Bushe Kuti Mwayasuka ici Cipusho?
Isunagoge: Ici cikope cilelanga ifyo isunagoge lyalemoneka ilyali mu musumba wa Gamla uwaliko mu nshita Yesu ali pano calo. Uyu musumba wali apalepa nalimo amakilomita 10 ukufuma kuli Bemba wa Galili. Wali pa kati ka kapinda ka ku kuso na kabanga. Ifyo ici cikope cilemoneka filelenga twaishiba ifyo amasunagoge yalemoneka kale
Bushe amasunagoge yatendeke shani?
ISHIWI lya kuti “isunagoge” lyafuma kwi shiwi lya ciGriki ilipilibula ukuti “ukukumana pamo” nelyo “ukulongana pamo.” Ifi ili ishiwi lipilibula fyalilinga pantu ukutula na kale mu masunagoge e mo abaYuda balonganina ku kupepa na ku kusambilila. Amalembo ya ciHebere tayalandapo pa masunagoge, lelo Amalembo ya ciGriki yalanga ukuti ifi fifulo e ko fyali mu nshita Yesu ali pano calo.
Abasambilila sana ifya mu Baibolo abengi baishiba ukuti amasunagoge yatendeke ilyo abaYuda bali bankole mu Babiloni. Icitabo ca Encyclopaedia Judaica cilanda ukuti: “Apo bankole tabakwete Itempele mu calo bali, ilingi line balekumana pamo nalimo pe Sabata ku kubelenga Amalembo pa kuti basansamushanye kabili bakoseleshanye.” Ilyo abaYuda balubwilwe muli bunkole, cimoneka kwati balitwalilile ukukumana pamo ku kupepa na ku kubelenga Amalembo, kabili balikuulile amasunagoge konse uko baikele.
Ilyo Yesu ali pano calo, abaYuda abaikele mu ncende sha bemba wa Mediterranean na mu Middle East monse, e lyo na mu Israele mwine ninshi balitendeka kale ukupepela mu masunagoge kabili e mo balecitila ne fintu fimbi. Profesa Lee Levine uwa pa Hebrew University of Jerusalem alandile ati: “Mu masunagoge e mo balesambilila amalembo, e mo baleliila ifya kulya fya mushilo, e mo balelubulwila imilandu, e mo balesangwila indalama, kabili e mo balekumanina pa kulanda pa mitekele e lyo na pa fintu fimbi ifyakumine imikalile. Nomba icikalamba ico balekumanina mu masunagoge kubelenga amalembo no kupepa.” Kanshi e co tushipapila filya Yesu aleila ku masunagoge ku kulongana. (Marko 1:21; 6:2; Luka 4:16) Yesu alesambilisha abalelongana mu masunagoge, alebakonkomesha, kabili alebakoselesha. Ilyo icilonganino ca Bena Kristu catendeke, umutumwa Paulo na o aleya ku kubila imbila nsuma mu masunagoge. Abantu abalefwaya ukuba ifibusa fya kwa Lesa balitemenwe ukuya ku masunagoge. E ico Paulo nga aingila mu musumba, ilingi line alebalila ukuya ku masunagoge ku kubila imbila nsuma.—Imil. 17:1, 2; 18:4.