Ukutanda mu Kufusha Kulaleta Amapaalo Ayengi
1 Ifwe bonse tulolela ukufikilishiwa kwa malayo yakalamba ayaba mu Cebo ca kwa Lesa. Na lelo line, Yehova alatupaala nga nshi icilenga imikalile yesu ukuwama. Lelo, pa kuti tumwenemo pa lwesu, tulekabila ukubombesha. E fyo no mutumwa Paulo asosele ukuti, “uutanda alefusha, akaseepe fyafula.” (2 Kor. 9:6) Natulandeko pa mbali shibili umo aya mashiwi yabomba.
2 Ubutumikishi Bwesu: Ukwebako abantu imbila nsuma ilyo cili mu maka yesu ukucitilo bunte kulaleta ifilambu ifingi. (Amapi. 3:27, 28) Iciweme ca kutila abengi baletanda mu kufusha lintu balundako imibombele yabo mu butumikishi, ukubikapo fye na bupainiya bwa kwaafwilisha nelyo ubwa nshita yonse. Ifwe bonse kuti twatanda mu kufusha ilyo tuleyangwa ukubwelela ku balefwaya ukusambilila, ukubakoselesha no kubatambika isambililo lya Baibolo lyonse ilyo ishuko lyamoneka. (Rom. 12:11) Ukubombesha kwesu muli iyi nshila kutulenga ukuba ne fya kukumanya fya kukoselesha no kusekelela ukwingi mu butumikishi bwesu.
3 Ukutungilila Ubufumu bwa kwa Lesa: Paulo alandile pa lwa ‘kutanda mu kufusha’ ilyo alelosha ku kupeela ifintu. (2 Kor. 9:6, 7, 11, 13) PaIi lelo, fingi ifyo twingacita ku mibili yesu na ku fikwatwa fyesu ku kutungilila Ubufumu bwa kwa Lesa. Kuti twayafwilishako mu makuule ya Mayanda ya Bufumu ne Fiyanda fya Kulonganinamo. Kabili kuti twaipeela ukubombako ukuwamya no kusunga bwino ishi ncende shibelapo ukupepa kwa cine. Cimbi, kuti twasangwilako indalama sha kubomfya pa cilonganino ne sha kwafwilisha umulimo wa mwi sonde lyonse uwa kushimikila pa lwa Bufumu no mulimo wa kupanga abasambi. Ilyo bonse twabombako umulimo wesu, tulasekelela nga nshi ukumona amapaalo ayengi aya kwa Yehova yalefumfumukila pali uyu mulimo uwasuminishiwa na Lesa!—Mal. 3:10; Luka 6:38.
4 Icebo ca kwa Lesa citukonkomesha “ukucite cisuma, ukuba abacindama ku milimo isuma, ukuba abape, aba nkumbu.” Ilyo tuleumfwila uku kukonkomesha, tulaipakisha amapaalo ayengi pali nomba. Kabili, ‘tulaitutile fyuma fisuma ifya bwikashi ubukesa, ukuti tukekate ku mweo uwabo mweo wine wine’ uukesa.—1 Tim. 6:18, 19.