Bushe Kuti Wailunda Cipya Cipya ku Mitande?

¹ Mu kati ka myaka yapitapo isano, imyanda ya bapainiya ba nshita yonse bacisangile icakabilwa ukusha imitande ya bupainiya. Bushe wali umo uwa bene? Nga ni fyo, ukwabulo kutwishika walikwete umulandu wa kushila ili shuko. Nakalimo cali cintu cimo icishaenekelwe kabili icacilile pa kulama kobe. Bushe uyo mulandu ucili e po waba? Nga ca kuti ubutuntulu bwa bumi, impika sha fya ndalama, nelyo ukukakililwako kwa lupwa fyalengele cene ukuba icakabilwa kuli iwe ukuleka, bushe imibele yobe yaliwaminako? Bushe kuti wacitako kuteuluka kwakondenkana uko kwingakusuminisha ukuipakisha amapaalo ya bupainiya bwa nshita yonse na kabili? Bushe walitontonkanyapo ulwa kwipusha cipya cipya?

² Nga fintu waishiba, ukuteyanya kusuma ne mitantikile yasakamanisha filafwaikwa nga ca kuti uli no kutunguluka nga painiya. Ilintu ilingi line takubako inshita ikalamba iya kukokoloka, ifiputulwa fya nshita ifipi ifya kwa painiya ifya kukokoloka ilingi line filashinina ukuba ifyacilapo kwikusha kabili ifya kulambula. (Amapi. 19:17; Imil. 20:35, NW) Pa kuba uwapamfiwa mu mulimo, ulacingililwa ukufuma ku kusonga kwa nshila ya bumi bwa kuitemuna, ubwa kucibondola iikonkelelwa ne calo. Yehova alilaya ukuti akakucindamika lwa ku mupashi nga ca kuti waipeela bulilambo no kubika amabuseko ya Bufumu pa ntanshi. Mu kushininkisha ukakumanya ubuseko bwa cine cine no kwikushiwa pa kuba uwa mutima onse mu mulimo wa kwa Yehova.—Amapi. 10:22; Kol. 3:23, 24.

³ Bushe ubutumikishi bwa nshita yonse bulingile ukumonwa nge shuko lyaisuka fye ku banono abaibela? Iyo. Mu cilolwa ca mulapo wesu uwa kuipeela, Umwina Kristu uuli onse alingile ukupeela ukulanguluka kwakatama ku mulimo wa nshita yonse kano fye nga ca kuti imibele yacilenga ukuba icishingacitikako.—Marko 12:30.

⁴ Nga ca kuti ubutuntulu bobe ubwa bumi ne fishingamo fya mu Malembo mu kumonekesha tafikusuminisha ukucita bupainiya pali nomba, kuti waebekeshiwa ukuti Yehova alishiba kabili alomfwikisha. Akakulambula pali bucishinka bobe mu cintu imibele yobe yasuminisha. (1 Kor. 4:2; 2 Kor. 8:12) Nangu ni fyo, nga ca kuti pali nomba camoneka icalinga kuli iwe ukucita bupainiya na kabili, mulandu nshi te kutununukila kangalila wa kutangilila no kulomba formu?

⁵ Bushe Ulupwa Lobe Kuti Lwaafwa? Kuti pambi washiile imitande pa mulandu wa kuti wakabile ukusakamana ukukakililwako kwa lupwa. Bushe kuti cacitikako ukuti ifilundwa fimbi ifya lupwa fili mu cifulo ca kupeela ukwaafwa uko kukakusuminisha ukwingila cipya cipya mu mulimo wa bupainiya? Kuli bamo, mu kuba fye no kwaafwa kunono mu kusakamana ifishingamo fimo, bupainiya na kabili kuti bwacitwa.

⁶ Ukubombela capamo ukusuma no kubombesha kwalundwako ukunono pa lubali lwa filundwa fimbi ifya lupwa kuti kwalenga ici ukucitikako. Ukwaafwa kuti kwaba mu musango wa kwafwilisha kwa mu fya ndalama nelyo imyendele, capamo ne fipangano fya lyonse ifya kubombela capamo mu mulimo. Mu kupalishako kwalibako inshila shimbi bengafwilamo. Nga ca kuti imibele taikusuminishe ukubuula ili shuko lya mulimo na kabili, nakalimo ukwafwilisha kwa musango yo kuti kwapeelwa ku cilundwa cimbi ica lupwa uwingacite fyo.

⁷ Mulandu nshi te kulanshanishisha uyu mulandu ngo lupwa? Ifilolelo kuti fyaba ifisuma nga ca kuti mwacipanga umulimo wa lupwa lonse. Nga ca kuti painiya umbi kuti alundwako ku mitande, icinshingwa-ŋanda conse mu kulungama kuti cayumfwa ukuti baleakanamo. Umupashi wa musango yo uwa bukapekape tawakalunde fye ku bunte bwa Bufumu mu cifulo ca kubombelamo lelo na kabili ukapalamika ulupwa capamo lwa ku mupashi.—Luka 6:38; Fil. 2:2-4.