Amasambililo ya Baibolo Ayalunduluka Ukuba Abasambi
1 Mutungwi umwina Etiopia aipwishe ati “cinshi cilendesha ukubatishiwa?” ilyo Filipi “amushimikile [pa lwa kwa] Yesu.” (Imil. 8:27-39) Mutungwi wena, kale kale alitemenwe ifyalembwa fyapuutwamo ifya kwa Lesa, kabili ilyo aafwiwe lwa ku mupashi kuli Filipi, aliiteyenye ukusanguka umusambi. Lelo te bonse abashininwa ukuti bakabila ukuibebetela Amalembo abene.
2 Ku ca kutasha, ukuteyanya kwa kwa Yehova kwalifumya broshuwa mupya uutila, A Book for All People, uwa kukoselesha abantu ukubebeta ifyo Baibolo yalanda pa lwa nshiku shesu. Ifyebo fya muli broshuwa kuti fyatemwikwa ku bantu bafumaluka abasoma lelo abashaishiba pa lwa Baibolo. Uyu broshuwa wawamisha alembelwa ku kukoselesha abantu ukufwaya ukubebeta Baibolo.
3 Lintu tuletampa isambililo lya Baibolo, kuti caafwa ukupituluka mu mitubululo yaba mu ca mu kati ica Ubutumikishi Bwesu Ubwa Bufumu ubwa June 1996 pa fya kutungulula isambililo mu citabo ca Ukwishiba nga mulefwaya lilunduluke. Mwi sambililo, langulukeni ifyo umusambi alelunduluka pa kuti mwingeshiba umulekabilwa ukusakamana kwakulilako. Koselesheni umusambi ukupekanishisha kabela, ukubelenga amalembo yonse. Nga aleyasuka mu mashiwi yakwe kuti calangilila ifyo umutima wakwe uletesekesha icine. Ilingi line abalunduluka bwangu ni balya babelenga ifyalundwapo mu mpapulo sha Sosaite no kusangwa ku kulongana kwa cilonganino lyonse. Mukoselesheni ilyo aleambaula na bambi ukubashimikilako ifyo alesambilila. Mulangeni ifyo alekabila ukucita pa kulunduluka lwa ku mupashi. Tatulingile ukutungulula amasambililo umuyayaya na ba mitima ibili. Abasambi bafwile ukuitendekelako ukusambilila, ukwiminina ku lubali lwa cine mu kushangila, no kulunduluka ukulola ku kuipeela no lubatisho.
4 Mu mayanda yamo, mwaba na bambi abatungululwako amasambililo, apantu aba mu lupwa bambi basambilishiwa pale pale. Nangu cibe fyo, ilingi kuti cawamapo ukubatungulwila bonse pamo, apo kuti cayafwa ukwikatanya ulupwa capamo lwa ku mupashi.
5 Ikambisho lya kwa Yesu lya kuti tulenge abasambi. (Mat. 28:19) Pa kucite fyo, tufwile ukutungulula amasambililo ya Baibolo ayengaafwa abasambi ukulunduluka ukufika apo na bo bengepusha ati, “Cinshi cilendesha ukubatishiwa?”