“Ukutetekela Kufuma ku Caumfwika”
1 Lintu twasanga umo ‘uwasontelwa ku kuya mu mweo wa muyayaya,’ cili icakabilwa ukukosha icitetekelo ca uyo muntu mu cintu aumfwa. (Imil. 13:48; Rom. 10:17) Pa kupwishishisha ici, tulingile ukukonkelela uko twashile bamagazini pa kubwelelako ku kutwala bamagazini ba nomba line no kulanshanya ifyafulilako na bantu. Ukulembesha na ko kwine kuti kwatambikwa. Nangu cibe fyo, ibukisha ubuyo bwa kutendeka isambililo mu citabo ca Ukwishiba Uko Kutungulula ku Mweo wa Muyayaya. Pano palipo imitubululo iyo ingaba iya kwaafwa:
2 Lintu ulebwelela ku muntu walanshenye nankwe icipande “Lumbanyeni Imfumu ya Muyayaya!,” kuti watendeka muli iyi nshila:
◼ “Lintu twalanshenye umuku wafumako, twapitulwike mu bushinino bushaikulila ubo bushinina ukuti kwalibako Lesa Wa maka yonse. Nangu cibe fyo, ukwibukila fye ukuti e ko aba tacakumanina. Tulekabila ukwishiba ishina lyakwe. Lishina nshi mubomfya pa kwita Lesa? [Leka asuke.] Amamilioni ya bantu bamwita fye ukuti ‘Shikulu’ nelyo ‘Lesa,’ ayaba malumbo fye. Mu kulundapo, afwaya ukuti tumwishibile kwi shina lyakwe. [Belenga Ilumbo 83:18.] Baibolo ilatweba ifingi pa lwa kwa Yehova Lesa, nga fintu calondololwa muli ici citabo.” Langisha icikope pe bula 29 ilya citabo ca Ukwishiba, kabili belenga amashiwi yali pali ico cikope. Pa numa mwalanshanya amaparagrafu ya kubalilapo yatatu mu cipandwa 3, ukaba nautendeka isambililo!
3 Kuli abo mwalandileko pa lwa cipande “Umulandu Imipepele ya ku Calo Ikapwila,” kuti napamo wafwaya ukukonkelela ubuseko pa kusoso kuti:
◼ “Pa numa ya kubelenga icipande, mufwile mwalicebushiwe ne cishinka ca kuti te kuti tumone ukupepa konse mu nshila imo ine. Konse kubili ukupepa kwa cine no kwa bufi e ko kwaba. Ici cileimya icipusho ca mano, Kupepa kwa bani Lesa apokelela? Icasuko capeelwe na Yesu, kabili calikomailwapo muli ici citabo.” Alukila ku cipandwa 5 mu citabo ca Ukwishiba kabili belenga paragrafu 4, ukusanshako na Yohane 4:23, 24. Lyene ipusha auti, “Bushe kuti mwatemwa ukupokelela isambililo lya Baibolo ilya pa ŋanda ilya pa fye?” Nga ca kuti asumina, alukila ku cipandwa 1 no kutendeka isambililo.
4 Nga ca kuti umuntu alisekelele muli “Awake!” wa April 22, lintu wabwelelako napamo kuti waesha iyi nshila ku kutendeka isambililo mu citabo ca “Ukwishiba”:
◼ “Napamo muleibukisha ukuti twalilanshenye pa lwa kwenekela kwesu ukwa kumona icalo icabulamo inkondo mu kupelako. Cili icakosa ukwelenganya fintu ico mu cituntulu cingaba. Moneni fintu uulenga umo aelengenye cene. [Langa icikope pa mabula 188-9 mu citabo ca Ukwishiba.] Bushe te kuti cibe ica buseko ukuba na maka ya kuipakisha iyi mikalile? [Alukila ku mabula 4-5, langa icikope, kabili belenga umukululo.] Umutwe wa ici citabo walipalana na mashiwi ya kwa Yesu ayasangwa pali Yohane 17:3. [Belenga.] Kuti natemwa ukulangilila fintu ici citabo cingabomfiwa pamo na Baibolo wenu ku kusanga uko kwishiba kupususha ubumi.” Nga ca kuti mwine ŋanda natemwa, tendeka isambililo mu cipandwa ca kubalilapo.
5 Nga ca kuti walandile no muntu uwali uwapamfiwa lintu watandele mu kutendekelako, kuti wasosa ifi lintu wabwelelako:
◼ “Nalimutandalile nshita ya nomba line kabili namushilile bamagazini ba Ulupungu lwa kwa Kalinda na Loleni! Aba bamagazini balundulula umucinshi muli Baibolo no butungulushi bwa iko ubwa mibele. Pa mulandu wa kuti ntontonkanya ukuti calikatama ku uuli onse ukumfwikisha Icebo ca kwa Lesa, nabwela pa kuti mulangeko icintu cimo ico cikamwaafwa ukucita ifyo.” Langa icitabo ca Ukwishiba, kabili sonta ku filimo pe bula 3. Ipusha icipandwa ico mwine ŋanda atemenwe nga nshi, alukila kuli cene, kabili tendeka isambililo.
6 Ubuseko bwesu bukakula nga ca kuti twaba na maka ya ‘kwiswila bambi umwinshi wa citetekelo’ uutungulula ku mweo wa muyayaya.—Imil. 14:27; Yoh. 17:3.