Ukubomfya Broshuwa Mupya mu Kufumamo Cimo
1 Pe bungano lyesu ilya citungu ilya nomba line, twali abasekelela nga nshi ukupokelela broshuwa mupya Ilyo Untu Watemwa Afwa. Alingile ukucebusha abantu ukufuma ku misango yonse iya bumi, apantu abengi nga nshi baliba no bulanda pa lwa kulufya umutemwikwa. Ifikope fya uko ifya kucebusha ne filangililo filingile ukucilenga icayanguka ukushalika wene. Pe bula 29 icikope camonekesha ica kwa Lasaro alebuushiwa ukufuma ku bafwa cilangisha “ukufwaisha . . . kwaluma ukwa kufumyapo ukupumpunta kwa mfwa” ukwa kwa Yesu. Icikope cakonkapo icakumana fye ibula lyonse cilangilila ukumoneka kwabamo buseko ukwa kubuuka mu calo cipya. Fintu ici cilingile ukukafya imitima ya abo ababa no bulanda!
2 Uyu broshuwa kuti aba wa kwaafwa nga nshi mu kusansamusha abafwilwa. Apangwa mu nshila yabamo kulanshanya. Ifipusho fya kuletako ifishinka fikalamba fimoneka mu mukululo pa mpela ya ciputulwa cimo na cimo mu cifulo ca kuba pe samba lye bula limo na limo. Kuti wabomfya ifi “Ifipusho fya Kwetetulapo” mu nshila iili yonse uleyumfwilamo ukuti ikaba iyacilishapo kuba iya kwaafwa ku musambi obe.
3 Lintu uletandala, ba uusalulula mu kulanda pa fishinka ifyo fisangwa muli broshuwa. Kuti pambi wayumfwa ifyo kuti caba icalinga ukulangisha umutande wa filimo pe bula 2 no kwipusha mwine ŋanda ukusontapo uwamusekesha. Ba uwaibukila pa lwa kukabila kwa muntu umo umo. Leka alumbulule ukuyumfwa kwakwe, kabili lyene langisha fintu broshuwa itambika icisansamushi. Iciputulwa cimo na cimo cilabomfya amalembo ya Baibolo ayafulilako ayo yapayanya icishinte ce subilo lyesu.
4 Akamutwe kanono pe bula 5, “Kwaliba Isubilo Ilituntulu,” kebekesha isubilo lya kusansamusha ku bafwa ilyashimpwa pali Baibolo. Ici cilingile ukubalamuna ukufwaisha kwa kulanshanya “Isubilo Lyashininkishiwa Ilya Bafwa,” ilisangwa pa mabula 26-31. Umukululo pe bula 27 upayanya “Amalembo Ayo Yasansamusha” ayalundwako. Mwine ŋanda ali no bulanda mu kwangufyanya akamona ukuti Yehova mu cine cine ni “Lesa wa cisansamushi conse.”—2 Kor. 1:3-7.
5 Mu nshila yabamo mucenjelo, ifiputulwa fyakonkana fifimba ukwankulako kwapusanapusana ku mfwa ya mutemwikwa. Filanga ifya kubomba no bulanda na fintu bambi bengaafwa mu nshita sha musango yo isha kubombomanika. Pe bula 25 palibapo umukululo uwakwato mutwe wa kuti “Ifya Kwaafwa Abana Ukubomba ne Mfwa.” Uyu ulingile ukuba ica kwaafwa ca cine cine ku bafyashi abali no kubomba ne iyi mpika.
6 Kwata kope walundwako mupepi, kabili bomfya wene ku bunte bwa mu lyashi. Kuti pambi wafwaya ukutandalila amayanda ya fililo aya cikaya mu cifulo cobe ica kubombelamo ku kumona nga kuti batemwa ukukwatako amakope mupepi ku kusansamusha indupwa shafwilwa. Nelyo mu mucenjelo kuti watununuka abali no bulanda mu nshishi pa tushita lintu babwelela ku kutandalila inshishi ya mutemwikwa.
7 Tulasekelela ukuti Yehova ni Lesa uwaba “kasansamusha wa balanda.” (2 Kor. 7:6) Tucipenda ukuba ishuko ukwakana mu ‘kusansamusha aba baloosha.’—Esa. 61:2.