Twalilileni Ukulanda Icine
1 Abatumwa babilishe ukuti: “Twafilwa ukuleko kulande fyo twamwene no kuumfwa.” (Imil. 4:20) Ilelo tufwile ukutwalilila ukulanda icine. Nangu cingati ukwananya Ulupungu lwa kwa Kalinda na Loleni! ni nshila ya kusangilamo abo bengakutika, tufwile ukubwelelako nga twingasambilisha abalesekelela icine calundwako.
2 Lintu tulebwelela uko twashalike “Loleni!” waibela uwa April mu kuba no mutwe wa uko uwa kuti “Lintu Kushakabe Kabili Inkondo,” kuti mwatambika isambililo lya Baibolo pa kwipusha ukuti:
◼ “Umuku walekelesheko, twalandile pa lwa nkondo mu fyalo no lubali lwa mipepele muli ishi nkondo. Bushe mwalishibe ukuti ifya kucitika fya musango yo fishininkisha mu kulengama ukuti tuleikala mu cintu Baibolo ita inshiku sha kulekelesha? [Langeni icitabo ca Ukwishiba. Belengeni paragrafu wa kubalilapo uwa cipandwa 11, kabili komaileni pa mukululo pe bula 102.] Ici citabo cilondolola uyu mutwe capamo ne mitwe imbi 18 iitantikwe pano mu filimo. [Langilileni ibula 3.] Nga cingacitika, kuti natemwa ukumulangilila fintu ici citabo cingamwaafwa ukumfwikisha iyi milandu yacindama iya mu Baibolo.” Nga nasuminisha, tendekeni isambililo pe bula 6.
3 Nga ca kuti mwalaile ukubwelelako no kulondolola fintu cingacitikako ukuipakisha ubumi bwacingililwa nomba, nakalimo kuti mwasosa icapala ifi:
◼ “Lintu twakumene umuku wa kubalilapo, twabelengele umukululo umo uwa muli Baibolo uyo utulenga ukwenekela inshita ya ku ntanshi iisuma ku bantu. Ilelo kuti natemwa ukumulanga icintu cimo icilangilila uwingatulenga ukuyumfwa abacingililwa pali ino nshita.” Belenga Ilumbo 4:8. Isuleni icitabo ca Ukwishiba pe bula 168 no kubelenga paragrafu 19. Lyene ipusheni ukuti: “Bushe kuti mwaipakisha ukukwata isambililo lya Baibolo ilya pa ŋanda ilya pa fye ilyo lilangilila mu kulengama fintu na imwe mwingasanga uyu musango wa mutelelwe mu bumi bwenu?” Nga ca kuti asumina, alukileni ku cipandwa 1.
4 Pa kulundako impendwa ya bantu ba kutwalila magazini lyonse abo mwashiilile “Loleni!” wa June 8, kuti nakalimo mwaesha iyi nshila:
◼ “Nalimwene mwalefwaisha nga nshi ukubelenga magazini wa Loleni! uyo namushiilile pa lyashi lya kucusha abanakashi pa ncito. Bushe ifyo mwabelengele fyaali ifisuma? [Lekeni asuke.] Bakabelenga ba lyonse aba Loleni! ilingi line batila balatasha fintu akolobonda mu malyashi yacindama aya musango yo mu nshila yalinga. Ndetontonkanya ifyo mukasanga ukuti e fili no yu Loleni! wa nomba line. [Mu kwipifya balangisheni ilyashi lya pa nkupo.] Bushe kuti mwatemwa ukumubelenga?”
5 Kuti mwatambika isambililo lya Baibolo mu kulungatika pa cipempu ca kubwelelamo pa kusoso kuti:
◼ “Tulananya bamagazini besu mwi sonde lyonse ku kweba abantu ukuli konse pa lwa cintu Baibolo isambilisha. Nga ca kuti abantu batemwa cintu balesambilila, tulatambika isambililo lya Baibolo ilya mu ŋanda ilya pa fye. [Losheni ku mukululo wa kuti ‘Bushe Kuti Mwapokelela Ukutandala?’ pa nkupo ya ku numa iya Ulupungu lwa kwa Kalinda.] Tubomfya ici citabo, Ukwishiba Uko Kutungulula ku Mweo wa Muyayaya, pamo nga ica kutungulula. Kamulangilile mu kwipifya fintu isambililo litungululwa.”
6 Nga ca kuti twatwalilila ukulanda icine, kuti twaba abashininkisha ukuti kukabako bamo abakomfwa no kwankulako bwino.—Marko 4:20.