Sungeni

Imitubululo ya Kubomfya mu Mulimo wa mwi Bala

Bomfyeni imitubululo yakonkapo pa kupekanya ifyo mwakulalanda ilyo muleshalika ulupapulo tuletambika mu mweshi.

Palameni Kuli Yehova

“Abantu abengi abasumina muli Lesa balafwaya ukupalama kuli wena. Bushe mwalishiba ukutila Lesa afwaya twamupalama? [Belengeni Yakobo 4:8.] Ici citabo calembelwa ukwafwa abantu ukubomfya Baibolo wabo ukupalama kuli Lesa.” Belengeni Paragrafu 1 pe bula 16.

“Muno nshiku mwaba ulufyengo nga nshi. Lwaba fye nge fi calembwa apa. [Belengeni Lukala Milandu 8:9b.] Bamo balatwishika nampo nga Lesa alipoosako amano. [Belengeni basentensi ba kubalilapo babili mu paragrafu 4 pe bula 119.] Ici cipandwa cilondolola umulandu Lesa asuminishisha ulufyengo ukufika na lelo.”

Is There a Creator Who Cares About You?

“Ni kwi twingasanga amano yene yene pa kupwisha ubwafya bukalamba nga nshi? [Lekeni basuke. Lyene belengeni Mateo 7:28, 29.] Ifi twabelenga pano e fyo abantu bacitile ilyo Yesu alandile Ilyashi lya pa Lupili. Moneni ifyo abantu bamo baalanda. [Mulangeni ifyebo fili pe bula 152.] Ici cipandwa cilanda pali Yesu ne fyo alesambilisha.”

“Bushe na imwe mwalitala amutontonkanya ukuti: ‘Nga ca cine cine Lesa e ko aba, bushe akapwisha ukucula no lufyengo mu calo?’ [Lekeni basuke. Lyene belengeni Ukusokolola 21:3, 4.] Muli ci citabo mwaba ubulondoloshi bwa fyo Lesa akacita pa kupwisha ukucula no kufumyapo uulenga kucula.” Kupukuleni pa cipandwa 10.

Mulelola!

“Abantu abengi balasakamikwa pa bwafya bukalamba ne fyabipa filecitika muno nshiku. [Landeni pali cimo icacitike mu mushi.] Bushe mwalishiba ukutila ifintu fya musango yo e fipanga icishibilo ca kuti ubuteko bwa kwa Lesa bwalatampa ukuteka isonde? [Lekeni basuke. Lyene belengeni ilembo lilanda pali co cishinka, pamo nga Mateo 24:3, 7, 8; Luka 21:7, 10, 11; nelyo 2 Timote 3:1-5.] Aka katabo kalelanda pa mulandu cibelele ice pamfya sana ukuba abalola nomba ku filecitika.”

“Abantu abengi muno nshiku balakalifiwa ku fibi filecitika nelyo pa mulandu wa fyo balufishe. Bamo balapapa umulandu Lesa ashacitilapo nangu cimo pa kuwamye fya musango yo. Baibolo yatulaya ukutila nomba line Lesa akapokolola abantunse ku kucula kwabo. [Belengeni Ukusokolola 14:6, 7.] Moneni ifyo cikaba Lesa nga apingula abantunse. [Belengeni 2 Petro 3:10, 13.] Muli aka katabo muli ifyebo na fimbi pali uyu mulandu wacindama.”

Ukwishiba Uko Kutungulula ku Mweo wa Muyayaya

“Umuntu nga amwitile ukuyaikala mu calo cayemba nge ci, bushe kuti mwasumina? [Langisheni icikope caba pe bula 4 na 5, kabili lekeni basuke.] Moneni ico Icebo ca kwa Lesa catila e nshila twingakwatilamo ubumi bwa musango yu ubwa muyayaya. [Belengeni Yohane 17:3.] Ici citabo cikamwafwa ukusanga kwishiba ukutungulula ku mweo wa muyayaya.” Panganeni ukwisalanshanya amaparagrafu ya kubalilapo yasano mu cipandwa 1 umuku mukabwela.

Kupukuleni pa cikope caba pe bula 188 na 189, kabili ukubomfya amashiwi yalembelwepo, ipusheni mwine ng’anda amuti: “Bushe mulafwaya ukwisaikala mu Paradaise, ilyo ukwishiba Lesa kukesula mwi sonde? [Lekeni basuke. Lyene belengeni Esaya 11:9.] Ici citabo cikamwafwa ukwishiba ico Baibolo yalanda pali Paradaise ne fyo tukekalamo.” Panganeni ukwisalanshanya amaparagrafu 11-16 mu cipandwa 1 ilyo mukabwela.

Sambilila Kuli Kasambilisha Mukalamba

“Bushe muletontonkanya ukuti icalo kuti cawama nga ca kutila abantu balekonka ifi fyalembwa apa? [Belengeni Mateo 7:12a. Lyene lekeni balandepo.] Ici citabo nacikwata amasambililo ayengi ayo kasambilisha wacila bakasambilisha bonse, asambilishe.” Langisheni ifikope ne filembelwe pa fikope mu cipandwa 17.

“Abafyashi abengi balafwaya ukusambilisha abana babo ifisuma. Bushe batini ukucite ci kwalicindama? [Lekeni basuke. Lyene belengeni Amapinda 22:6.] Moneni ukutila abafyashi bakoseleshiwa ukutendeka ukusambilisha abana babo ilyo bacili abaice. Ici citabo calembelwa ukwafwilisha abafyashi ukucite co.” Langisheni ifikope ne filembelwe pa fikope mu cipandwa 15 nelyo mu 18.

“Ilingi line abafyashi balapapa sana amepusho abana babo babepusha. Bushe batini amepusho yamo tayafya kwasuka? [Lekeni basuke. Lyene belengeni Abena Efese 6:4.] Ici citabo kuti cayafwa abafyashi ukwasuka amepusho abana babo bepusha muno nshiku.” Langisheni ifikope fimo fimo ne fyalembwa pa fikope mu cipandwa 11 na 12 nelyo mu fipandwa 34 ukufika mu 36.

Life—How Did It Get Here? By Evolution or by Creation?

“Ifwe bonse tulasakamikwa pali bumpulamafunde no lukaakala lwaba mu cifulo twaikala. Bushe mulemona kwati kuli umuntu wingafumyapo ubu bwafya bonse? [Lekeni basuke.] Lesa alikwata ayo maka.” Kupukuleni pe bula 196; belengeni no kulanda pe lembo lya Amapinda 2:21, 22 mu paragrafu 19. Langisheni umutwe wa cipandwa 16, no kutambika icitabo.

Kupukuleni pe bula 6, no kulanda amuti: “Abantu abengi batontonkanya ukutila isonde lyesu ilyayemba no bumi bwabapo fyaishileko fye ukwabula Kabumba. Bushe imwe mutontonkanya ukuti icalenga ifi fyonse ukubako cinshi? [Lekeni basuke.] Kwaba ifingi sana ifilanga ukutila ifyalembwa mu Baibolo pali Kabumba fya cine, no yu Kabumba wa maka kabili alitutemwa icine cine. E Lesa wa cine, ne shina lyakwe ni Yehova.” Belengeni Amalumbo 83:18, no kulondololako panono ifyo afwaya ukusangula isonde lyonse paradaise.

Ukusapika Lesa Ukwa Mutundu wa Muntu

“Bushe ifi kwaba ukwa kupepa ukwingi shino nshiku, kuti twaishiba shani ukupepa uko Lesa atemwa?” Nga bayasuka, kupukuleni pe bula 377. Landeni pa cishinka calenga 7, no kwipusha mwine ng’anda nga alesumina ukutila ukupepa kwa cine kufwile kwaikatanya aba mishobo yonse. Belengeni ilembo limo pa yabikilwemo, kabili nga ca kutila kwashala inshita, lanshanyeni ifishinka fimo fimo ifili pa mutande. Nga ca kutila alesekelela icine cine, mutambikeni icitabo. Pa kuya, kuti mwaipusha amuti, “Bushe ukupepa kwa cine kufwile kwalenga umuntu aba shani?” Panganeni ilyo mukabwelelako ku kwisayasuka icipusho.

Nga ca kutila umuntu atila apepa ku mapepo ayaishibikwa sana, kuti mwatila: “Cisuma sana ukulanshanya na bantu bapepa ukwapusanapusana. Umusango abantu bafwailamo Lesa walipusanapusana. [Nga kuti mwabelenga ilembo, belengeni Imilimo 17:26, 27.] Ilingi line, abantu baya ku kupepa uko abafyashi babo bapepa. [Belengeni paragrafu 12 pe bula 8.] Ukwishiba na fimbi pa ko abantu bambi bapepa cilaafwa. Ici citabo cilondolola ukwafuma imipepele yaishibikwa sana mu calo, ifyo bacita ne fyo basambilisha.” Landeni ica kumwenako ca fili mu citabo pa mipepele ya uyo muntu, pa mabula yakonkapo: UbuSikh (100-1); ubuHindu (116-17); ubuBuddha (141); ubuTao (164-6); buConfucius (177); ciShinto (190-5); ubuYuda (220-1); no buShilamu (289).

Ukusokolola—Akalume ka Kuko Kakalamba Nakapalama!

“Ndemona namumfwa [landeni icicitike]. Abantu nga bafwa fye ukwabulo kwenekela, abantu abengi tabeshiba ifyo bengasansamusha balupwa abafwililwe. Nga imwe muletipo shani?” Lekeni basuke. Lyene kupukuleni pe bula 299, no kulangisha icikope ca kubuuka icaba pali ili bula. Lyene tileni: “Abantu abengi balapapa nga baumfwa ukutila abalungama na bashalungama bakabuushiwa mu Paradaise pe sonde. [Belengeni Imilimo 24:15 ukulingana ne fyo yambwilwe mu paragrafu 9 pe bula 297, lyene londololeni ukubomfya ifyalembwa mu paragrafu 10.] Ici citabo calikwata ifishinka ifingi pa lwa bufwayo bwa kwa Lesa ubwa ku ntanshi.”

Baibolo—Cebo ca kwa Lesa Nelyo ca Muntu?

“Tuleikala mu nshita abantu fye bonse baponenwa na macushi ayakalamba. Abengi baya ku mpandamano shalekanalekana ku kufundwa. Bamo baya ku ng’anga. Bushe imwe mulemona kwati ni kwi twingaya pa kuti tukwate amano yene yene? [Lekeni basuke.] Baibolo yalanda icishinka cacindama ico ifwe bonse tufwile twaumfwikisha. [Belengeni 2 Timote 3:16. Lyene kupukuleni pe bula 187, no kubelenga paragrafu 9.] Ici citabo cikamwafwa ukumfwikisha umulandu cawamina sana ukukonka ico Baibolo yalanda.”

Umuntu Wakulisha Uwabalile Abako Uwa Mweo

“Uno mweshi abantu abengi baletontonkanya sana pali Yesu. Nomba pa mulandu wa kutila kwaba ifintu ifingi sana ifyabipa ifilecitika icalo fye conse, bamo balatwishika nampo nga Yesu alitupoosako amano. Nga imwe mwaishibapo shani?” Lekeni basuke. Kupukuleni pa cipandwa 24, kabili lanshanyeni panono umulandu Yesu aishile pe sonde. Lyene belengeni Yohane 15:13, iyalanda pa kutemwa Yesu atemwa bambi.

“Umuntu nga alumbula Yesu Kristu, abantu abengi batontonkanya pali wena nga kacece nelyo ngo muntu uuleshikila. Ifyo baishiba pali Yesu, kufyalwa no kufwa kwakwe epela. Ifyebo ifisuma ifyo alandile ne fisuma ifyo acitile ilyo aali umumi bafisuulako fye. Ifyo apwishishishe filakuma umuntu fye onse uwatala ekala pano sonde. E mulandu wine cacindamina ukwishibila ifintu ifingi nga nshi ifyo atucitiile.” Belengeni Yohane 17:3. Kupukuleni pe bula lya kubalilapo ku ntendekelo, no kubelenga paragrafu 4.

Cinshi Cintu Lesa Afwaya Kuli Ifwe?

“Bushe mumona kwati Lesa aalefwaya fwe bantu ukucula nge fi tucula muno nshiku? [Lekeni basuke. Lyene belengeni Mateo 6:10.] Bushe mwalitala amutontonkanyapo ico Ubufumu bwa kwa Lesa bwaba?” Kupukuleni pe sambililo 6, kabili belengeni amepusho yali pa muulu. Tendekeni ukulanshanya, nelyo panganeni ukwisatendeka ukulanshanya ilyo mukabwela.

“Nangu abantu balunduluke shani mu calo, ukulwala no kufwa kwena kutwalilila ukucululusha abantu no kubalenga ubulanda. Namwishiba ico Yesu akacita ku balwala, abakote, na bafwa kumo?” Lekeni basuke. Nga ca kutila umuntu alefwaya icasuko, kupukuleni pe sambililo 5, no kubelenga amepusho ya paragrafu 5-6. Lanshanyeni amaparagrafu, nelyo panganeni ukwisalanshanya limbi.

Pepeni Lesa Wine Wine Eka

“Bushe nani wingatwafwa mu bwafya bwesu? [Lekeni basuke. Lyene belengeni Abena Roma 15:4.] Moneni ukutila Amalembo yapuutwamo yalatufunda, ukutusansamusha, no kutupe subilo, ifingatwafwa ukushipikisha ubwafya. Ici citabo cilafwilisha ifyo twingamwenamo mu kusambilila Baibolo.” Langisheni ifishinka 4 ifili pe bula 30.

“Ukutula fye inshita Yesu ali pe sonde ukufika na lelo, abantu abengi balipepela Ubufumu bwa kwa Lesa ukwisa. Bushe mwalishiba ifyo cikaba ku bantunse ilyo Ubufumu bukesa? [Lekeni basuke. Lyene belengeni Daniele 2:44.] Ici citabo calilondolola Ubufumu bwa kwa Lesa, ico bukacita, ne fyo twinganonkelamo mu kuteka kwalungama ubwa ubo Bufumu.” Langisheni icikope caba pa mabula 92-3.