Kuti Mwaba ne Nsansa na Pali ino ine Nshita
KUKABA inshita ilyo takwakabe ukulwala, ukukota no kufwa, kabili na imwe bene kuti mwaisabako ilyo ifi fikalacitika. Na lyo line, pali ino nshita fwe bantu tulakwata amafya ayengi. Finshi mulingile ukucita pa kuti muleba ne nsansa? Ifyo Baibolo ilanda kuti fyamwafwa ukuba ne nsansa. Lekeni tulandeko pa mafya yamo ayo fwe bantu tukwata e lyo na pa fyo Baibolo ingatwafwa.
IFYO TWINGATEKA IMITIMA KU FYO TUKWETE
Ifyo Baibolo ilanda: “Mu mikalile yenu mwilatemwa indalama, lelo muteke imitima ku fintu ifyo mukwete.”—AbaHebere 13:5.
Abantu muno nshiku balafwaya tulekwata ifintu ifingi ifya muli cino calo. Lelo ifyo Baibolo ilanda filanga ukutila kuti ‘twateka imitima ku fintu ifyo twakwata.’ Kuti twateka shani imitima ku fintu ifyo twakwata?
Tatulingile “ukutemwa indalama.” “Ukutemwa indalama” kulalenga abantu bamo balekelesha indupwa shabo ne fibusa, balacita ifyabipa, balaiseebanya kabili balacita ne filenga bakaana ukuba no bumi ubusuma. (1 Timote 6:10) Ala ififuma mu kutemwisha indalama filabipa! Na kuba, uwatemwa indalama ‘tatila shafula.’—Lukala Milandu 5:10.
Abantu balicindama ukucila ifintu fimbi. Kwena ifintu fimo filatwafwa, na lyo line abantu e bengatulanga fye ukutemwa, te fintu twingakwata. Ukukwata “cibusa wa cishinka” kuti kwalenga twaba ne nsansa.—Amapinda 17:17.
KUTI TWABA NE NSANSA NA PALI INO INE NSHITA NGA TULEKONKA IFYO BAIBOLO ILANDA
IFINGAMWAFWA UKUSHIPIKISHA NGA MWALWALA
Ifyo Baibolo ilanda: “Umutima wa nsansa muti uusuma.”—Amapinda 17:22.
Ukuba ne nsansa kwaba ngo “muti uusuma” pantu kulalenga twaumfwako bwino nga natulwala. Nomba kuti twaba shani ne nsansa nga ca kuti natulwala?
Muletasha. Nga ca kuti tulebika sana amano ku bulwele twalwala, twakulaumfwa fye ububi “inshiku shonse.” (Amapinda 15:15) Baibolo itweba ukuti “muletootela.” (Abena Kolose 3:15) Kanshi muletasha nangu fye ni pa tuntu utunono. Ku ca kumwenako, kuti mwatasha Yehova nga mwamona ifyo umuulu umoneka bwino nga ca kuti akasuba kalewa, nga ca kuti akamwela akasuma kalepuupa, na lintu cibusa wesu nelyo lupwa amumwentwila. Ifintu fya musango uyu kuti fyalenga twalaumfwako bwino.
Muleafwako abantu bambi. Nangu ca kuti tulalwala, tuleibukisha ukuti “mwaba insansa ishingi mu kupeela ukucila ishaba mu kupokelela.” (Imilimo 20:35) Abantu nga baletutasha pa fyo tubacitila, tukaba ne nsansa kabili tatwakulatontonkanya sana pa bulwele twalwala. Nga tuleafwako abantu bambi, kuti twalaumfwako bwino.
IFYO MWINGACITA PA KUKOSHA ICUPO CENU
Ifyo Baibolo ilanda: “Mwishibe bwino bwino ifyacilapo ukucindama.”—Abena Filipi 1:10.
Nga ca kuti abaupana tabaleba sana pamo, nalimo kuti balekana. Kanshi abalume na bakashi bafwile ukulabika sana amano ku cupo, pantu icupo caba pa fintu ifyacindama sana.
Mulecitila ifintu pamo. Mulingile ukulanshanya pa fyo mwingalacitila ifintu pamo. Baibolo itila: “Ukuba babili kwawama ukucila ukuba weka.” (Lukala Milandu 4:9) Muleba capamo na bena mwenu ilyo muleipika ifya kulya, ilyo muletukusha umubili, ilyo muletuusha no kunwako fimo, e lyo na lintu muleangala.
Mulecita ifilanga ukuti mwalitemwa abena mwenu. Baibolo ilanda ukuti abalume na bakashi balingile ukutemwana no kucindikana. (Abena Efese 5:28, 33) Ukumwentwila abena mwenu, ukubakumbatila nelyo ukubapeelako ica bupe kuti kwakosha icupo. Na kabili, abaupana tabafwile ukulaala no muntu uo bashaupana nankwe.—AbaHebere 13:4.