Yesu Acita Ifipesha Amano Mu Kapernahumu

Yesu aebele abasambi bakwe bane, Petro, Andrea, Yakobo na Yohane ukuti babe abalondo ba bantu. Pa bushiku bwe Sabata baile na Yesu kwi sunagoge lya mu Kapernahumu. Yesu asambilishe abalongene mwi sunagoge kabili nabo balipapile ifyo alesambilisha. Alesambilisha ngo muntu uwaba na maka ayafuma kuli Lesa, talelanda nga bakalemba.

Pali ubu ubushiku bwe Sabata, mwi sunagoge mwali umuntu uwakwete icibanda uwalepunda ati: “Bushe tulomfwana na imwe, mwe Yesu, umwina Nasarete? Bushe mwishile ku kutonaula? Nimwishiba bwino, ni mwe Uwa Mushilo uwa kwa Lesa.” Yesu akalipile icibanda icali muli uyu muntu ati: “Talala, kabili fuma muli uyu muntu!”—Marko 1:24, 25.

Ilyo Yesu alandile ifyo, cilya icibanda cafuntwile umuntu pa nshi no kumufulansha kabili cabilikishe ishiwi ilikalamba no kufuma mu muntu “ukwabula ukumucena.” (Luka 4:35) Abali mwi sunagoge balipapile icine cine. Baipushenye abati: “E cinshi ici? . . . Ku maka ale-eba ne mipashi yakowela, na yo ilemumfwila.” (Marko 1:27) E ico ululumbi lwakwe pa cipesha amano ico acitile lwasalanganine mu citungu conse ica Galili.

Ilyo Yesu na basambi bakwe bafumine mwi sunagoge, baile ku ng’anda ya kwa Simone Petro. Basangile banafyala Petro nabalwala sana. Baliiketwe impepo, e ico bapaapeete Yesu ukuti abaafwe. Yesu aile apo baleele, abekata ku kuboko no kubemya abemya. Ilyo line fye, balipolele, batendeka no kutangata Yesu na basambi bakwe, nalimo balibapekanishishe ne ca kulya.

Ilyo akasuba kalewa, abantu abafumine mu ncende shalekanalekana baletele abalwele ku ng’anda ya kwa Petro. Camoneke kwati abantu ba mu musumba bonse baliile pa mwabo Petro. Mulandu nshi? Pantu balefwaya ukundapwa. Na kuba, “bonse abali na balwele abalecula ku malwele yalekanalekana, babaletele kuli ena. Na o alibondepe pa kubika iminwe yakwe pali bonse.” (Luka 4:40) Yesu alyundepe abantu ku malwele yonse ayo balwele nga filya fine casobelwe. (Esaya 53:4) Alifumishe ne fibanda mu bantu. Ilyo imipashi ibifi yalefuma mu bantu, yalebilikisha aiti: “Ni we Mwana wa kwa Lesa.” (Luka 4:41) Lelo Yesu alefikalipila kabili talefisuminisha ukulanda na kabili. Fyalishibe ukuti Yesu ni Kristu, kabili talefwaya cilemoneka kwati na fyo filabombela Lesa wa cine.