Tetekeleni Yehova Ukuti Akamesha
1 “Nalisekelele apakalamba pa muku wa kubalilapo ilyo nayafwilisheko ukupanga icilonganino cipya. Twalibombele mu mukoosha pa myaka ukucila pali ibili, ukutwalilila ukupepa no kutetekela Yehova ‘uumesha.’” E fyalembele painiya wapimpa uwaishibe ukuti alekabila ukushintilila pali Yehova pa kuti ifintu fingalunduluka. (1 Kor. 3:5-9) Ilyo tulefwailisha abantu bakongamina ku fya ku mupashi, na ifwe bene tulakabila ukutungilila kwa kwa Lesa nga ubutumikishi bwesu bwingatwala ifisabo.—Amapi. 3:5, 6.
2 Ukumena Kufwaya Ukulima: Ulubuto lwa cine lukabila ukulimwa pa kuti lwingamena. Ukubwelelako ubushiku bumo bwine nelyo pa numa ya nshiku shibili ukutula apo twailileko umuku wa kubalilapo ilingi line kulatwala ifisabo fisuma. Beni aba cikabilila kabili aba bucibusa. Lengeni umuntu ukwangukililwa. Mwilalanda fye mweka. Musuminisheni ukumwishiba, kabili langeni ukuti mwalisekelela muli wene pamo ngo muntu.
3 Mu July no kutwalilila ukufika mu August, tulebombesha ukutambika amabroshuwa ayalekanalekana ku bantu abo tukumanya. Nangu cibe fyo, na kabili tulakabila ukubwelela kuli bonse abalesekelela na konse uko twashalike ulupapulo. Tucita ifi ukupitila mu fipempu fya kubwelelamo no kutambika amasambililo ya Baibolo. (Mat. 28:19, 20) Pa kuti ici cingacitwa, broshuwa wa Cintu Lesa Afwaya kuti pambi abomfiwa ku kutendeka amasambililo. Mwalasanga imitubululo yakonkapo ine ukuba iya kwaafwa.
4 Nga ca kuti mwalandile na umo uwasakamikwe pa lwa icalo uko cileya, nalimo kuti mwakonkanyapo ukulanshanya pa kusosa ukuti:
◼ “Ndecetekela ukuti na imwe bene namusakamikwa pa lwa mibele yabotelela iya mu bwikashi bwa bantu nga fintu na ine nsakamikwe. Tulomfwa amalyashi ya kulenga ubulanda aya kuumana mu mayanda, umufuma ukucululusha abana, abafyashi, na balume nelyo abakashi. Kabili cimoneka kwati abantu abengi tabatontonkanya ukuti calibipa ukubepa nelyo ukwiba pa kuti bakwate ifyo balefwaya. Bushe muletontonkanya ukuti Lesa alyangwako ku nshila abantu bekalilamo? [Lekeni asuke.] Lesa aimikile abantu ifipimo fimo fimo ifya kukonka, kabili mu cine cine tafyayafisha kuli ifwe.” Belengeni 1 Yohane 5:3. Lyene tambikeni broshuwa wa Cintu Lesa Afwaya, kabili kupukuleni pe sambililo 10. Belengeni paragrafu wa kubalilapo. Londololeni amashiwi yali mu filembo fipindeme pa kutendeka kwa maparagrafu 2-6, kabili ipusheni mwine ng’anda icibelesho cintu alemona ukuti e cicishishepo kuba ica busanso mu bwikashi bwa bantu. Belengeni paragrafu alelanda pali ico cibelesho kabili belengeniko ilembo limo nelyo yabili inshita nga yasuminisha. Sondweleleni pa kubelenga paragrafu 7, kabili lyene tantikeni ukubwelelako no kutwalilila ukulanshanya.
5 Nga mwakumanya abayangwako nga nshi ku lupwa, kuti mwasosa icapala ici:
◼ “Bushe muletontonkanya ukuti cilimo amano ukwenekela ukuti Kabumba kuti atupeela ifibombelo fintu tulekabila ku kulenga ubumi bwa lupwa ukutunguluka?” Lekeni asuke. Fumyeni broshuwa wa Cintu Lesa Afwaya, kupukuleni pe sambililo 8, kabili londololeni ukuti akwatamo ifishinte fya muli Baibolo ifingafwa uwa mu lupwa onse. Kuti mwaitemenwa ukulangilila ifya kubomfya broshuwa na Baibolo pa kunonkelamo apakalamba. Konkeni amakambisho ayasangwa pe bula 2 ilya broshuwa. Tantikeni ukubwelelako no kuyapwisha ili sambililo nelyo ukutendeka isambililo limbi ilyo mwine ng’anda asala muli broshuwa, nga namupwisha ilya kubalilapo.
6 Pano pali inshila ya kulungatika intu mwingabomfya ku kutambika programu we sambililo lya Baibolo. Langeni broshuwa wa “Cintu Lesa Afwaya,” kabili mutile:
◼ “Muli uyu broshuwa mwaba kosi we sambililo uwapaka, uwalondolola ifisambilisho fya kutendekelako ifya Baibolo. Pe bula limo limo, mukasangapo ifyasuko ku fipusho ifyacusha abantu pa myanda ya myaka iingi. Ku ca kumwenako, Cinshi caba imifwaile ya kwa Lesa kwi sonde?” Kupukuleni pe sambililo 5, no kubelenga ifipusho apatendekele isambililo. Ipusheni mwine ng’anda icipusho atemwisha, kabili lyene belengeni paragrafu (maparagrafu) umuli icasuko, no kubelenga amalembo yalinga. Londololeni ukuti ifyasuko fya kwikusha ku fipusho fimbi kuti fyasangwa mu nshila yayanguka ukupala iyi ine. Tubululeni ukuti mukabwela na kabili ku kulanshanya icipusho na cimbi ne casuko.
7 Nelyo kuti mwasalapo ukwesha inshila yayangushiwa iya kutendekelamo isambililo lya Baibolo pa kusosa ukuti:
◼ “Bushe mwalishibe ukuti pa kubomfya fye amaminiti yanono, kuti mwasanga icasuko ku cipusho ca mu Baibolo icacindama? Ku ca kumwenako, . . .” Lyene belengeni icipusho cili pa kutendeka kwa limo ilya masambililo yali muli broshuwa, ilyo mulemona ifyo kuti lyacebusha umuntu. Pa kwishibilapo na fimbi pa fipusho ifyo mwingabomfya, moneni amaparagrafu 15 na 16 mu ca mu kati ca Ubutumikishi Bwesu Ubwa Bufumu ubwa May 1997, ica mutwe wa kuti: “Pameni pa Kucita Ifipempu fya Kubwelelamo.”
8 Mu buseko ukubomba ne fipempu fya kubwelelamo no kutungulula amasambililo ya Baibolo lubali lwa kuba “abalebombela pamo” na Lesa. (1 Kor. 3:9) Ilyo tulebombesha ukukusha ubuseko mu bantu twasanga kabili lyene ukutetekela Yehova ukuti akamesha, tukekushiwa mu cine cine mu nshila intu umulimo umbi ushingatwikushishamo.