Nga ca Kuti Abena Mwenu Bacita Ubucende Nelyo Bamusha

“Naleumfwa kwati nalafwa ilyo abena mwandi banjebele ukuti balansha pa kuti bope umwanakashi umbi umwaice pali ine. Naumfwile kwati bamfyenga, maka maka nga natontonkanya pa fyo nalebacitila.” —E fyalandile ba Maria aba ku Spain.

“Ilyo abena mwandi banshile, naumfwile kwati pali icilundwa icafwile muli ine. Fyonse ifyo twalepanga ukucita ne fyo twaleenekela fyapwilile palya pene. Kwaleba inshita ilyo nalemona kwati nindeka ukumfwa ububi, lelo ukwabula no kwenekela naletendeka ukumfwa ubulanda na kabili.”—E fyalandile ba Bill aba ku Spain.

NGA CA KUTI abena mwenu bamusha nelyo bacita ubucende kuti muleumfwa sana ububi. Kwena bamo balelela abena mwabo no kutendeka ukukosha icupo cabo na kabili.a Na lyo line, nampo nga icupo capwa nelyo iyo, umulume nelyo umukashi alaba sana no bulanda nga aishiba ukuti umwina mwakwe alicitile ubucende. Nomba cinshi umulume nelyo umukashi alingile ukucita pa kuti aleumfwako bwino?

AMALEMBO YA MU BAIBOLO AYENGAMWAFWA UKULAUMFWAKO BWINO

Nangu ca kutila kuti mwaumfwa sana ububi abena mwenu nga bacita ubucende, kuti muleumfwako bwino nga mulebelenga Baibolo nga fintu caba ku bengi abo ifi fyacitikilapo. Abengi balishiba ukuti Lesa aleshiba ifyo bomfwa kabili na o alomfwa sana ububi.—Malaki 2:13-16.

“Ilyo amatontonkanyo ya kusakamika yafulile muli ine, e lyo ifya kusansamusha fyenu fyantalalike umutima.”—Amalumbo 94:19.

Ba Bill balandile ukuti: “Ilyo nalebelenga ili ilembo, naleumfwa kwati Yehova alesansamusha cikuuku cikuuku, nga filya wishi uwa cikuuku engacita ku mwana wakwe.”

“Ku wa cishinka mukaba aba cishinka.”—Amalumbo 18:25.

Abalume ba ba Carmen balecita ubucende pa myeshi iingi. Ba Carmen batile: “Abena mwandi tabali ne cishinka kuli ine. Nomba Yehova ena takaleke ukuba ne cishinka kuli ine nangu cikabe shani.”

“Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata . . . no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.”—Abena Filipi 4:6, 7.

Ba Sasha balandile ukuti: “Ndabelenga sana ili ilembo. Na kabili nalimwene ukuti ilyo nalepepa sana, Lesa alempeela umutende.”

Bonse abo tulandilepo, inshita shimo balemona kwati te kuti batwalilile ukushipikisha. Lelo balicetekele Yehova Lesa kabili Icebo cakwe calibafwile ukutwalilila ukushipikisha. Ba Bill batile: “Icitetekelo candi calilengele ndeumfwako bwino nangu ca kuti ifintu fyalibipile sana. Nangu cali kwati ndeenda ‘mu mupokapoka umwafiita fititi,’ nalishibe ukuti Lesa aali na ine.”—Amalumbo 23:4.

a Nga mulefwaya ukwishiba nampo nga kwelela abena mwenu abacitile ubucende nelyo iyo, belengeni ifipande ifyali muli Loleni! ya May 8, 1999, iyakwete umutwe waleti “Lintu Abena Mwenu Bacita Ubucende.”

Ifyayafwa Bamo Ukushipikisha

Ukutontonkanya pa malembo ayasansamusha.

Ba Bill batile: “Nalebelenga ibuuku lya kwa Yobo e lyo ne lya Amalumbo, kabili nga namona icishinka icingansansamusha naleshilapo. Nalimwene ukuti abalelemba Baibolo nabo balekwata amafya kabili baleba no bulanda nga fintu na ine nali.”

Ukukutika e lyo no kulisha nyimbo.

Ba Carmen balandile ukuti, “Nga nafilwa ukulaala ubushiku, naletendeka ukukutika ku nyimbo. Nga nacita ifi naleumfwako bwino.” Ba Daniel nabo batile: “Nalisambilile ukulisha banjo kabili nalimwene ukuti ukucita ifi kwalilengele natendeka ukumfwako bwino.”

Ukwebako bambi ifyo baleumfwa.

Ba Daniel batile: “Nshatemenwe ukweba abantu ifyo naleumfwa. Na lyo line, nalikwete ifibusa ifisuma ifyo naleeba ifyo naleumfwa cila bushiku. Nalebalembela pa kubeba ifyo naleumfwa, e lyo inshita shimbi nalebeba fye pa kanwa nkati, kabili ici calilengele ndeumfwako bwino.” Ba Sasha nabo batile: “Balupwa lwandi balengafwa sana. Bamayo baleba na ine lyonse. Nga ndefwaya ukulanda nabo, balekutika. Batata nabo balelenga ndeumfwako bwino no kungafwa ukuleka ukuba sana no bulanda, kabili balintekanishishe mpaka natendeka ukumfwako bwino.”

Ukulapepa sana.

Ba Carmen batile: “Nalepepa lyonse. Ici calengele ndeumfwa ukuti Lesa aali na ine, aleumfwa nga napepa, kabili alengafwa. Ilyo ifintu fyayafishe sana, bucibusa bwandi na Lesa bwalikoseeleko.”