Sungeni

Imitubululo pa fya Kulanda mu Mulimo wa Mwi Bala

Ifya Kubomfya ici ca mu Kati

Imitubululo ikonkelepo iingi yali mu Ubutumikishi Bwesu Ubwa Bufumu ubwa ku numa. Esheni ukubomfya iyi mitubululo mu mulimo wenu uwa kushimikila, no kumona ifyo muli no kusangamo. Sungeni ici ca mu kati, no kulaloshako ilyo mulepekanya ukuya mu butumikishi.

Kuti mwalenga umuntu afwaya ukukutika ku Cebo ca kwa Lesa lintu mwalanda bwangu ico mukonkele. Ipusheni icipusho ca kulungatika, lyene belengeni icasuko icipi ica mu Malembo. Kuti mwabomfya iyi mitubululo:

“Ilyo muleetetula pa nshita ya ku ntanshi, bushe mumona ukuti ifintu fikaba bwino nelyo iyo? [Lekeni basuke.] Baibolo yalisobele pa lwa fintu fileta amalangulushi pali lelo ifyo tulemona ndakai ne fya kutumbukamo.”—2 Tim. 3:1, 2, 5; Amapi. 2:21, 22.

“Abengi lelo balyangwako ku kusakamana ubumi. Bushe mwalishiba ukuti Lesa alaya ifyo akafumyapo umupwilapo amalwele yonse?”—Esa. 33:24; Ukus. 21:3, 4.

“Bushe mwalishiba ukuti Baibolo isobela ati ku ntanshi kukaba fye ubuteko bumo ubukalateka icalo conse?”—Dan. 2:44; Mat. 6:9, 10.

“Bushe mutontonkanya ukuti ifintu kuti fyaba shani nga ca kuti Yesu Kristu aleteka isonde?”—Amalu. 72:7, 8.

“Abantu abengi balefyengwa pa mulandu wa kuba abaume nelyo abanakashi, pa kupepa kumbi, nelyo pa mulandu wa mushobo. Bushe mutontonkanya ukuti Lesa omfwa shani pa lwa mpatila ya musango yu?”—Imil. 10:34, 35.

“Twalishiba ukuti Yesu Kristu alicitile ifipesha mano ifingi mu nshiku shakwe. Nga ca kuti mwamulombele ukucitako icipesha mano cimo fye na cimbi, cinshi mwingalomba?”—Amalu. 72:12-14, 16.

“Abantu abengi balitendwa ukumfwa pa lwa mafya. Bafwaya ukumfwa pa lwa fingapwisha amafya. Lelo ni kwi twingasanga ifingapwisha amafya yesu?”—2 Tim. 3:16, 17.

“Bushe mwalibwishiba Ubufumu ubo mupepela mwi pepo lya kwa Shikulu (nelyo ilya We Shifwe)?”—Ukus. 11:15.

Ifya Kusosa pa Kutendeka Ukulanshanya

Ifipusho fili pe samba, ifya mu malyashi ya citabo ca Ukupelulula, filelanga inambala ye bula mu citabo apo mwingasanga icasuko:

Mulandu nshi tukotela no kufwa? (rs 140)

Cinshi cabe mibele ya bafwa? (rs 141)

Bushe kwalibako imilandu iisuma iya kucetekela muli Lesa? (rs 223)

Bushe Lesa muntu uwa cine cine? (rs 225)

Bushe Lesa cine cine alasakamana icicitika kuli ifwe fwe bantunse? (rs 224)

Bushe abantu bonse abasuma baya ku muulu? (rs 394)

Bushe umuntu afwile ukuya ku muulu pa kuti akakwate inshita ya ku ntanshi iya nsansa? (rs 395)

Mulandu nshi cacindamina ukwishiba no kubomfya ishina lya kwa Lesa? (rs 424)

Bushe Yesu Kristu ni Lesa? (rs 430)

Cinshi cintu Ubufumu bwa kwa Lesa bukapwishishisha? (rs 258)

Cinshi abantu babela pe sonde? (rs 265)

Cinshi cingafwa ukuwamye cupo? (rs 132)

Bushe Lesa alapokelela imipepele yonse? (rs 282)

Umuntu kuti aishiba shani imipepele yalungama? (rs 288)

Ni shani fintu Satana aba umuntu wa maka mu calo lelo? (rs 245)

Mulandu nshi Lesa asuminishisha ukucula? (rs 310)

Mulandu nshi kubelele ububifi bwafulishe fi? (rs 247)

Ni ani ateka cino calo—Lesa nelyo Satana? (rs 111)

Imitubululo ya Kushalikilamo Broshuwa wa Cintu Lesa Afwaya

“Ukwabula no kutwishika mulesuminisha ukuti abantu abengi balisumina muli Lesa. Bonse abasumina muli wene balishiba ukuti Lesa alafwaya fimo kuli ifwe. Ico abantu bashaishiba Cintu Lesa afwaya kuli ifwe.” Lyene fumyeni broshuwa wa Cintu Lesa Afwaya, kupukuleni pe sambililo 1, kabili lanshanyeni.

“Ilyo mwamona amafya ayengi ayaba mu ndupwa lelo, bushe mwalibala amuipusha icingaleta insansa mu lupwa?” Lintu bayasuka, londololeni ukuti mu Baibolo, Lesa alasokolola icingaleta insansa shine shine mu lupwa. Belengeni Esaya 48:17. Lyena alukileni kwi sambililo 8 muli broshuwa wa Cintu Lesa Afwaya, no kulanda pa fikomo fya mu Baibolo fimo ifiloshiweko ifilanda pa fintu fyacetekelwa ifyo cila muntu mu lupwa afwile ukucita. Belengeni ifipusho pa kutendeka kwe sambililo. Bepusheni nga kuti batemwa ukubelenga ifyasuko.

“Muli uyu broshuwa mwaba kosi wa kusambilila uwalondolola ifisambilisho fya kutendekelako ifya mu Baibolo. Pe bula limo na limo, muli no kusanga ifyasuko ku fipusho fyacusha abantunse pa myaka iingi. Ku ca kumwenako, Cinshi caba imifwaile ya kwa Lesa kwi sonde?” Kupukuleni pe sambililo 5, no kubelenga ifipusho apatendekele isambililo. Ipusheni mwine ng’anda icipusho atemenwe sana, lyena belengeni paragrafu (amaparagrafu) umuli icasuko, no kubelenga amalembo yalingile. Londololeni ukuti ifyasuko fyaumfwika ku fipusho fimbi kuti fyasangwa ukwabula ubwafya nga fintu twasanga ici casuko. Tubululeni ukuti mukabweleleko na kabili ku kulanshanya icipusho na cimbi.

“Bushe kuti mwatila cinshi cilenga ulukaakala mu masukulu ya buteko? Bushe icilenga bafyashi ukukanafunda abana? Nelyo kuti caba cintu cimbi pamo nga, ukusonga kwa kwa Kaseebanya?” Lekeni basuke. Nga ca kuti batila ni pa mulandu wa kusonga kwa kwa Kaseebanya, belengeni Ukusokolola 12:9, 12. Landeni pa fyo Kaseebanya atungilila icimfulumfulu mu calo. Lyene kupukuleni broshuwa wa Cintu Lesa Afwaya pe sambililo 4, no kwipusha nga ca kuti balibalatontonkanyapo pa lwa ko Kaseebanya afumine. Konkanyenipo ukubelenga no kulanshanya amaparagrafu yabili aya kubalilapo. Nga ca kuti batila icilenga ulukaakala mu masukulu “bafyashi ukukanafunda abana,” belengeni 2 Timote 3:1-3 no kulanda pa mibele ilenga kwaba ubu bwafya. Lyene kupukuleni pe sambililo 8 muli broshuwa wa Cintu Lesa Afwaya, belengeni paragrafu 5, no kukonkanyapo ukulanshanya.

“Bushe muletontonkanya ukuti caliba bwino ukwenekela Kalenga ukutupeela ukwishiba tukabila pa kukwata ulupwa lwa nsansa?” Pa numa ya kwasuka, fumyeni broshuwa wa Cintu Lesa Afwaya. Kupukuleni pe sambililo 8, no kulondolola ukuti yakwata ifishinte fya mu Baibolo ifingafwa bonse aba mu lupwa. Balangeni ifya kubomfya broshuwa pamo na Baibolo pa kuti banonkelemo sana.

“Apo tulakwata sana amafya lelo, bushe muletontonkanya ukuti ipepo kuti lyatwaafwa? [Lekeni basuke.] Abengi batila ipepo libapeela amaka ya lwa nkati. [Belengeni Abena Filipi 4:6, 7.] Na lyo line, umuntu kuti amona ukuti amapepo yakwe tayasukwa. [Kupukuleni pe sambililo 7 muli broshuwa wa Cintu Lesa Afwaya.] Iyi broshuwa ilalondolola ifyo ipepo lingatwafwa.”

“Tulelanshanya na bena mupalamano pa lwa mulandu kwabela imipepele yapusanapusana iyafulishe fi mu calo. Lelo, kwaba fye Baibolo imo. Ukulingana ne fyo mumona, mulandu nshi kwabela icimfulumfulu mu mipepele? [Lekeni basuke. Kupukuleni broshuwa wa Cintu Lesa Afwaya pe sambililo 13, no kubelenga ifipusho fya kubalilapo.] Mukasanga ifyasuko fyaumfwika kuli ifi fipusho nga mwabelenga ili sambililo.”

Pa numa ya kushila umuntu bamagazini ba Ulupungu lwa kwa Kalinda na Loleni! mwipusheni nga kuti mwamubelengela paragrafu imo iipi. Nga amusuminisha, kupukuleni broshuwa wa Cintu Lesa Afwaya pe sambililo 5. Ipusheni ifipusho fili pa kutendeka kwe sambililo, kabili mwebeni akutike pa kusanga icasuko ku cipusho ca kubalilapo ilyo mulebelenga paragrafu wa kubalilapo. Pa numa ya kubelenga paragrafu, ipusheni icipusho no kumfwa ifyo alaasuka. Mutambikeni broshuwa kabili, nga asumina, lanshanyeni ukuti mukabwela no kwisaumfwa ifyo akasuka ifipusho fibili ifikonkelepo.

Imitubululo ya Kushalikilamo Icitabo ca Ukwishiba

Ninshi namukwata na Baibolo mu minwe, soseni ukuti: “Tulebelengela bonse ilembo muli ino ncende. Litila . . . ” Belengeni Yohane 17:3, no kwipusha ukuti: “Bushe mwacimona ico batulaya nga twaba no kwishiba kwa cine? [Lekeni basuke.] Ni kwi umuntu engasanga ukwishiba kwa musango yu?” Ilyo bayasuka, balangeni icitabo ca Ukwishiba, no kusosa ukuti: “Ici citabo cilanda pa kwishiba ukutungulula ku mweo wa muyayaya. Cilasuka ifipusho ifingi ifyaseeka ifyo abantu bepusha pali Baibolo.” Balangeni umutande wa filimo, kabili bepusheni nga ca kuti balibala abatontonkanyapo pali aya malyashi.

“Bushe mwalibalatontonkanyapo nga ca kuti Lesa cine cine alyangwa ku lufyengo no kucula ifyo tumona ne fyo tuculako ifwe bene? [Lekeni basuke.] Baibolo itulaya ukuti Lesa alitutemwa no kuti akatwafwa mu kucula kwesu.” Belengeni ifikomo fimo fimo ifya Amalumbo 72:12-17. Kupukuleni icitabo ca Ukwishiba pa cipandwa 8, no kulondolola ukuti cilapeela icasuko ca kusansamusha ku cipusho ico iminshipendwa baipusha ica kuti, Mulandu nshi Lesa asuminishisha ukucula? Nga kuli inshita, lanshanyeni pa Malembo yamo ayali mu maparagrafu 3 ukufika ku 5, nelyo kuti mwacite co ilyo mwabwelelako.

“Fwe bengi twalifwilwa abatemwikwa. Bushe mulatontonkanya ukuti tukabamona na kabili? [Lekeni basuke.] Yesu alangilile ukuti abatemwikwa besu abafwa kuti babuushiwa ku mfwa. [Belengeni Yohane 11:11, 25, 44.] Nangu ca kuti imyaka iingi naipitapo ukutula apo ici cacitikile, cilangilila ico Lesa atulaya ukutucitila.” Kupukuleni icitabo ca Ukwishiba pa cikope caba pe bula 85, no kubelenga amashiwi yali pa cikope. Lyene balangeni icikope pe bula 86, no kulandapo. Sheni mwalanda ifyo mukalanshanyapo ilyo mukabwelelako pa kusosa ukuti: “Bushe kuti mwatemwa ukwishiba umulandu abantunse bakotela no kufwa?” Mukabweleleko ku kulanshanya icipandwa 6.

“Bushe mwalibalatontonkanyapo pa mulandu abantu bafwaila ukwikala imyaka iingi?” Ilyo bayasuka, kupukuleni icitabo ca Ukwishiba pa cipandwa 6, no kubelenga paragrafu 3. Pelulushanyeni pa malembo yaloshiweko. Lintu mwaipusha ifipusho fibili pa mpela ya paragrafu, bepusheni nga kuti batemwa ukuibelengela ifyasuko. Nga ca kuti basumina, lanshanyeni amaparagrafu yanono ayakonkelepo.

“Tuleipusha abantu nga balisumina muli ci . . . ” Belengeni Ukutendeka 1:1, no kwipusha ukuti: “Bushe mulesuminisha ifi fyebo?” Nga ca kuti basumina lyene soseni ukuti: “Na ine nalisumine ci. Lelo, bushe mulatontonkanya ukuti nga Lesa e walengele fyonse, ninshi e walenga kwaba ububifi?” Pa numa ya kumfwa ifyo umuntu ayasuka, belengeni Lukala Milandu 7:29. Kupukuleni icitabo ca Ukwishiba pa cipandwa 8 no kubelenga paragrafu 2. Nga ca kuti talesumina ifyebo fyaba pa Ukutendeka 1:1, mukoselesheni ukubebeta ubushininkisho bwa kuti Kalenga e ko aba.—Moneni icitabo ca Ukupelulula, amabula 252-4.

“Bushe mulesumina ukuti apo imibele ilealuka cila nshita, tulekabila ubutungulushi bwine bwine mu mikalile yesu? [Lekeni basuke.] Nangu ca kuti citabo ca kale sana, Baibolo yalikwata ukufunda kwingatwafwa mu mikalile ya nomba na mu ndupwa shifwaya ukuba ne nsansa.” Lyene kupukuleni pa cipandwa 2 mu citabo ca Ukwishiba, no kubelenga paragrafu 10 na sentensi wa kubalilapo mu paragrafu 11, belengeni na 2 Timote 3:16, 17.

“Bushe kuti mwatemwa ukwishiba ifyo cikaba ku ntanshi kuli ifwe na kwi sonde? [Lekeni basuke.] Baibolo isupula inshita ya ku ntanshi mwi shiwi fye limo ilya kuti, Paradise! Mulya e mo Lesa abikile abantunse babili aba kubalilapo ilyo ababumbile. Moneni ifyo balondolola ifyo cifwile cali.” Kupukuleni icitabo ca Ukwishiba pe bula 8, no kubelenga paragrafu 9, pa kamutwe katila “Ubumi mu Paradise.” Lyena lanshanyeni ifishinka mu paragrafu 10, no kubelenga ilembo liloshiweko ilya Esaya 55:10, 11. Bebeni ukuti mulefwaya ukutwalilila ukulanshanya pa fyo ubumi muli Paradise wabweshiwa bukaba, lanshanyeni amaparagrafu 11-16.

Ilyo mwabwelela ku bo mwashalike bamagazini ba Ulupungu lwa kwa Kalinda na Loleni!, kuti mwasose fi:

“Ilyo namutandalile, nalitemwa ukumushiila magazini wa Ulupungu lwa kwa Kalinda. Napamo mwalimona ukuti umutwe onse uwa uyu magazini utila Ulupungu lwa kwa Kalinda Ulusabankanya Ubufumu bwa kwa Yehova. Lelo ndefwaya ukulondolola ubu Bufumu ne fyo bwingacitila imwe no lupwa lwenu.” Lyene kupukuleni broshuwa wa Cintu Lesa Afwaya pe sambililo 6, kabili belengeni no kulanshanya ukulingana ne nshita uyo muntu akwete.

“Tapakokwele apo namutandalile kabili namushilile bamagazini ba Ulupungu lwa kwa Kalinda na Loleni! Aba bamagazini balenga abantu ukucindika Baibolo no butungulushi bwa mibele isuma ubwabamo. Apo nalishiba ukuti calicindama abantu bonse ukumfwikisha Icebo ca kwa Lesa, nabwela ku kumulanga icingamwafwa ukucite co.” Fumyeni broshuwa wa Cintu Lesa Afwaya nelyo icitabo ca Ukwishiba, no kubeba pa lwe sambililo lya Baibolo.

Ilyo muleshalika ifitabo fya kale ifya mabula 192, kuti mwaesha ukusose fi:

“Abantu balakomaila sana pa bucindami bwa kukwata amasomo yasuma. Ukulingana ne fyo mutontonkanya, masomo nshi umuntu afwile ukusupila pa kuti akakwate sana insansa mu bumi no kutunguluka? [Lekeni basuke. Lyene belengeni Amapinda 9:10, 11.] Ici citabo [landeni umutwe wa citabo muletambika] cakwata ifyebo fya mu Baibolo. Cilanda pa kwishiba kweka ukwingatungulula ku mweo wa muyayaya.” Langilileni ica kumwenako mu citabo, no kubakoselesha ukubelenga ici citabo.

Impapulo Shimbi

Imitubululo pa fya kulanda pa kushalika ifitabo na fimbi na babroshuwa kuti yasangwa muli Watch Tower Publications Index pa mutwe wa kuti:

Presentations

List by Publication

Ifya Kulanda pa Kutendeka Isambililo apo Pene

Pa kutendeka isambililo lya Baibolo, esheni ukusosa ifi fyebo mu kulungatika:

“Bushe mwalishiba ukuti mu maminiti fye yanono, kuti mwasanga icasuko ku cipusho cacindama ica mu Baibolo? Ku ca kumwenako, . . . ” Lyene, ipusheni icipusho icili pa ntendekelo ye sambililo ilili lyonse muli broshuwa wa Cintu Lesa Afwaya kabili ilyo mulemona uyo muntu engatemwa.

“Naisa ndemulanga programu uushili wa kulipilisha uwe sambililo lya Baibolo. Cisenda fye amaminiti nalimo 5 ukulangilila. Bushe namukwata amaminiti 5?” Nga batila ati nabakwata, bomfyeni isambililo 1 muli broshuwa wa Cintu Lesa Afwaya ku kulangilila isambililo, ukubelenga fye ilembo limo nelyo yabili ayasalilwe. Pa numa, ipusheni ukuti: “Ni lilali mwingakwata amaminiti nalimo 15 pa kuti tukalanshanye isambililo likonkelepo?”

“Abantu abengi balikwata Baibolo, lelo tabaishiba ukuti yalikwata ifyasuko ku fipusho fyacindama ifyo bonse twakwata pa lwa nshita ya ku ntanshi. Ukubomfya ulu lupapulo lwa kusambililamo [broshuwa wa Cintu Lesa Afwaya nelyo icitabo ca Ukwishiba] pe awala nalimo limo mu mulungu, kuti mwaishiba ifyebo fya kutendekelako ifya mu Baibolo mu myeshi fye inono. Kuti natemwa ukumulanga ifyo tusambilila.”

“Namutandalila ukuti tulesambilila na imwe Baibolo pa ng’anda ukwabula ukulipilisha. Kuti natemwa ukumulanga mu maminiti fye yanono ifyo abantu mu fyalo nalimo 200 balanshanya Baibolo pa ng’anda nge ndupwa. Kuti twasalapo ilyashi pali aya ilyo twingalanshanyapo. [Langilileni umutande wa malyashi yaba mu citabo ca Ukwishiba.] Lyashi nshi mutemenwe sana?” Baloleleni basale. Kupukuleni pa cipandwa basalile, no kutendeka isambililo muli paragrafu wa kubalilapo.

“Ndasambilisha abantu Baibolo ukwabula ukulipilisha kabili ninkwata inshita ya kusambilisha na bambi. Ulu lupapulo elo tubomfya ukusambilila Baibolo. [Balangeni icitabo ca Ukwishiba.] Uyu kosi asenda fye imyeshi inono kabili alikwata ifyasuko ku fipusho pamo nge fi: Mulandu nshi Lesa asuminishisha ukucula? Mulandu nshi tukotela no kufwa? Cinshi cicitika ku batemwikwa besu nga bafwa? Kabili kuti twapalama shani kuli Lesa? Bushe mulange ifyo tusambilila?”

Nga ca kuti mwalisangako inshila isuma iya kutendekelamo ukulanshanya iilebomba bwino mu kulenga abantu ukufwaya ukukutika, twalilileni ukubomfya iyo nshila! Muleteulula fye iyo nshila ku kumfwana no lupapulo luletambikwa muli uyo mweshi.