Umulimo nasalile ukubomba Usuma

Abashimika ili lyashi ni ba Sonia Acuña Quevedo

Bampeele incito imbi iya pa muulu ku banki uko nalebomba. Ico cifulo bampeele cali icacindama kabili ne ndalama sha kufola shalifulileko. Nomba ilyo bampeele ici cifulo ninshi e lyo banjebele fye ukuyabomba bupainiya bwa nshita yonse ku cilonganino cali ukutali na kuntu naleikala. Mu mutima natile, ‘nsalepo cinshi?’ Nga natontonkanya pa mulimo nasalilepo, uo nabomba pa myaka 32 iyapita, ndomfwa bwino.

BAMAYO balepepa ku Katolika ukutula ku bwaice lelo baletwishika ifyo balesambilila kulya. Balepapa ico abantu balepepela ifipasho, ifyapangwa na bantu. Balefwaya sana ukwishiba ukupepa kwa cine. Kanshi baleti bapepa muli ili calici bafumamo baya mumbi pa kuti fye basange icine, lelo tabalecisanga.

Bushiku bumo ilyo baikele pa nse pa ng’anda pa mwesu mu musumba wa Tuxtla, ku Mexico, ninshi balepuupwako akamwela, kwaishile Inte ya kwa Yehova. Ilyo baumfwile ifyo aleyasuka bwino amepusho yabo ukubomfya Baibolo, balisumine ukuti akabwele. Ilyo abwelele, asangile bamayo bali no mukalamba wa mwi calici lya Adventisiti, na shimapepo wa ku Katolika, e lyo na shimapepo mu calici lya Nazarene. Bamayo baipwishe icipusho pe Sabata, kabili uwayaswike fye bwino ukufuma mu Baibolo, ni Nte. Na kuba uyu wine Nte e wakwete fye Baibolo. Mu 1956, pa numa ya kusambilila Baibolo pa myeshi fye 6, bamayo balibatishiwe, baba Inte ya kwa Yehova. Iyo nshita nali fye ne myaka 8.

Batata Basakamana

Batata tabalekanya bamayo ukusambilila Baibolo. Lelo ilyo bamayo batendeke ukulongana no kutusambilisha fwe bana bonse bane—abanakashi babili na baume babili, batata balyonawilile bamayo ifitabo na bamagazini. Bena mu mutima baishibe ukuti ifyo twalecita tafyali bwino. Ico calengele babule Baibolo ya ku Katolika pa kuti balange bamayo ukuti Inte sha kwa Yehova baabikamo fye abene ishina lya kwa Lesa, Yehova muli Baibolo yabo. Ilyo bamayo balangile batata apalembwa ishina Yehova muli Baibolo wabo, batata balipapa sana, kabili balilekele no kusuusha Inte sha kwa Yehova.—Amalumbo 83:18.

Mu Mexico ubushiku umwana mwanakashi afisha imyaka 15 bulaba bushiku bwakusangalala. Apo ukusefya ubushiku bwa kufyalwa takwafuma mu Malembo, nalilekele ukusefya.a Lelo batata balefwaya sana ukuncitilapo cimo pa bushiku nafyalilwepo. Nalitontonkenyepo pali uyu mulandu, e lyo nabeba nati: “Ubupe ningatemwa mwampeela, kuya nenu ku kulongana kukalamba ukwa Nte sha kwa Yehova uko tukakwata.” Baalisumina ukuya kabili batendeke no kufwaya sana ukwishiba Baibolo.

Bushiku bumo pa numa ya cikuuku cikalamba, batata baliketwe ku malaiti lintu banyantile pa ntambo ya malaiti iyaponene kabili baliicenene sana ica kuti balekabila opareshoni iikalamba. Ilyo bali mu cipatala, Inte sha kwa Yehova balebasakamana akasuba no bushiku. Tabalabile uku kutemwa babalangile. Mu kupita kwa nshita batendeke ukushimikila kabili pa numa baliipeele kuli Yehova. Ku ca bulanda, balifwile pa 30 September, 1975, ninshi kushele fye umweshi umo ukutila babatishiwe. Tulafuluka sana ukubapokelela ilyo bakabuuka!—Imilimo 24:15.

Bamayo no Mukalamba Wandi Balinkoseleshe

Carmen, umukalamba wandi alitemenwe sana umulimo wa nshita yonse. Ilyo abatishiwe fye mu 1967, atampile bupainiya bwa nshita yonse, ukubomba amaawala napamo 100 cila mweshi. Asukile akuukila ku musumba wa Toluca, lwa pa kati ka Mexico. Ilyo napwishishe isukulu naingile incito ku banki kabili pa 18 July 1970 nalibatishiwe.

Carmen aleumfwa bwino sana ukubomba umulimo wa nshita yonse, kabili ankoseleshe ukumukonka ku Toluca. Bushiku bumo naletontonkanya pa fyo Carmen anjebele uku ninshi ndekutika ilyashi umo kalanda atile, icitetekelo ne fyo abasambi ba kwa Yesu baishiba pali Lesa fifwile ukulenga balamulumbanya. (Mateo 25:14-30) Nayipwishe nati, ‘bushe ubupe Lesa ampeela, ndabubomfya?’ Ukutontonkanya pali ifi kwalengele nalafwaya ukubombesha mu mulimo wa kwa Yehova.

Ukusalapo pa Fintu Fibili

Mu 1974, nalembeele ku maofesi ya Nte sha kwa Yehova no kubeba ukuti nalefwaya ukubombako bupainiya ku cifulo cimbi. Tapapitile na nshita, eluda mu cilonganino ca ku Toluca antumine foni ninshi ndi ku ncito no kunjeba ati: “Tulakulolela. Cinshi ushaishila?” Kanshi ninshi balinjeba ukuba painiya waibela no kuyabombela ku cifulo cimbi, nomba kalata yalilubile! (Bapainiya baibela balasumina ukubomba umulimo wa nshita yonse konse uko ukuteyanya kwa kwa Yehova kwabeba ukuya.)

Nshaikete na ku cani, naebele abakalamba ba mulimo ku banki ukuti nalaleka incito. Lelo batile, “Wicite co Sonia,” uku ninshi balenanga ipepala. “Nabatweba ukutila uli pa banakashi 7 abapeelwe ififulo fya pa muulu pa ncito. E muku wa kubalilapo ibanki lyesu lyapeela abanakashi ici cifulo. Wasumina te fyo?” Nge fyo nandile pa ntendekelo, nali no kulafola indalama ishingi ansumina ici cifulo cali icacindama. Lelo natashishe fye abakalamba ba mulimo no kubeba ukutila nimpingulapo kale ukubombela Lesa inshita yonse. Banjebele ati: “Kanshi cite fyo fine. Lelo nga wafwaya incito kuti wabwela kuno kwine.” Nafikile mu musumba wa Toluca pa numa ya nshiku shibili.

Naba Painiya Waibela mu Mexico

Ilyo nafikile ku Toluca, Carmen ninshi alibomba bupainiya kulya pa myaka ibili. Ala twalitemenwe pa kuba pamo na kabili! Lelo inshita twali pamo tayalepele pantu pa numa ya myeshi itatu, bamayo balisangwa mu busanso kabili balekabila uwa kubasakamana cila nshita. Pa numa ya kwipusha aba ku maofesi ya Nte sha kwa Yehova, twasuminishenye na Carmen ukuti abwelele ku ng’anda mu kusunga bamayo. Alibasungile pa myaka 17. Ilyo alesakamana bamayo, Carmen alebomba na bupainiya bwa nshita yonse. Aleeba abo alesambilisha Baibolo ukwisa ku ng’anda pa kuti alebapo ilyo bamayo balefwaya ukuti abafwe.

Mu 1976, bantumine ukuyabombela mu musumba wa Tecamachalco, umwali abakankaala sana e lyo na bapiina sana. Abapiina baleikala beka na bakankaala na bo beka. Natendeke ukusambilila Baibolo na banakulu bantu ifi abashabalile abopwa, abaleikala na ba ndume yabo aba fyuma sana. Ilyo baebele bandume yabo ukutila balefwaya ukuba Inte, bandume yabo batile nga baba baNte bakabatamfya pa ng’anda. Na lyo line, aba banakulu bantu abashakwete na pa kuuma ukuboko, tabatiinine, kabili ilyo babatishiwe, bandume yabo balibatamfishe. Nangu ca kutila pali iyo nshita bali ne myaka 86, balicetekele sana Yehova. Icilonganino e calebasakamana kabili batwalilile ukupepa Yehova mpaka ne mfwa yabo.

Naya kwi Sukulu lya Gileadi, pa Numa Bantuma ku Bolivia

Pa numa ya kubomba ne nsansa mwi tauni lya Tecamachalco pa myaka 5, balinjitile ukuyasangwa kwi sukulu lya Gileadi ilyo lyatendeke fye mu Mexico. Lyali nge sukulu lya Gileadi lilya line libela ku New York. Bamayo na Carmen wine bankoseleshe ukuya. E co naile ku maofesi ya Nte sha kwa Yehova mu Mexico ku kusambilila pa milungu 10. Ala ici cintu cilandetela sana insansa. Ikalasi lyesu lyapwile ukusambilila pa 1 February 1981, ine na Enriqueta Ayala (Nomba ni Enriqueta Fernandez) batutumine ukuyabombela mu musumba wa La Paz, ku Bolivia.

Ilyo twafikile mu La Paz, twasangile bamunyina abali no kutupokelela tabalafika. Tatwalefwaya ukonaula inshita, e ico twatendeke ukushimikila abantu pa cibansa ca ndeke. Pa numa ya kuipakisha ukubomba amaawala yatatu, e lyo twamwene bamunyinefwe ukufuma ku maofesi yesu bafika. Bamunyina balombele ubwelelo abati balibacilikila pa musebo pa mulandu wa ciila caliko.

Ukushimikila mu Cifulo Cabela pa Muulu

Umusumba wa La Paz, wabela pa muulu sana, amamita 3,625 ukufuma pa nshi. Kanshi ilingi twaleba fye mu makumbi. Apo umwela taupuupa sana, twalecula pa kupeema, kabili ilingi nalenaka sana nga nabomba fye inshita inono. Nangu ca kutila palipita umwaka umo pa kuti fye mbeleshe ici cifulo, Yehova alimpaalile sana ica kuti nalaba na ku mafya nalekwata. Ku ca kumwenako, bushiku bumo mu 1984, naninine ulupili no kuya pa ng’anda iyali fye pa nsonshi ya lupili. Nafikile pali iyi ng’anda ninshi ninaka. Ilyo nakonkonseshe pa ciibi, umwanakashi e wafumine. Twalilanshenye nankwe bwino sana kabili namulaile ukuti nkabwela pa numa ya nshiku shinono.

Atile: “Katwishi nga mukabwela.”

Lelo nalibweleleko, kabili uyu mwanakashi anjebele ukulasambilisha umwana wakwe umwanakashi Baibolo. Natile: “Kwena uyu mulimo wa bafyashi. Nomba nalamwafwako nga mulefwaya.” Alisumine kabili na o wine atendeke ukusambilila Baibolo. Apo taishibe ukubelenga, twatendekelepo ukusambilila mu katabo katila, Sambilila Ukubelenga no Kulemba, akalembwa ne Nte sha kwa Yehova.

Mu kuya kwa nshita abana uyu mwanakashi akwete balifulile bafika 8. Nga nayako, abana bakwe bamo baleikatana pa kuti bangafwe ukutentemuka ulupili. Pano tulelanda uyu mwanakashi na bana bonse 8 babomfi ba kwa Yehova. Abakashana batatu ni bapainiya, kabili umulumendo umo ni eluda mu cilonganino. Abalume bakwe na bo bali babomfi batumikila mu cilonganino ilyo bafwile mu 2000. Ala ndomfwa bwino nga natontonkanya pali ulu lupwa ne fyo lwakosa mu kupepa. Ndatasha Yehova pa kunsuminisha ukubaafwa.

Twatendeka Ukubombela Pamo na Carmen na Kabili

Ilyo bamayo bafwile mu 1997, Carmen na kabili bamwebele ukuba painiya waibela. Mu 1998 bamutumine ukuyabombela ku Bolivia mu musumba wa Cochabamba. Ala caliweme ukuba pamo na kabili pa numa ya myaka 18. Carmen na o batendeke ukumupendela pali bamishonari. Ku Cochabamba kwaliweme sana. Imiceele ilaba iisuma inshita yonse fye iya mwaka ica kuti pa kulanga ifyo kwawama, abene batila no tumimbi tatufwaya kufumako! Pali ino nshita tubombela ku Sucre, mu Bolivia, umusumba uusuma sana umwaba abantu 220,000. Uyu musumba wabela mu mukonko. Kale uyu musumba balewita ati Vatikani pa mulandu wa kuti mwali amacalici ya Katolika 12. Pali ino nshita muli uyu musumba mwaliba ifilonganino 5 ifya Nte sha kwa Yehova.

Nga twabika pamo imyaka ine na Carmen twabomba bupainiya, ilacila 60, kabili tulomfwa bwino pa kukwata ishuko lya kwafwa abantu ukucila pali 100 ukubatishiwa. Ala cine ukubombela Yehova no mweo onse, kulaleta sana insansa.—Marko 12:30.

[Futunoti]

[Icikope pe bula 31]

Nalenina ulu lupili pa kuya mu kusambilila no lu lupwa

[Icikope pe bula 31]

Apa ninshi ndi mu mulimo no mukalamba wandi Carmen (ku kulyo)