Ifipusho Ukufuma ku Babelenga
Ukulingana na Mateo 17:20, abatumwa balifililwe ukuposho mulumendo uwalwele ‘pa mulandu wa citetekelo cabo icinono.’ Nangu cibe fyo, Marko 9:29, alangilila ukuti balifililwe pantu balibulishe ipepo. Mulandu nshi Amalandwe yakwatila ubulondoloshi bwapusanapusana?
Kwena, ubu bulondoloshi bubili bulasailishanya, tabupilikana. Intanshi moneni pali Mateo 17:14-20. Umuntu umo aishileshimika ukuti umwana wakwe umwaume alafunta no kuti abasambi ba kwa Yesu balifililwe ukumuposha. Yesu lyene alyundepe umulumendo ukupitila mu kufumya iciwa icalemucusha. Abasambi balipwishe umulandu bafililwe ukucifumya. Ukulingana no bulondoloshi bwa kwa Mateo, Yesu ayaswike ati: “Ni pa mulandu wa citetekelo cenu cinono. Ndemwebe cine cine, nati, amukwate citetekelo ngo luseke lwa lubanga, nga mwingasosa ku lupili ulo, amuti, Fuma pano uye kulya, na lo kuti lwafumapo; kabili tacingamwansha icintu nangu cimo.”
Nomba kupukuleni pali Marko 9:14-29, apo tusanga ubulondoloshi bwalundwako. Ku ca kumwenako, Marko 9:17 apeela ubulondoloshi bwa kuti uku kufunta kwa musango uyu kwalelengwa no mupashi ubifi. Cili icalinga ukwishiba ukuti Baibolo mu fyalembwa fimbi itila Yesu aposeshe abafunta na bali ne fiwa. (Mateo 4:24) Nga fintu shing’anga Luka ashimika, muli iyi mibele yaibela, ukufunta kwalelengwa no ‘mupashi wa bucibulu kabili wa bunkomamatwi,’ uyo, e mupashi uubifi. (Luka 9:39; Abena Kolose 4:14) Moneni amashiwi ya pali Marko 9:18 aya kuti, “Konse uko [umupashi uubifi] umwikatila, ulamufuntula.” E co te lyonse iciwa calelungulusha umulumendo, cali fye ni limo limo. Nalyo line, abasambi balifililwe ukufumye ciwa no kuposho mulumendo. Lintu baipwishe umulandu bafililwe, Yesu ayaswike ati: “Umusango uyu tawingafuma ku kantu kambi nakalya, kano ku kupepa.”
Nangu ni fyo, ukubelenga ubulondoloshi bwa kwa Marko mu kutekanya, kulangililo kuti tapaaba kupilikana ne fyalembele Mateo. Pali Marko 9:19, tubelengo kuti Yesu alilishike pa mulandu wa kubulwe citetekelo ukwa ilya nkulo. Kabili pa cikomo 23, calembwa ukuti aebele wishi wa mulumendo ukuti: “Fyonse fingacitwa ku utetekela.” E co Marko na o wine akomaila pa bucindami bwa citetekelo. Ni co fye mu cikomo 29, Marko aongeleshapo ubulondoloshi na bumbi. Marko alundapo ifyo Yesu asosele pa lwa kupepa, ifyo Mateo nangu ni Luka bashalandapo.
Cinshi, kanshi, lyene twalasendapo? Inshita shimbi abatumwa 12 na basambi 70 bonse bene balefumya imipashi ibifi. (Marko 3:15; 6:13; Luka 10:17) Lelo ici ciwa cena abasambi balifililwe ukucifumya. Mulandu nshi? Nga twakumbinkanya ifyebo fyalumbulwa mu bulondoloshi bwalekanalekana, tufwile ukusondwelela ukuti tabaipekenye ukucite fyo pali ici ciwa. Nakalimo cimo icalengele ukuti bafilwe cali musango wa ici ciwa, apantu cilemoneka kwati ifiwa fifwile fyalipusanapusana mu misango, mu fyo fyatemwa, nangu fye mu lupikwe. Pa kufumya ici ciwa, maka maka icitetekelo cakosa ne pepo lya mukoosha ilya kulomba ukwaafwa kwa kwa Lesa fyalekabilwa. Kwena, Yesu alikwete icitetekelo ca musango yu. Alikwete na Wishi Komfwa we pepo uwalemutungilila. (Ilumbo 65:2) Yesu tapeleelele fye pa kukwata amaka ya kundapa umulumendo wacushiwe aya kufumye ciwa lelo aliyabomfeshe ku kucite co.