Mulebangilila—E Kulangulukilako Bambi
1. Bushe finshi fimo ificitika nga twacelwa ku kulongana?
1 “Cawamapo ukucelwa ukucila ukukanayako!” e lyo nangu ca “kuti nacelwa ku kulongana, icikalamba ca kuti ninonganako!” Bushe mwalyumfwapo uko bamo balanda ifyapala ifi? Lelo bushe abacelwa ku kulongana finshi bapuswako? Nalimo balapuswa ku kwimba ukulenga tulekumfwa bwino sana, ukwaba ukwacindama mu kupepa kwesu. Nelyo bacipuswako kwi pepo ilikatanya aba mu cilonganino pamo. Abacelwa balaipusula ukukoseleshanya ukubako ilyo ukulongana kushilatendeka. Na kabili, nga twacelwa, nalimo kuti twapumbula bambi bafwilwa no kunonkelamo mu kulongana.—Luk. Mil. 3:1; Rom. 1:11, 12.
2, 3. (a) Cinshi cilenga bamo ukucelwa? (b) Bushe ukubangilila cishibilo ca cinshi?
2 Ukubangilila cilangililo ca kuti ninshi natutemwa bambi kabili tulebalangulukilako. Pa kuti tubangilile tukabila ukupekanya bwino no kutontonkanishisha libela ifya kucita. Kwena limo kulabako inshita ilyo cafya sana ukufika bwangu pa kulongana. Nalimo motoka twacininamo kuti yalenga twacelwa, nelyo motoka yesu kuti yakwata ubwafya. Nangu cibe fyo, tufwile ukushininkisha ukuti tulepekanya bwino, tuleyangwako, e lyo tulingile no kulaima bwangu pa ng’anda pa kutila tatulecelwa lyonse. Tufwile ukwesha na maka ukulafika pa kulongana ilyo inshita ya kulongana tailafika.
3 Nalimo icilenga abantu bamo ukucelwa mulandu wa kuti tabaishiba ubusuma bwa kuikansha abene pa kutila balefika bwangu pa kulongana. Uucelwa lyonse, alenga bambi ukumusuula. Mu nshila nshi? Umuntu uucelwa lyonse alenga bambi ukulamumona kwati talangulukilako bambi nelyo te wa kucetekela kabili kuti alenga balafilwa ukumushintililapo na mu milandu imbi. Na kabili, nga tulebangilila ninshi tulelanga ukuti twalikwata ifisabo fya mupashi wa kwa Yehova.—Gal. 5:22, 23.
4. Bushe baeluda na babomfi batumikila kuti balanga shani ukuti balabangilila ku kulongana?
4 Cilawama sana ilyo tulefika pa kulongana, ukusanga baeluda na babomfi batumikila na bafika kale balelolela fye ukutuposha, pa kulanga ukuti balitutemwa nga nshi fwe baba muli ulu lupwa lwa kwa Lesa.—Rom. 15:7.
5. (a) Finshi bambi bengalanda pali ifwe nga tulebangilila ku kulongana no kusunga inshita tupangene na bantu bambi? (b) Nga tulesunga inshita muli fyonse ifyo tucita, fisuma nshi fikafumamo?
5 Nga tulebangilila ku kulongana bambi bakatucindika kabili bakacindika no kuteyanya uko twabamo. Ca cine, nga tulebangilila ninshi tulelangulukilako bambi. Cilalanga kuti tatuli ba cimfulunganya. (1 Kor. 14:40) Abafyashi bafwile ukulafika bwangu pa kulongana pa kutila babe ica kumwenako ku bana. Ifwe bonse ukubikako fye na bana besu, lekeni tulebangilila pa kulongana pa kuti tuleimininako ukuteyanya bwino. Nga tulebangilila ku kulongana ninshi tulekonka na mashiwi Paulo alandile aya kuti: “Tatucita nangu cimo icingapunwisha bambi, pa kuti abantu beba na pa kusangila ifilubo mu mulimo wesu; lelo muli fyonse tulanga ukuti tuli babomfi ba kwa Lesa.”—2 Kor. 6:3, 4.