Yesu Aundapa Umulumendo Uwali Ne Cibanda

Ilyo Yesu na batumwa batatu, Petro, Yakobo na Yohane batentemwike ulupili, bakumenye abantu abengi. Balimwene ukuti ifintu tafyali bwino pantu bakalemba baleumanya abasambi. Abantu balipapile sana pa kumona Yesu kabili balimubutukiile pa kuti bamuposheko. Yesu abepwishe ati: “Cinshi ico mulekansaninapo nabo?”—Marko 9:16.

Umwaume uwali pali lilya ibumba afukamiine Yesu no kumweba ati: “Mwe Kasambilisha, ndetele umwana wandi umwaume kuli imwe pantu aba no mupashi wa bucibulu; kabili lyonse ilyo wamwikata, ulamufuntula pa nshi, kabili alafumya ifulo no kusumanya ameno no kupwa amaka. Kabili njebele abasambi benu ukuti baufumyemo, lelo nabafilwa.”—Marko 9:17, 18.

Bakalemba bafwile balesuusha abasambi pa mulandu wa kuti balifililwe ukuposha ulya umulumendo, nalimo balebatumfya no kubatumfya. E ico mu nshita ya kwasuka bawishi ba mulumendo abasakamikwe sana, Yesu aebele ibumba ukuti: “Mwe nkulo iyabula icitetekelo kabili iyapondama, bushe nkaba na imwe ukufika lilali? Bushe nkashipikisha na imwe ukufika lilali?” Yesu ale-eba bakalemba abalecusha abasambi bakwe ilyo ashalipo. Pa numa ya kubeba aya mashiwi Yesu aloleshe bawishi ba mwana abali no bulanda, kabili atile: “Muleteni kuno.”—Mateo 17:17.

Ilyo umulumendo aile-alepalama kuli Yesu, icibanda calimwikete na kabili camupoosele pa nshi no kumufulansha. Umulumendo atendeke ukufulukuta pa nshi no kufumya ifulo ku kanwa. Yesu aipwishe bawishi ati “Bushe ni lilali ici catendeke?” Nabo batile: “Ukufuma fye ku bwaice kabili ilingi ulamupoosa mu mulilo na mu menshi ukuti umwipaye.” Bawishi bapaapeete Yesu abati: “Nga mwingacitapo cimo, mutumfwile uluse no kutwafwa.”—Marko 9:21, 22.

Bawishi balisakamikwe sana pantu abasambi ba kwa Yesu balifililwe ukumwafwa. Ilyo bawishi bapaapeete, Yesu alibakoseleshe. Atile: “Mulandu nshi wasosela auti, ‘Nga mwingacitapo cimo’! Fyonse kuti fyacitwa, ngo muntu ali ne citetekelo.” Awe ilyo line fye, bawishi ba mwana babilikishe abati: “Ndi ne citetekelo! Njafweni ukukosha icitetekelo candi!”—Marko 9:23, 24.

Yesu amwene abantu abengi balebutukila uko ali. Akalipiile icibanda ninshi aba bonse balemonako. Atile: “We mupashi wa bucibulu kabili uwa bunkomamatwi, ndekweba, nati, fuma mu mulumendo e lyo wikengilamo na kabili iyo.” Ilyo icibanda calefuma calengele umulumendo atendeka ukupunda no kufulukuta sana. Lelo pa numa aleele fye tondolo. Ilyo abantu bamwene ifi, abengi batile: “Nafwa!” (Marko 9:25, 26) Lelo ilyo Yesu aikete umulumendo pa kuboko, aliimine kabili “alipolele apo pene.” (Mateo 17:18) Ilyo abantu bamwene ico Yesu acitile, balipapile nga nshi.

Ku numa, ilyo Yesu atumine abasambi mu kushimikila, balifumishe ifibanda. E ico ilyo bali fye beka na Yesu mu ng’anda, bamwipwishe abati: “Mulandu nshi twacifililwa uku-ufumya?” Yesu alondolwele ukuti ni co tabakwete icitetekelo. Atile: “Umupashi wa musango yu teti mu-utamfyemo kano fye kwi pepo.” (Marko 9:28, 29) Icitetekelo cikalamba e lyo no kupepa ukuti Lesa abapeele amaka e fyalefwaikwa pa kutamfya cilya icibanda ica maka.

Yesu asondwelele ati: “Ndemweba icine cine nati, Nga mwakwata icitetekelo icilingene no luseke lwa lubanga, kuti mwaeba ulu lupili amuti, ‘Fuma pano uye kulya,’ na lo kuti lwafumapo, kabili takuli ico mwingafilwa ukucita.” (Mateo 17:20) Ala icitetekelo calikwata amaka!

Amafya tukwata ayengalenga twafilwa ukubomba bwino umulimo wa kwa Yehova limo yalamoneka ayakalamba sana kwati fye ni mpili. Lelo nga tuli ne citetekelo, kuti twacimfya na mafya ayakalamba nge mpili.