Tangisheniko Ifyakatamisha
1 Fintu nshi fimo ifyakatama ififwaikwa ku butuntulu bwesu ubwa ku mupashi? Ifi fisanshako isambililo lya pa lwesu, ukusangwa ku kulongana, ukuba aba mukoosha mu kupepa, ukubishanya kusuma, no butumikishi bwa Bwina Kristu. Tatwingasungilila ubutuntulu bwa ku mupashi ukwabula ukutangishako ifyakatama mu bumi bwesu.
2 Nangu cibe fyo, ifwe bonse tulalwisha ulunkumbwa lwa mubili kabili tukabila ukuisalapula. (Gal. 5:17) Tatulingile ukuyumfwe fyo tukamwenamo apakalamba mu kukonkelela ifya pa lwesu. (Yer. 17:9) Kanshi nga tulefwaya ukulinda umutima wesu no kusengauka ukulufiwa, calicindama ukuibebeta lyonse.—Amapi. 4:23; 2 Kor. 13:5.
3 Ibebeteni: Kuti mwaibebeta ukupitila mu kuipusha ifipusho fyafumaluka nge fi: Bushe ndafuluka ukubelenga Icebo ca kwa Lesa? (1 Pet. 2:2) Bushe ndatesekesha ifyo cacindama ukusangwa ku kulongana kwa cilonganino konse? (Heb. 10:24, 25) Bushe ndi wa mukoosha mu kupepa? (Rom. 12:12) Bushe mfwaya ukubishanya na ba bumupashi? (Rom. 1:11, 12) Bushe ndayumfwe fyo ni ncito yandi ukubilisha imbila nsuma? (1 Kor. 9:16) Ifyasuko fyenu nga ni ‘Ee,’ ninshi cilelangishe fyo mufwaya ukutangishako ifyakatamisha.
4 Bebeteni Imibombele Yenu Iya Cila Bushiku: Pa kuibebeta mulekabila ukukonkeshapo ukubebeta ifyo mufwaya ukupitila mu kutantika ifya kubomfye nshita. Ici cisanshako ukutantika inshita lyonse iya kubelenga Baibolo no Ulupungu lwa kwa Kalinda lonse ulwafuma na Loleni!, e lyo no kupekanishisha ukulongana. Na kabili mufwile ukulubulako inshita ya kusambilila no lupwa no kupepela capamo. Lingeni inshita ya kupoosa pali TV, pali kompyuta, ukumfwa ku cilimba nelyo kuli fimbi ifya kusekesha. Tantikeni intanshi ukusangwa ku kulongana konse ukwa cilonganino, e lyo ifyashala pa numa. Tantikeni inshita ya kubomba ngo lupwa lonse mu mulimo wa mwi bala cila mulungu.
5 Ukutangishako ifyakatamisha mu bumi bwesu ukwabulo kutwishika, kukatuletela ukusekelela.