Nga ca Kuti Lupwa Lwenu Nelyo Cibusa Afwa

“Nalyumfwile sana ububi ilyo abakalamba bandi bafwile ukwabula ukwenekela. Na lintu papitile inshita, naleumfwa sana ububi nga natontonkanya pali bena. Naleumfwa kwati bandasa umwele. Inshita shimo nalefulwa. Naleyipusha ukuti: ‘Mulandu nshi bafwilile?’ Na kabili naleipeela imilandu pantu nshaleba sana pamo nabo ilyo bashilafwa.”—E fyalandile ba Vanessa aba ku Australia.

NGA CA KUTI mwalifwilwa lupwa nelyo cibusa, nalimo na imwe mulaba sana no bulanda, mulatalalilwa kabili mumona kwati te kuti mutwalilile ukushipikisha. Nalimo inshita shimo mulafulwa, mulaipeela imilandu kabili mulaba no mwenso. Na kabili mufwile mumona kwati no kufwa kwawama.

Mufwile ukwishiba ukutila nga muli no bulanda tacipilibula ukuti tamwashipa. Na kuba nga muli no bulanda ninshi mulelanga fye ukuti mwalitemenwe sana umuyashi. Nomba bushe kwaliba ifingamwafwa ukuleka ukuba sana no bulanda?

IFYO BAMO BACITA PA KUTI BALESHIPIKISHA

Nangu ca kuti mumona kwati mukatwalilila fye ukuba no bulanda, kuti mwatendeka ukumfwako bwino nga mulecita ifyakonkapo:

MULELILA NGA MWAUMFWA UBULANDA

Ifyo abali no bulanda bacita e lyo ne nshita ipitapo pa kuti baleke ukuba no bulanda filapusanapusana. Na lyo line, ukulila kuti kwalenga mwatendeka ukumfwako bwino. Ba Vanessa abo tulandilepo, batile: “Nga nalila naleumfwako bwino.” Ba Sofía abafwililwe umwaice wabo ukwabula ukwenekela nabo batile: “Nga natontonkanya pa mfwa ya mwaice wandi ndomfwa sana ububi. Ng’umfwa kwati ni filya umuntu omfwa nga balemusambile icilonda. Ukusambile icilonda kulalenga capola nangu ca kuti cilakalipa sana ilyo balecisambila.”

MULEEBAKO BAMBI IFYO MULETONTONKANYA NE FYO MULEUMFWA

Inshita shimo kuti mulefwaya ukuba mweka. Na lyo line, nga ca kuti tamulefwaya ukwebako bambi ifyo muleumfwa, kuti caba kwati mulefwaya ukusenda icipe icafina mweka. Jared uuli ne myaka 17 kabili uwafwilwa bawishi atile: “Naleebako bambi ifyo naleumfwa, kabili nangu ca kuti nalefilwa ukubalondolwela bwino bwino, naleumfwako bwino.” Ba Janice abo tulandilepo mu cipande ca kubalilapo nabo batile: “Naleumfwako bwino nga naebako bambi ifyo naleumfwa. Nalimwene ukuti balishibe ifyo naleumfwa kabili balenkoselesha.”

MULESUMINA NGA CA KUTI ABANTU BALEFWAYA UKUMWAFWA

Dokota umo atile: “Nga ca kuti umuntu uufwililwe talekaana nga ca kuti balupwa lwakwe ne fibusa balefwaya ukumwafwa, kuti atwalilila ukushipikisha kabili kuti aleka ukuba sana no bulanda.” Mufwile ukulaeba ifibusa fyenu ifyo mwingatemwa bacita pa kumwafwa. Nalimo balafwaya ukumwafwa, lelo tabeshiba ifya kucita pa kumwafwa.—Amapinda 17:17.

MULEKOSHA BUCIBUSA BWENU NA LESA

Ba Tina batile: “Ilyo abena mwandi bafwile ukwabula ukwenekela ku bulwele bwa kansa, nshakwete uwakwebako amafya nalekwata e lyo ne fyo naleumfwa. E ico nalepepa sana kuli Lesa no kumulondolwela fyonse ifyaleba ku mukoshi. Cila bushiku nalelomba Lesa ukuti angafwe ukushipikisha, kabili alingafwile sana.” Ba Tarsha abaali ne myaka 22 ilyo banyina bafwile batile: “Ukubelenga Baibolo cila bushiku kwalensansamusha, pantu kwalelenga ndetontonkanya pa fyalelenga ndeumfwako bwino.”

MULEELENGANYA IFYO CIKABA ILYO BALUPWA LWENU NE FIBUSA BAKABUUKA

Ba Tina balandile no kuti: “Ilyo abena mwandi bafwile fye, isubilo lya kuti abafwa bakabuuka talyalensansamusha pantu ine na bana bandi twalefwaisha ukuba pamo nabo pali ilya ine inshita. Na lyo line pali ino nshita ili isubilo lilansansamusha kabili lilangafwa ukushipikisha, nangu ca kuti napapita imyaka 4 ukutula apo bafwilile. Ndelenganya ifyo cikaba ilyo tukamonana nabo na kabili, kabili ukucita ifi kulalenga ndeba ne nsansa.”

Nalimo kuti papita inshita pa kuti mutendeke ukumfwako bwino. Nga ca kuti mucili mulomfwa sana ububi ninshi ifyalandile ba Vanessa kuti fyalenga mwaumfwako bwino, batile: “Kuti walamona kwati tawakaleke ukuba no bulanda, lelo mu kupita kwa nshita kulaba ukutendeka ukumfwako bwino.”

Mufwile ukwishiba ukuti, nangu ca kutila te kuti muleke ukufuluka umuyashi, kuti mwatwalilila ukushipikisha. Apo Lesa alimutemwa akulamwafwa, kabili nga muleba pamo ne fibusa kuti muleba ne nsansa. Nomba line fye Lesa akabuusha abafwa. Afwaya ukuti mukasengele balupwa lwenu ne fibusa ilyo bakabuuka, kabili tamwakatale amumfwapo ububi pa mulandu ne mfwa!

Amalembo ya mu Baibolo Ayengamwafwa Ukulaumfwako Bwino

Lesa alamubikako amano nga muli no bulanda.

Umo uwalembeleko Baibolo aebele Lesa ukuti: “Bikeni ifilamba fyandi mu nyambi yenu. Bushe tafyalembwa mwi buuku lyenu?”—Amalumbo 56:8.

Kuti mwaeba Lesa ifyo muleumfwa.

“Nalelondolola ukucula kwandi ku cinso [ca kwa Lesa] . . . nakuutile kuli imwe, mwe Yehova,a ukuti mungafwe.”—Amalumbo 142:2, 5.

Kuti mwaba ne subilo.

“Kukaba ukubuuka kwa balungama na bashalungama.”—Imilimo 24:15.

Lesa alilaya ukuti akabuusha abantu abengi abafwa, kabili alafwaisha ukubabuusha.b—Yobo 14:14, 15.

a Baibolo ilanda ukuti Yehova e shina lya kwa Lesa.

b Nga mulefwaya ukwishibilapo na fimbi pe subilo lya kuti abafwa bakabuuka, belengeni icipandwa 7 mu citabo citila Bushe Cinshi Baibolo Isambilisha? Abalemba ici citabo ni Nte sha kwa Yehova kabili kuti mwacikopolola pa www.jw.org/bem ukwabula ukulipila.