Ukwananya Ukwishiba Uko Kutungulula ku Mweo wa Muyayaya
1 Yehova e ‘usambilisha abantu ukwishiba.’ (Ilu. 94:10) Abomfya ifwe ku kwananya ukwishiba kupususha ubumi pa lwa wene kuli abo abashaibukila pa lwa fya kumubombela mu nshila yapokelelwa. Icitabo ca Ukwishiba Uko Kutungulula ku Mweo wa Muyayaya caba cibombelo ca kusambililamo icishaiwamina umo aba mitima ya bufumacumi benganonka ukumfwikisha Lesa mu Cebo cakwe icalembwa, Baibolo. (1 Tim. 2:3, 4) Ukulundulula kwa cine ukwaumfwika kabili ukwalondololwa bwino mu citabo ca Ukwishiba kukaafwa abantu ukumfwikisha cintu Yehova alefwaya ukubasambilisha. Uno mweshi tulefwaya ukusansha abantu mu kulanshanya uko kukabalenga ukufwaya ukubelenga ici citabo. Pano palipo imitubululo. Ukucila ukulasungila iyi mitubululo ku mutwe, esheni ukulumbulula imfundo shapulamo mu mashiwi yenu fye kabili inshila ya kulanshanya iya cifyalilwa.
2 Apantu abantu abengi balilufyapo umutemwikwa wabo mu mfwa, kuti mwasanshamo isubilo lya kubuuka mu kulanshanya intanshi pa kusosa icapala ifi:
◼ “Fwe bengi twalilufyapo umutemwikwa wesu mu mfwa. Bushe mwalitwishikapo nampo nga mukamona uyo muntu na kabili? [Lekeni basuke.] Imfwa tayali mu mifwaile ya kwa Lesa iya kutendekelako ku muntu. Yesu ashininkishe ukuti abatemwikwa besu kuti bapokololwa ukufuma mu mfwa. [Belengeni Yohane 11:11, 25, 44.] Nangu cingati ici cacitike imyanda ya myaka iingi iyapitapo, cilangilila cintu Lesa alaya ukutucitila. [Isuleni icitabo ca Ukwishiba pa cikope cili pe bula 85 no kubelenga amashiwi yalipo. Lyene langeni icikope pe bula 86 no kulandapo.] Nga mwingatemwa ukubelenga ifyalundwapo pa lwa ili subilo lya kusansamusha ilya kubuushiwa, kuti natemwa ukumushiila ici citabo pa musangulo wa K1,000.00.”
3 Pa numa ya kulanshanya kwa kubalilapo pa lwe subilo lya kubuushiwa, kuti mwatendeka ukulanshanya kukonkelepo no muntu umo wine muli iyi nshila:
◼ “Kuti mwaibukisha ilyo natile imfwa tayali mu mifwaile ya kwa Lesa iya kutendekelako ku muntu. Nga ca kuti ico ca cine, mulandu nshi tukotela no kufwa? Bafulwe bamo balekala aba mweo pa myaka ukucila 100, kabili kwalibako imiti iyo yatwalilila pa makana ya myaka. Mulandu nshi abantunse bekalila fye imyaka 70 nelyo 80? [Lekeni basuke.] Tulafwa pa mulandu wa kuti abantunse ba kubalilapo babili tabaumfwilile Lesa.” Belengeni Abena Roma 5:12. Isuleni pe bula 53 mu citabo ca Ukwishiba no kubelenga umutwe wa cipandwa. Lanshanyeni amaparagrafu ya kubalilapo yatatu, ukulondolola ifyasuko ku fipusho fyalembwa mu citabo. Panganeni ukubwelelako pa numa ku kuyapwisha icipandwa conse. Pali ino nshita, koselesheni uyo muntu ukupwisha ukubelenga cene.
4 Nga ca kuti mwalanda no muntu uulemoneka ukuba uwa mapepo, nakalimo kuti mwatila:
◼ “Mu cine cine kwabako imipepele yapusanapusana imyanda iingi ilelo. Iyi mipepele isambilisha imisango yalekanalekana iya fisumino fipinkana. Abantu bamo batila imipepele yonse isuma kabili te mulandu na cintu wasumina. Bushe mutontonkanyapo shani? [Lekeni basuke.] Yesu asambilishe imipepele ya cine kabili alangile ukuti imisango imbi iya mipepele tayapokelelwa kuli Lesa. [Belengeni Mateo 7:21-23.] Nga tulefwaya ukutemuna Lesa, tufwile ukumupepa umwabela ukufwaya kwakwe.” Isuleni icitabo ca Ukwishiba mu cipandwa 5, belengeni umutwe, kabili londololeni utumitwe tumo tumo. Londololeni ukuti ifi fyebo kuti fyayafwa umo ukusambilila ifya kuteemuna Lesa. Tambikeni icitabo.
5 Abantu abafulunganishiwa pa mulandu wa kuti kwabako imipepele iingi nakalimo kuti batasha icasuko ca ici cipusho lintu mwabwelelako:
◼ “Mu kuba ne mipepele yapusanapusana iingi iyabako ilelo, ni shani fintu twingasanga imipepele ya cine? Cinshi mwingeshibilako? [Lekeni basuke.] Yesu atwebele ifya kwishiba abakonshi bakwe aba cine.” Belengeni Yohane 13:35. Lanshanyeni amaparagrafu 18 na 19 mu cipandwa 5 ica citabo ca Ukwishiba. Londololeni ukuti pa kubomfya ifi fya kutungulula fya mu Malembo na pa kubomfya inshila ya kubebeta no kulafumyako imipepele ya bufi, umuntu kuti aishiba imipepele ya cine. Shimikeni fintu Inte sha kwa Yehova shaishibikwa mu calo conse ku kutemwa kwabo ukwa cine cine ne fipimo fya mibele ifyasumbukisha. Londololeni fintu isambililo lya Baibolo, ukubomfya icitabo ca Ukwishiba, likeshibisha mu kumfwika ukupepa uko Lesa asuminisha.
6 Nga ca kuti mwakumanya umufyashi, iyi nshila nakalimo kuti yabomba bwino nga nshi:
◼ “Cila bushiku, tulomfwa amalyashi pa lwa myendele yapuuluka iya misepela abo bashakwata imibele isuma nangu fye panono. Abakalamba bamo bafwaya ukupeela amasukulu umulandu wa kukanasambilisha abana ubupusano bwaba pa kati ka calungama ne calubana. Ni bani muletontonkanya balingile ukupayanya uku kukansha? [Lekeni basuke.] Umfweni cintu Baibolo isosa pali ici cipusho. [Belengeni Abena Efese 6:4.] Ico ciletweba ukuti ukulimba imibele isuma mu bana caba cishingamo ca bafyashi.” Isuleni icitabo ca Ukwishiba pe bula 145, belengeni paragrafu 16, no kulanda pa cikope pe bula 147. Londololeni ukuti icitabo capekanishiwilwa ulupwa lonse ku kusambililamo. Ukubomfya amaparagrafu 17 na 18 pe bula 146, langilileni fintu tutungulula isambililo lya musango yo ku ndupwa.
7 Nga ca kuti mwatendeke isambililo pa kutandala kwa kubalilapo ku mufyashi wasakamikwa, nakalimo kuti mwatwalilila pa cipempu ca kubwelelamo pa kusosa ukuti:
◼ “Icalo ca lelo cilatuninkisha amesho ayengi pa bacaice besu. Ici cilenga ukuti cibe icayafya nga nshi kuli bene ukuba abatiina Lesa ilyo balekula. Nakalimo muleibukisha ukuti mu kulanshanya twakwete umuku wafumineko, twaimike ifishinte fibili. Pamo nga abafyashi ba bukapepa, tulekabila ukwimika ifya kumwenako fyawamisha ku bana besu, kabili tufwile ukutwalilila ukulumbulula ukuti twalibatemwa. Kuliko icintu na cimbi cintu Baibolo itila abana balekabila ukufuma ku bafyashi babo.” Belengeni Amapinda 1:8. Alukileni kwi bula 148 mu citabo ca Ukwishiba no kutwalilila ukusambilila, ukupwishishisha amaparagrafu 19-23. Tubululeni ukuti mukabwelelako na kabili ku kusambilila no lupwa lonse, ukutendekela mu cipandwa 1.