Mwilacelwa
1. Bushe Yehova alacelwa?
1 Yehova tacelwa pa kucita ifintu. Ku ca kumwenako, alaafwa ababomfi bakwe ‘pa nshita balekabila ubwafwilisho.’ (Heb. 4:16) Alatusambilisha “pa nshita yalinga.” (Mat. 24:45) Kanshi tatutwishika ukuti no bushiku akonaulamo ababifi ‘tabwakacelwe.’ (Haba. 2:3) Caliwama ukuti Yehova tacelwa! (Amalu. 70:5) Fwe bantu abashapwililika, twalikwata ifingi ifya kucita, kanshi limo kuti twacelwa. Mulandu nshi ukukanacelwa kwawamina?
2. Cinshi abantu bacindikila Yehova nga tatulecelwa?
2 Muli shino nshiku sha kulekelesha, abengi balacelwa pa mulandu wa kuti bali-itemwa kabili tabailama. (2 Tim. 3:1-3) E ico Abena Kristu nga tabalecelwa ku ncito, ku kulongana e lyo na lintu bapangana ukukumana na bamo, abantu balamona kabili balacindika Yehova. (1 Pet. 2:12) Bushe tulafika bwangu pa ncito, e lyo ku kulongana na mu kushimikila kwena tulacelwa? Pa kutila tulepashanya Shifwe wa mu muulu uushicelwa, tufwile ukulafika bwangu ku kulongana pa kuti twasangwako ku lwimbo na kwi pepo lya kubalilapo.—1 Kor. 14:33, 40.
3. Mulandu nshi ukukanacelwa kulangila ukuti tulacindika bambi?
3 Nga tatulecelwa tulanga ukuti tulacindika bambi. (Fil. 2:3, 4) Ku ca kumwenako, nga tatulecelwa mu kulongana na mu kukumana pa kuya mu kushimikila, tatwakulapumfyanya bakapepa banensu. Lelo nga tulacelwa ilingi line, bambi kuti balemona kwati tutontonkanya ukuti inshita yesu e yacindama sana ukucila iya bambi. Nga tatulecelwa, abantu bambi bakulatucetekela kabili bakeshiba ukuti twalibika amano ku fya kwa Lesa, ne ci cikalenga bakatucindike.
4. Nga tulacelwa ilingi line, finshi twingacita pa kuti twilacelwa?
4 Nga mulacelwa ilingi line, mulingile ukutontonkanyapo pa cilenga. Mufwile ukutantika bwino ifya kucita pa kuti mulekwanisha ukucita icintu conse pa nshita ya ciko. (Luk. Mil. 3:1; Fil. 1:10) Mulelomba Yehova ukuti alemwafwa. (1 Yoh. 5:14) Nga tatulecelwa tukalanga ukuti tulakonka amafunde yabili ayakalamba sana, ifunde lya kutemwa Lesa ne lya kutemwa abanensu.—Mat. 22:37-39.