Ishiba Bwino Bamunonko
1 Ukwampana kwesu na bakapepa banensu kusanshamo icacila pa kusangwa fye na bene ku kulongana pa Ŋanda ya Bufumu. Twaba bakacita ba kufwaya kwa kwa Lesa, kabili ico cilatuleta mu kwampana kwa ku mupashi na Yesu. (Marko 3:34, 35) Ico, mu kukonkapo, cituleta mu kwampana no lupwa lwa ku mupashi pamo na bambi mu cilonganino ca Bwina Kristu, bamunyinefwe ba ku mupashi ne nkashi, abo twakambishiwa ukutemwa. (Yoh. 13:35) Muli fyo, abo ababishanya na “aba mu ŋanda ya kwa Lesa,” balingile ukutukuta ukwishibana bwino.—Efes. 2:19.
2 Ishiba Bamunonko mwi Shina: Bushe walishiba amashina ya bamunyina ne nkashi bonse mwi Sambililo lyobe ilya Citabo pa Cilonganino? Ilingi line ibumba liba ilinono, ukucilenga ukuba icayangukisha ukwishiba amashina yonse, nga te ifyo ukwishiba ayafulilako, aya basangwako. Nga ca kuti tawaishiba fye na mashina yabo, bushe kuti wasosa ukuti walibeshiba bwino?
3 Ni shani pa lwa kwishiba bambi, ukusanshako abana banono, abasangwa ku kulongana pa Ŋanda ya Bufumu? Kuti pambi twaba abakongamina ku kubishanya na kalibumba fye kanono aka fibusa. Ilintu tacaba icalubana ukuipakisha ukubishanya kwa lyonse na bantu bamo bene, tatwingafwaya ukupelesha ukuposha kwa cikabilila no kulanshanya kwa kukuulilila ku banono fye. Tulingile ‘ukukushako,’ ukubikako ukubombesha ukufika ku kwishiba bwino bamunyinefwe ne nkashi bonse. (2 Kor. 6:11-13) Ico ukwabula ukutwishika cikasanshamo ukwishiba bene mwi shina.
4 Bamunyina abatungulula ukulongana kwa cilonganino balingile ukwesha ukwishiba amashina ya bonse abasangwako. Ukwita umo na umo mwi shina ukufuma pa cisebele kubalenga ukuyumfwa ukuti ifyasuko fyabo filatashiwa, kabili pa nshita imo ine, cilaafwa bambi ukwishiba amashina yabo. Kwena, lyonse kukabako abapya nelyo abatandashi mwi bumba, ukulenga cene icayafya ku uuli onse ukwishiba ishina ilili lyonse. Nangu ni fyo, ukubombesha kwafumaluka ukwatwalilila kwaba kwa kukoselesha kuli bambi kabili kubelebesha ubuseko bwa cine cine muli bene.—Rom. 1:11, 12.
5 Buula Ukuitendekelako ku Kwishibikwa Bwino: Bakangalila benda ilingi line balaba na maka ya kwishibana ne mpendwa ikalamba iya bamunyina ne nkashi. Ni shani fintu bacite ci? Mu nshila shikalamba shitatu: (1) Lyonse balabomba na bene mu mulimo wa mwi bala; (2) ilyo imibele yabo yasuminisha, balasumina ubwite bwa kubatandalila mu mayanda yabo; na (3) balabuula ukuitendekelako ku kuposha bonse abakalamba na banono pa kulongana.
6 Bushe kuti wasangako inshila sha kukushako mu kubishanya kobe no kwishiba bamunonko mu kuwaminako? Mu cine cine kuti twalaalikako bambi ukuya na ifwe mu mulimo wa mwi bala. Ukuya ku ŋanda ne ŋanda, ukucita ifipempu fya kubwelelamo, ukuya ku masambililo ya Baibolo, nelyo ukucitilo bunte bwa mu musebo mu kuba na bamagazini shonse shaba ni nshila shawamisha isha kwishibaninamo bwino. Na kabili caliba icisuma ukulaalika bambi ukutandala ku mobe, nakalimo ukwakana ica kulya nelyo utwa kupembesula twayanguka mu tushita mu tushita. Ukubuula ukuitendekelako ukutununuka abapya nelyo abo abakongamina ku kuba aba nsoni takucita fye ifyafulilako ukukuulilila bene lwa ku mupashi lelo na kabili kulaletako ifilambu fyafumba.—Imil. 20:35; 1 Tes. 5:11.
7 Paulo alishibe bwino bamunyina. Ukuloshako kwakwe ku bengi aba bene pa lwabo mwi shina muli bakalata bakwe cali bushinino bwa buseko bwakwe ubwabula akaso muli bene no kutemwa kwakwe ukwa cine cine kuli bene. (1 Tes. 2:17; 2 Tim. 4:19, 20) Ukubombesha kwesu ku kwishiba bwino bamunyinefwe kukapilibula amapaalo kuli ifwe bonse.