“Bushe Lesa Aali kwisa Ilyo Ifi Fyalecitika?”

NGA CA KUTI IFYABIPA FYACITIKA, BUSHE NA IMWE MULAYIPUSHA UKUTI ‘CINSHI LESA ALEKELE IFI UKUCITIKA?’ NELYO BUSHE KWALIBA IFYAMUCITIKILAPO IFYALENGA MULEMONA KWATI LESA TAMUBIKAKO AMANO?

Nalimo na imwe mumfwa nga ba Sheila abekala ku America. Ba Sheila bakuliile mu lupwa umo babikile sana amano ku fya mapepo, kabili batile: “Ukufuma fye ku bwaice nalitemenwe Lesa pantu e watubumba. Nomba nshatalile ng’umfwapo ukuti ni cibusa wandi. Nalemona kwati alemwena fye akatalamukila. Nalishibe ukuti Lesa tampatile, na lyo line, nalemona kwati tambikileko amano.” Cinshi calengele ba Sheila balemona kwati Lesa tababikileko amano? Balandile ukuti: “Twalekwata sana amafya mu lupwa kabili calemoneka kwati Lesa taletwafwa nangu panono.”

Nga filya cali kuli ba Sheila, na imwe mufwile mwalishininkisha ukuti Lesa wa Maka Yonse e ko aba. Nomba kuti mwalamona kwati Lesa tamubikako amano. Yobo uwali umulungami kabili uwacetekele ukuti Kabumba alikwata amaka na mano, alemona kwati Lesa tamubikileko amano. (Yobo 2:3; 9:4) Ilyo Yobo akwete amafya mu kukonkana, aipwishe Lesa ukuti: “Cinshi ico mufishile cinso cenu no kuntunga ukuba umulwani wenu?”—Yobo 13:24.

Finshi Baibolo yalandapo? Bushe tufwile ukulapeela Lesa imilandu ifyabipa nga fyacitika? Bushe kwaliba ifilanga ukuti Lesa alitubikako amano? Bushe kuti twaishiba nga ca kuti Lesa alitubikako amano? Bushe aleshiba ifyo tuleumfwa kabili alatwafwa nga tuli na mafya?

Mu fipande fikonkelepo, twalasambilila pa fyo ifintu Lesa abumba filanga ukuti Lesa alatubikako amano. (Abena Roma 1:20) Lyena twalasambilila pa fyo Baibolo yalanda pa fyo Lesa atusakamana. Ilyo mulesambilila pa fyo abumba na lintu mulesambilila pali ena mu Cebo cakwe, ‘mukamwishiba’ bwino kabili mukamona ukuti ‘alamusakamana.’—1 Yohane 2:3; 1 Petro 5:7.