Bushe Uletanda mu Kufusha?
1 Kwalibako insoselo ya kuti: “Ukulingana na fintu wabika mu cintu cimo, e fyo fye wingafumyamo.” Ici e fyo caba maka maka mu kupepa kwesu. Ukufulilako kwa nshita no kubombesha tupoosa mu kupekanishisho kulongana, ukushimikila ubukombe bwa Bufumu, no kulango kutemwa kuli bamunyinefwe, e kufulilako tukanonka mu kukula lwa ku mupashi. Icapusanako na co e fintu caba. Nga ca kuti tulaikaanya fwe bene nelyo tuli aba mutima citika mu co tulebomba, bushe mu cine cine kuti twaenekela ifya kufumamo fya kwikusha?
2 Umutumwa Paulo alondolwele bwino icishinte pali 2 Abena Korinti 9:6 ukuti: “Uutanda aleceefya, akaseepe fyaceepa; kabili uutanda alefusha, akaseepe fyafula.” Bushe uletanda mu kufusha?
3 Isambililo lya Baibolo Ilya pa Lobe: Pa kuba abatumikishi basandulula, intanshi tufwile ukutanda mu kufusha mwi sambililo lya pa lwesu. Tulingile ukukwata insala ya ku mupashi iyaswatuka. (Amalu. 119:97, 105; Mat. 5:3) Mu kuba na masakamika yonse aya bumi bwa cila bushiku ukututitikisha, cisendako ukubombesha kwasakamanishisha ku kulundulula ukwibukila kwa cine cine ukwa kukabila kwesu ukwa ku mupashi. Ku bengi aba ifwe, cifwaya ‘ukulubule nshita.’ (Efes. 5:16) Bamo balatantika ukushibuka mu kubangililako pa nshiku shimo ku kucita isambililo lya pa lwabo. Bambi balibikako pa mbali ifyungulo bushiku fimo kuli iyo mifwaile. Ni mu nshila nshi tuseepela mu kufusha? Tulanonka icitetekelo cakoselako, isubilo lyabembela, no muntontonkanya wacilapo kuba uwa nsansa kabili uwashininkishiwa.—Rom. 10:17; 15:4; 1 Pet. 1:13.
4 Ukulongana kwa Cilonganino: Pa Ilumbo 122:1, Davidi atile: “Nasaminwe ilyo basosele kuli ine, abati, Tuleya ku ŋanda ya kwa Yehova.” Bushe uyumfwa mu nshila imo ine? Ukutanda mu kufusha kupilibula ukusangwa lyonse ku kulongana kwesu kusano ukwa cila mulungu. Pingulapo mu muntontonkanya obe ukuti tauli na kusuminisha imicele yabipa ukucilima. Ilingi line, lintu twacimfya ifipindami fyafulilako, e lintu amapaalo yesu yafulilako.
5 Fika mu kubangilila kabili shingashingako pa numa ku kwakana na bamunonko mu kulanshanya kwa kukuulilila. Kushako ukubishanya kobe ku kusanshamo abapusanapusana abengi ukufika apo wingapesha. Pekanishisha Isambililo lya Ulupungu lwa kwa Kalinda bwino no kulongana kumbi pa kuti wingatanda mu kufusha pa kwasukapo ilyo wakwata ishuko lya mu nshita. Pa ‘kunwensha’ bambi pa kulongana, na iwe wine ‘ukanwenshiwa.’—Amapi. 11:25.
6 Ubutumikishi bwa mwi Bala: Nakalimo takuli ukuli konse kumbi uko ici cishinte ca kutanda mu kufusha cacilapo ukuba ica cine nga mu butumikishi bwa mwi bala. Ilyo twapeeleshako inshita yafulilako kuli bwene, e lintu mu kupalishako tuli no kulobolola ifya kukumanya fya kusekesha ifyafulilako, ifipempu fya kubwelelamo ifyabamo ifisabo, na masambililo ya Baibolo ayalunduluka.
7 Ukutanda mu kufusha mu butumikishi bwa mwi bala kubimbamo imibele capamo no bwingi. Ica kwaafwa cawamisha mu kutwafwilisha ukuwamyako imibele ya butumikishi bwesu caba citabo ca Ukupelulula. Amabula 9-15 yatantika imitendekele ukucila pali 40 ukufimba imitwe 18 ku kwaafwa ukwimya ubuseko pa minshi. Nga ca kuti wasanga ubuseko, ba uwashininkisha ukulemba pa kuti wingabwelelako no kuseepa ifisabo fya kutanda kobe. Mu kubamo isubilo ukubombesha kobe kukatungulula kwi sambililo lya Baibolo, kabili kuti wasambilishako umuntu umbi ifya kutanda mu kufusha.
8 Nga ca kuti twatanda mu kufusha, kuti twaenekela amapaalo yafulilako ukufuma kuli Yehova.—Mal. 3:10.