Ukushimikila Imbila Nsuma ne Mibele ya Mutima Iyashininkishiwa
1 Ifwe bonse twalitemwa ukukwata ubuseko no kupwishishisha mu fintu tulecita, ukucilisha mu mulimo wa kupanga abasambi. Cinshi cituletela ukwikushiwa kwa musango yo? Citendekela mu kusungilila imibele ya muntontonkanya iyashininkishiwa ilintu tuli abapamfiwa mu mulimo usuma uwa kwaafwa bambi. (Amapi. 11:25) Inshila tushimikilamo imbila nsuma ilingile ukulanga ukuti mu cine cine twalisumina mu cintu tulesosa. Nga ca kuti twalanda ukufuma ku mutima wesu, lyene ukufumaluka kwesu no kushininwa kwa pa lwesu fikamonekesha. (Luka 6:45) Pa kupituluka mu nshila yesu iya kulandilamo imbila nsuma, tukayumfwa abaicetekela lintu tulelanda ku bantu mu cifulo cesu ica kubombelamo. Ici cili no kuba icakatama nga nshi ukucilisha muno September lintu tuletambika icitabo ca Kuti Waikala Kuli Pe na pe muli Paradise Pe Sonde ne ca Ukulenga Ubumi bwa Lupwa Lobe ubwa Nsansa. Kuti mwasanga imitubululo yakonkapo ukuba iya kwaafwa mu kushimikila imbila nsuma ne mibele ya mutima iyashininkishiwa.
2 Abengi baliba abasakamikwa pa lwa bwafya bwa misoka ubuleingilishiwako. Kuti mwabomfya imitendekele ya kubalilapo pe samba lya kamutwe kanono akatila “Imisoka/Ukucingililwa” pe bula 10 mu citabo ca “Ukupelulula”:
◼ “Tulelanda ku bantu pa lwa mulandu wa kucingililwa kwa pa lwesu. Kuliko imisoka uko twikala konse, kabili ileambukila ubumi bwesu. Cinshi muletontonkanya cingacitwa pa kuti abantu pamo nga imwe na ine tuyumfwe abacingililwa mu misebo ubushiku?” Nakalimo kuti mwabelenga Ilumbo 37:10, 11 no kulondolola amapaalo ayo Ubufumu bwa kwa Lesa bukaleta, ukubomfya amabula 156-8 mu citabo ca Ikala Kuli Pe na pe.
3 Nga ca kuti mwalanshenye imibele ya calo iilebotelela ilyo mwatandele mu kubalilapo, kuti mwabwelelako pa kusosa ukuti:
◼ “Ninjishiba mwalasuminisha ukuti ukwaluka kukalamba kulekabilwa nga ca kuti tuli no kwikala mu mutende. Baibolo ilanga ukuti Satana e mukalamba uwalenga amafya yesu. Abengi balapapa umulandu Lesa amusuminishisha ukutwalilila pa nshita yalepa ifi. Muletontonkanyapo shani?” [Lekeni asuke.] Alukileni kwi bula 20, amaparagrafu 14 na 15, mu citabo ca Ikala Kuli Pe na pe, kabili londololeni umulandu Satana ashilaonawilwa ukufika na ino nshita. Lyene belengeni Abena Roma 16:20, iilanga cintu twingenekela ku nshita ya ku ntanshi iipaleme.
4 Lintu muletambika icitabo ca “Ubumi bwa Lupwa,” pa kutandala kwa kubalilapo kuti mwatila:
◼ “Ndetandala ku kulanda na imwe ifyebo pa lwa bwafya bulebimbamo ubumi bwa lupwa. Ifwe bonse tufwaya indupwa shesu ukuba isha nsansa, lelo natwishiba ukuti ilelo indupwa ishingi tashaba isha nsansa. Cinshi muletontonkanya cingaafwa abantu ukusanga insansa ishingi mu bumi bwabo ubwa lupwa? [Lekeni asuke.] Bushe tamulesuminisha ifyo kuti caba ica kunonsha ukukutika ku cintu Katendeka wa lupwa asosa? Alondolola ifya kutungulula fikabilwa muli Baibolo. Ifi fishinte fyalilondololwa muli ici citabo ca Ukulenga Ubumi bwa Lupwa Lobe ubwa Nsansa. Moneni imbali sha lyashi ishalondololwa. [Langeni umutande wa filimo.] Icitabo na kabili cisonta ku kupikulula mu kubelelela amafya ya mutundu wa muntu. Ukwabula ukutwishika mulapepela ico. Mwalibeleshanya ne Pepo lya kwa Shikulu, bushe te ifyo? [Ambuleni Mateo 6:9, 10.] Lesa afwaya ukuti Ubufumu bwakwe bufumyepo ububifi bonse pali ili sonde kabili ico cikanonsha ubumi bwa lupwa ubwa bantu bonse abo nomba batetekela mu Bufumu bwa kwa Lesa.” Tambikeni icitabo pa musangulo wa ciko.
5 Lintu mulebwelela kuli abo mwashileko icitabo ca “Ubumi bwa Lupwa,” nakalimo kuti mwatemwa ukulanda ici:
◼ “Ku numa twalandile pa mano yaba mu kukonka ifishinte fya Baibolo pa kuti twingakwata ubumi bwa lupwa ubwa nsansa. Cinshi muletontonkanya caba e makii ku kwikatanya indupwa ilelo?” [Lekeni asuke.] Losheni kuli paragrafu 31 pe bula 80, kabili belengeni Abena Kolose 3:9, 10, 12-14. Landenipo mu kulundapo ukulangilila fintu ukutemwa kwa cine cine kwingekatanya indupwa capamo. Langeni fintu isambililo lyatantikwa bwino ilya mu citabo ca Ubumi bwa Lupwa lingaafwa ukupikulula amafya.
6 Nga ca kuti mwasoobolapo ukubomfya inshila yayanguka, napamo kuti mwabomfya imitendekele iyapalana ne yaba pa muulu we bula 12 mu citabo ca “Ukupelulula”:
◼ “Tulekoselesha abena mupalamano besu ukutontonkanya pa lwa nshita ya ku ntanshi iyawamisha iyo Baibolo itutambika. [Belengeni Ukusokolola 21:3, 4.] Bushe ici cileumfwika icisuma kuli imwe? [Lekeni asuke.] Icipandwa 19 ica ulu lupapulo cebekesha amapaalo yambi ayo umutundu wa muntu uwa cumfwila ukaipakisha pe samba lya Bufumu bwa kwa Lesa.” Nga asekelela, tambikeni icitabo ca Ikala Kuli Pe na pe.
7 Nga ca kuti mwalandile pa lwa mapaalo ayo yakafikilishiwa pe samba lya kuteka kwa Bufumu, pa cipempu ca kubwelelamo, kuti mwatila:
◼ “Ubufumu bwa kwa Lesa bukaleta amapaalo yawamisha pe sonde na ku mutundu wa muntu. Aya mapaalo yalilangishiwa bwino pano pa mabula 12 na 13. Cinshi mulemonapo icamucebusha? [Lekeni asuke.] Tontonkanyeni fintu cikapala ukwikala mu calo capala ici.” Belengeni paragrafu 12. Nga ca kuti alesekelela, ipusheni icipusho mu paragrafu 13, no kulondolola icasuko. Londololeni ukuti ici cipandwa cilasuka ifipusho ifingi pa lwa mapaalo ya Bufumu no kuti muli abasekelela ukulanshanya yene nankwe ilyo mukatandala mu kukonkapo.
8 Pamo nga “babomfi ba kwa Lesa abalebombela pamo,” twalikwata umulandu uuli onse uwa kubela abashininkisha lintu tuleshimikila imbila nsuma. (1 Kor. 3:9) Lintu twatwalilila ukuba ne yi mibele ya mutima cikafumamo ipaalo lyafumba ilya kwa Yehova.