8:12 ayatila: “Nga cine cine mulefwaya ukusangula, Lesa akapokelela ubupe bwenu nga mwapeela ukulingana na po mukwatile te pa fintu mushikwete.” Aya amashiwi yalalenga ba Rose baleibukisha ukuti Lesa alatasha pa fyo bacita nangu ca kuti kwaliba ifingi ifyo bafilwa ukucita.

UBULANDA

Ba Delphine, abo tulandilepo kale batile: “Ilyo umwana wandi uwali ne myaka 18 afwile, naleumfwa sana ububi ica kuti nalemona fye kwati nalafwa, no kuti ifintu tafyakatale afiba bwino.” Na lyo line, balisansamwike ilyo babelengele Amalumbo 94:19, umo kemba wa malumbo aebele Lesa ukuti: “Ilyo amatontonkanyo ya kusakamika yafulile muli ine, e lyo ifya kusansamusha fyenu fyantalalike umutima.” Balandile no kuti: “Nalipepele kuli Yehova ukuti angafwe ukwishiba ifyo ningalacita pa kuti nilaumfwa sana ububi.”

Balitendeke ukubombako imilimo ya kwafilisha abantu. Na kabili mu kuya kwa nshita, batendeke ukuipashanya ku fyo umwana abomfya pa kupenta ifyo alengele (crayon), pantu filatwalilila ukubomba nangu ca kuti fyalikontoka. E ico nangu ca kuti balemona kwati baba nga ica kupentelako icakontoka, kwaliba ifyo bengacita pa kwafwa abantu bambi. Batile: “Nalimwene ukutila nga nabomfya Baibolo ku kusansamusha abo nsambilisha, ninshi na ine Yehova alensansamusha.” Balilembele amashina ya bantu abo Baibolo yalandapo abalipo sana no bulanda, kabili basangile ukutila “aba bantu bonse balepepa sana.” Na kabili basangile ukutila “pa kuti umuntu aleshipikisha afwile ukulabelenga Baibolo.”

Ukulabelenga Baibolo kwalilenga ba Delphine ukulabika amano ku fikacitika ku ntanshi mu nshita ya kulabika sana amano ku fyacitika kale. Ifyo Baibolo yalanda pa Imilimo 24:15 filabasansamusha sana. Ili ilembo litila: “Kukaba ukubuuka kwa balungama na bashalungama.” Bushe balishininkisha ukuti Yehova akabuusha umwana wabo? Ba Delphine batile: “Tukamonana na kabili no mwana wandi. Shifwe alibika ubushiku ubo tukamonana no mwana wandi. Ndelenganya ifyo cikalaba nga tuli mwi bala lyesu ne fyo nkamutemwa kwati ni filya namutemenwe ilyo afyelwe fye.”