Icebo ca kwa Lesa Cilapayanya Ubutungulushi
1 “Tuleikala mu calo cakwata [amafya yafulisha] kabili ifyasuko ifyacepesha nga nshi. Amamilioni ayengi ilingi line baba aba nsala. Impendwa shaingilishiwako balikunkuma ku miti ikola. Indupwa shafulilako shilepaatukana. Ukucenda kwa mu lupwa no lukaakala lwa mu lupwa fiba mu malyashi mu kutwalilila. Umwela tupeema na menshi tunwa panono panono [filakoweshiwa]. Pali nomba, abafulilako aba ifwe balengwe finakabupalu fya misoka.”
2 Ayo e mashiwi ya kutendekelako aya citabo ca Baibolo—Cebo ca kwa Lesa Nelyo ca Muntu? Imitendekele ya ciko yaliba iyalinga nga nshi ilelo ukucila na lintu icitabo casabankanishiwe imyaka 7 iyapitapo. Abantu balekabila ukwishiba ukuti Icebo ca kwa Lesa cilatungulula no kulangilila ifya kupikulula amafya yonse ayabacusha. Tukabombesha ukwaafwa abantu mu December ukupitila mu kubatambika New World Translation ne citabo ca Baibolo—Cebo ca kwa Lesa Nelyo ca Muntu? Kwena, ukusha fye impapulo ku muntu tacipilibula ukuti calala capwa akapokelela ubutungulushi bwa kwa Lesa. Tufwile ukuya ku fipempu fya kubwelelamo mu kuba no buyo bwa kutendeka isambililo lya Baibolo. Ukwabula ukutwishika tukabaafwa nga ca kuti twabombesha apakalamba. (Mat. 28:19, 20) Pano palipo inshila sha kulandilamo ishitubulwilwe:
3 Nga ca kuti mwakumanya umukoloci, nakalimo kuti mwaesha iyi nshila:
◼ “Bushe kuti naipushako: Lintu mwali abaice, ni shani fintu abantu mu bwikashi baleikala? [Lekeni asuke.] Imibele naipusanako nomba, bushe te ifyo? Cinshi muletontonkanya cilengele uku kwaluka? [Lekeni asuke.] Mu cine cine tulemona ukufikilishiwa kwa busesemo bwa mu Baibolo. [Belengeni 2 Timote 3:1-5.] Ukulunda pa kulungika ukulondolola icalo nga fintu cili ilelo, Baibolo ilaya icalo cawaminako ku nshita ya ku ntanshi iipaleme. Pali uyo mulandu tulekoselesha uuli onse ukubelenga Baibolo. Ululimi lwabomfiwa muli New World Translation lwaliba ulwaumfwika nga nshi.” Londololeni ukuti yalembwa mu ciNgeleshi ca muno nshiku, ukulenga Baibolo ukuba iingomfwika. Langeni icitabo Baibolo—Cebo ca kwa Lesa Nelyo ca Muntu?, kabili mulangisheni icipandwa 10, ico cilondolola ubusesemo na bumbi ubo twamona ukuti bwalifikilishiwa. Tambikeni Baibolo ne citabo.
4 Lintu mwabwelela ku mukoloci uyo mwashalikeko Baibolo ne citabo, kuti mwatila:
◼ “Lintu twalanshenye umuku wafumako, twalisumine ukuti mu nshila ishingi ubwikashi bwa muno nshiku bwalyaluka ukuba ubwabipilako nga kulinganya na fintu ubumi bwali imyaka fye inono iyapitapo. Nangu cibe fyo, nacibwela ku kumulanga ukuti Baibolo ilondolola ifilolelo fya calo cawaminako nga nshi ku nshita ya ku ntanshi. [Belengeni Ukusokolola 21:3, 4.] Ukwishiba ukuti ici Cebo ca kwa Lesa kulingile ukutukoselesha ukubebeta na fimbi ifyo Baibolo isosa.” Isuleni icitabo ca Cebo ca kwa Lesa pa cipandwa 14, kabili belengeni amaparagrafu 3-4. Ipusheni nga kuti asumina isambililo lya Baibolo ilya mu ŋanda apabula amalipilo.
5 Nga ca kuti mulelanshanya no wacaice, kuti mwatila:
◼ “Kuti natemwa ukukwipushako icipusho: Apo uli uwacaice, bushe uletontonkanya ukuti walikwata umulandu wa kwenekela ifintu ifisuma ku nshita ya ku ntanshi? Umona shani inshita ya ku ntanshi? [Lekeni asuke.] Ku ce shuko, kwalibako umulandu wa kwenekela ifintu ifisuma ku nshita ya ku ntanshi. [Belengeni Ilumbo 37:10, 11.] Apantu abantu bamona Baibolo ne fyabamo mu nshila shalekanalekana, twalisabankanya ici citabo, Baibolo—Cebo ca kwa Lesa Nelyo ca Muntu? Umfwa umulandu ici citabo cipeela uwa kubelengela Baibolo. [Belengeni amaparagrafu 16-17 pa mabula 10-11.] Lintu fye twashininwa ukuti cintu Baibolo isosa ca cine, tulaba ne subilo lyashininkishiwa ilya nshita ya ku ntanshi.” Tambikeni icitabo pa musangulo wa lyonse.
6 Lintu mwabwelela ku kumona uwacaice uwapokelele icitabo ca “Cebo ca kwa Lesa”, nakalimo kuti mwatendekela pa kulondolola ukuti:
◼ “Nalitememwe ukumfwa fintu wayangwako pa lwa nshita ya ku ntanshi. Ibukisha ukuti nakulangile ilembo lya mu Baibolo ilitulaya inshita ya ku ntanshi iya nsansa kabili iyacingililwa. Ilembo na limbi ni ili. [Belengeni Ukusokolola 21:3, 4.] Icitabo cintu nakushilile cilalondolola ubushinino bwa kuti Baibolo yaba Cebo ca kwa Lesa, te ca muntu. Ico cishinka cisanshamo ifingi. Mona fintu fyaba. [Belengeni amaparagrafu 1-2 pa mabula 184-5.] Nga wingatemwa, kuti natemwa ukusambilila Baibolo na iwe apabula amalipilo.” Nga ca kuti asumina ukusambilila, mwipusheni nga alikwata Baibolo wakwe. Nga ca kuti takwata, tambikeni New World Translation.
7 Umuntu ushaishiba ukwa kuya ku kufwaya ubutungulushi pa fya kubomba bwino na mafya ya bumi nakalimo kuti ayankulako muli iyi nshila:
◼ “Tuleikala mu nshita lintu uuli onse alolenkene na mafya ayabipisha. Abengi balukila kuli bakafunda bapusanapusana ku kufwaya ubutungulushi. Bamo baya ku ba ngulu pa kuti babafwe. Ni kwi muletontonkanya twingasanga ukufunda kwawamisha uko mu cituntulu ukwingatwaafwa? [Lekeni asuke.] Baibolo ilondolola icishinka cimo icacindama ico ifwe bonse tulekabila ukutesekesha.” Belengeni Yeremia 10:23. Isuleni icitabo ca Baibolo—Cebo ca kwa Lesa Nelyo ca Muntu? pe bula 187, no kubelenga paragrafu 9. “Ici citabo cikamwaafwa ukumfwikisha fintu amafya yesu yonse yakafumishiwapo mu kuteka kwa Bufumu bwa kwa Lesa. Bushe kuti mwatemwa ukucibelenga?” Tambikeni icitabo.
8 Nga ca kuti pa kutandala kwa kubalilapo mwalandile pa kukabila kwa muntu ukwa butungulushi, kuti mwatwalilila ukulanshanya pa cipempu ca kubwelelamo, ukusosa ukuti:
◼ “Lintu twakumene mu kubalilapo, twalisumine ukuti tulakabila ubutungulushi ukufuma kuli Lesa nga twingabomba bwino na mafya ya bumi. Ukukuma kuli ico, ndemona mwalatesekesha amashiwi ya kusondwelela ayalembwa mu citabo cintu namushilile. [Belengeni amaparagrafu 12-13 pe bula 189 mu citabo ca Cebo ca kwa Lesa.] Ndemwipusha nga kuti mwatemwa kosi we sambililo lya Baibolo ilya mu ŋanda apabula amalipilo, kabili kuti namulangilila pano pene ifyo tucita.”
9 Yehova akapaala ukubombesha kwesu ilyo tuleafwa abakalamba na baice capamo ukutesekesha ubucindami bwa Cebo ca kwa Lesa no butungulushi bwa ciko mu bumi bwesu.—Ilu. 119:105.