Tukalasambilila Icitabo ca Akalume ka Ukusokolola

¹ Ibula lilanda pa mutwe wa citabo ca Akalume ka Ukusokolola lyambula Ukusokolola 1:3 (NW) ukuti: “Wa nsansa uubelenga mu kupongomoka na abo abomfwa ifyebo fya busesemo ubu.” Insansa sha bantu ba kwa Yehova ilelo mu cine cine shalikushiwako ku cipimo cikalamba ku kufikilishiwa kwa muno nshiku ukwa masesemo yasangwa mwi buuku lya Baibolo ilya Ukusokolola. Ukumfwikisha kwesu ukwa pali lelo ukwa fya kucitika muli iyi nshita itwa, “ubushiku bwa kwa Shikulu,” kwalondololwa mu Ukusokolola—Akalume ka Kuko Kakalamba Nakapalama! (Ukus. 1:10) Ukupitila mu kusambilila cene, tulanonka ukushilimuka mu fya kuponako fya calo ifyabamo bupilibulo, ukucilisha ifyo fibimbamo ubuteko bwa calo ubwa butotelo bwa bufi no kwenda kwatwalilila ukwa nko ukulola ku Armagedone capamo no kubomba kwa kwa Yehova na bantu bakwe.

² Kuli fwe bengi, ukusambilila ulu lupapulo kukanoona imimwene yesu iya ku mupashi iya fya kuponako fya ndakai ifiletungulula ku bushiku bwa kwa Yehova ubwa kucimfya pa balwani bakwe bonse. Amakana abailunda ku mabumba yesu mu kati ka myaka yapitapo ibili ukufika kuli itatu mu kushininkisha bakanonkelamo mu kulanguluka icitabo ca Akalume ka Ukusokolola mwi Sambililo lya Citabo pa Cilonganino.

³ Shininkisha ukupekanya bwino, ukusangwako, no kwakanamo mu nshila yabamo bupilibulo cila mulungu, ukutampa October 3, 1994. Ukalambulwa no kupaalwa mu kufumba ilyo uleiluka mu kulengama kwacilapo ubupilibulo bwa fya kuponako fya mu calo ifilefunguluka mu lubuuto lwa busesemo bwalembwa mwi buuku lya Ukusokolola. Mu kushininkisha, tukabila ukulanguluka ifyebo fya musango yo mu kukatama, apantu fili ifyacilapo kulingana ne nshita nomba ukucila na pali kale lyonse. Shi twingaipakisha insansa shalaiwa ilyo tulebelenga, ukukutika, no kwetetula pali ubu busesemo bwa kucincimusha pa lwa nshita shesu!