Umukululo Wa Cipusho

◼ Fitabo nshi fintu tulingile ukusenda ku kulongana?

Cila mulungu tulapokelela ukufunda kwa kunonsha no kukoselesha pa kulongana kwa cilonganino. (Esa. 48:17; Heb. 10:24, 25) Nangu cibe fyo, ubwingi bwa fyo tumwenamo bushintilila nga nshi pa kuipekanya kwesu.

Kuti cawama icilundwa cimo na cimo ica lupwa ukukwata ifitabo fya kusambililamo ifya pa lwakwe ne fitabo fimbi ifikabilwa ukubomfiwa mu kulongana. Ici cilesanshamo Baibolo, icitabo ca nyimbo, impapulo shilesambililwamo, notibuku, na bopeni nelyo pensulo.

Mu kulongana kwe Isukulu lya Butumikishi bwa Teokrasi, Ukutantika kwe Sukulu lya Butumikishi bwa Teokratiki ne Citabo ca Kutungulule Sukulu lya Butumikishi bwa Teokratiki filakabilwa. Ishi mpapulo shitwaafwo ukwibukisha imitwe ya malyashi ya basambi ayalepeelwa no kukonka kangalila we sukulu lintu alefunda. Kuti twabomfya ukufunda pa lwesu ne mitubululo pa kuti twingawamyako amalyashi yesu yene ne mipeelele ya mu mulimo wa mwi bala. Ukutula mu January, amalyashi ya kufunda yonse yafuma mu citabo ca “Amalembo Yonse Yantu Yapuutwamo Kuli Lesa, Kabili ya Kunonsha.” Kuti cawama icilundwa ca lupwa cimo na cimo ukusenda kope wa pa lwakwe; pa kuti engalaloshako.

Mu Ukulongana kwa Mulimo, tukabila ukukwata Ubutumikishi Bwesu Ubwa Bufumu ubwa ndakai ne citabo ca Ukupelulula. Senda ne mpapulo shonse isho balayaloshako mu kulongana, pamo nga ifitabo fyalayabomfiwa mu filangililo fyalayacitwa. Baeluda balingile ukukwata icitabo ca Abateyanishiwa ku Kupwilikisha Ubutumikishi Bwesu.

Abafyashi balingile ukutukuta ukusungilila abana babo mu mutalalila no kukutikisha pa kulongana kwa cilonganino. Ukubapayanishisha bamagazini ba pa lwabo aba Ulupungu lwa kwa Kalinda ne mpapulo shimbi, nangu cingati tabalaishiba ukubelenga, kulabakoselesha ukulundulula ubuseko. Lintu abacaice basambilishiwa ukucindika impapulo sha teokrasi no kushibomfya, balakwata ifibelesho fisuma, ifya ku mupashi ifyo batwalilila ukuba na fyo ubumi bwabo bonse.

Ubuseko no kwikushiwa ifyo tufumya mu kulongana kwa cilonganino filakulilako apakalamba lintu twaya ku kulongana abaipangasha bwino. (2 Tim. 3:17) Iyi e nshila yawamisha iya kushininkishishamo ukuti ‘natwisulamo ukwishibo kufwaya [kwa kwa Lesa] mu mano yonse no mucetekanya ifya bumupashi.’—Kol. 1:9.