Ba Uukuulilila
1 Apo tuleikala mu “nshita ishayafya,” ifwe bonse tulekabila ukukoseleshiwa. (2 Tim. 3:1) Pa kuba uwaibukila mu kuswatuka pa lwa uku kukabila nangu fye ni mu kasuba kakwe, Paulo aali uwayangwako ukubomfya inshita shonse shintu alebishanya na bamunyina pamo nga amashuko ya mu nshita aya ‘kusansamushiwa pamo.’ Acincishe bamunyina “[ukukonke] fya . . . kukuulana.” (Rom. 1:11, 12; 14:19) Uku kubombesha kwalitungulwike mu “[kukoseleshe] mitima ya basambi, [ukubakonkomesha] ukwikalilila mu citetekelo.” (Imil. 14:22) Tulakabila apakalamba nga nshi ulya musango wa kukoselesha ilelo.
2 Kuti twaba aba kukuulilila kuli bambi ku cintu tusosa. Lintu yabomfiwa bwino, amashiwi yesu kuti yaba “nga ’maapele ya golde mu fipe ifyacekwa fya silfere.” (Amapi. 25:11) Pa kwakana mu kulongana, ‘tulakonkomeshanya.’ (Heb. 10:25) Ululimi lwesu kuti lwabomfiwa mu nshila yashininkishiwa lintu tuleakana ifya kukumanya, ukutasha umo, nelyo ukulanshanya imilandu ya ku mupashi. Ukubomfya ululimi ukwawama ukwa musango yo ‘kwaliwama ku kukuula icilingene no kukabila, ukupeela ukusenamina ku baleumfwa.’—Efes. 4:29.
3 Landa pa Fintu fya Kukuula: Pa Abena Filipi 4:8, Paulo apeele ifya kutungulula fya kwaafwa mu milandile yesu. Atile tulingile ukutontonkanya fyonse ifya cine, ifya mucinshi, fyonse ifya bulungami, ifya musangwela, ifyayemba, ifya mutembo, ifya busuma, ne fya kutasha. Kuti lyonse twashininkisho kuti cintu tusosa cili ca cine kabili ica kunonsha kuli bambi nga ca kuti cishimpilwe pa Cebo ca kwa Lesa. (Yoh. 17:17) Ukuipeela kwesu ukwa Bwina Kristu, cintu tusambilila pa kulongana kwa cilonganino, inshila tupwilikishishamo ubutumikishi bwesu, ne milandu imbi iya musango yo fyaba e fintu fya mucinshi. Ukulanshanya kwashininkishiwa pa lwa fipimo ne fishinte fya mu Cebo ca kwa Lesa mu kushininkisha fikatwaafwa ukuba ‘aba mano ukulola ku kupusuka.’ (2 Tim. 3:15) Kuti twalumbulula ukutasha pa myendele ya musangwela iibeleshiwa na bo ababa mu kuteyanya kwasanguluka ukwa kwa Yehova. Kuti twatonda imilimo ya mutembo iya cikuuku iicitwa na bamunyinefwe. (Yoh. 13:34, 35) Ifya kutasha fisanshamo imibele yawama iya Bwina Kristu iya citetekelo, ukusekelela, umutende, no kutekanya iyo tumona muli bamunyina. Ukulanshanya pa lwa fintu fyawama ifya musango yo ne fya kutasha ‘kusuma ku kukuula’ bambi.—Rom. 15:2.
4 Cila kasuba, tulalolenkana na masakamika ayafuupula aya mu calo. Fintu ciba ica kupembesula ukubika aya masakamika pa mbali no kukwatako ukubishanya kwabamo kutemwa na bamunyinefwe! Inshita ya mutengo iyo tuba na maka ya kwikala capamo iba cuma icili no kuteeswa. Nga ca kuti lyonse twaliba aba kukoselesha kabili abakuulilila, bambi mu cine cine bakalanda ulwa ifwe ukuti: “Bapembulo mutima wandi.”—1 Kor. 16:18.