Ubusaka Bulacindika Lesa
1 Ifunde lya kwa Mose lyakwetemo ififwaikwa fyakosa ku kushininkisha ubusaka. Fyaimike Israele uwapaatukako nga bantu abalefwaikwa ukuisunga abene aba busaka lwa ku mubili na lwa ku mupashi. (Lebi 11:35, 36; 15:1-11; Esa. 52:11) Iyi mibele ya busaka yaletele umucinshi kuli Lesa kabili yalisangwilileko ku butuntulu bwa bumi ubwa luko.
2 Ilelo nalyo, ubusaka cishibilo ca bantu ba kwa Yehova. Lelo ilintu ici cishibisha abantu ba kwa Yehova nge bumba, bushe e fyo caba kuli ifwe ngo muntu umo umo? Icipimo twaba abayangwako pa lwa kupempenkana no busaka bwa pa lwesu cibelebesha ifyo tutesekesha ififwaikwa fya kwa Yehova.
3 Ni shani pa lwa mimonekele ya ŋanda yesu? Bushe ilalenga abantu ukutontonkanya bubi bubi pa lwa bukombe bwa Bufumu tusenda? Bushe kuti cacitikako ifyo bamo kuti batwishika ukufumaluka kwesu nga ca kuti tulelanda pa lwa kwalula isonde ukuba paradise ilintu iŋanda yesu ya busanku no lubansa lwaisulamo ifyani fyabulo kukwempa nelyo ulwasapilwa? Nga ca kuti iŋanda yesu imoneka iya cimfulumfulu nelyo ukununka akashela pa mulandu wa fibelesho fyabulo busaka, bushe kuti casoswa ifyo twalilundulula “ifipasho fya busaka ifikalinga mu kuba [ne calo cipya] pe samba lya Bufumu bwa kwa Lesa”?—om-CW amabu. 130-1.
4 Ni shani pa lwa motoka tubomfya ku mulimo wa mwi bala? Bushe yaliba iya busaka mu kulinga, mu kati na ku nse, pa kuti imimonekele ya iko tailepumbula ukufuma ku mulimo wesu? Ni shani pa lwa fya kufwala fyesu, icola ca fitabo, ne misakwile ya pa lwesu? Bushe ya busaka kabili iyapempenkana, ukukanapeela umulandu wa kuipunwinapo? Calibamo ukupelulula ukuisunga fwe bene ne fya kufwala fyesu aba busaka pa kusamba lyonse no kufwala ifyacapwa no kuciiswa.—w89-CW 6/1 amabu. 16-19.
5 Ni shani nga ca kuti munyina ailekelesha ica kuti ubusaka bwa pa lwakwe nelyo ifyashingulukako fyaba fya kuleta umuseebanya ku cilonganino? Napamo alekabila fye ukwaafwa kwabamo ukutemwa pa mulandu wa mushinku nelyo ukulwala. Nga ni fyo, kuti caba cikuuku ukumwaafwa. Umbi kuti aba ne mpika kabili uushaibukila pa lwa cene; ukukonkomesha kwa cikuuku kuti pambi kwamucincisha ukuwamya imibele. Abantu abo lyonse abemika ica kumwenako cabipa muli uku kuloshako te kuti bafikepo ku mashuko yakalamba mu cilonganino. Kwena, baeluda balingile ukuibaka ukukanapampamika ifipimo fya pa lwabo nelyo ifyo batemwa.
6 Abalesekelela abapya balalaalikwa ukuipakisha umutebeto wa ku mupashi ku Ŋanda yesu iya Bufumu. Ilingi line, tulaba abaswatuka ukutambulula ubwite pantu Iŋanda ya Bufumu yaliba iya kucebusha kabili iyapempenkana. Cifwaya ukubomba, nangula ni fyo, ku kuisungilila muli iyo nshila. Lolesheni ukushinguluka Iŋanda yenu iya Bufumu. Bushe imipando, pa nshi, ne fibumba fili ifya busaka? Bushe ifimbusu filakolopwa lyonse? Lintu twabelesha ukulolesha pa filindi ne milale pa nshi nelyo ifibumba fikwete penti ilekokoboka, mu kwangufyanya kuti twatendeka ukumona ico nge cili fye bwino. Nangu cibe fyo, abeni abaletandala pa muku wa kubalilapo kuti pambi baya ne mimwene yabipa. Tulingile ukucita apo twingapesha ku kusungilila Iŋanda ya Bufumu iya busaka kabili iya kucebusha, ukubomba ulubali lwesu lintu inshita yaisa iya kupyanga nelyo ukuwamya.
7 Ukwabula ukusosa icebo icili conse, kuti twacindika Lesa ku mimonekele ya pa lwesu no kupempenkana kwa mayanda yesu, bamotoka, na Mayanda ya Bufumu. Ica kumwenako cesu icisuma tacakalenge ukupunwisha ukuli konse lelo cikekalilo bunte ukuti ukupepa kwesu kwa busaka kabili ukwatambalala.—1 Kor. 10:31, 32; Yako. 1:27.