Ukutungulula Amasambililo ya Baibolo aya mu Ng’anda Ayalunduluka
1 Cintu nshi icapalana ico nasi mu Tanzania, uwacaice mu Argentina, na nyina mu Latvia bakwete? Bonse batatu balilundulwike mu kwangufyanya mu masambililo yabo aya Baibolo aya mu ŋanda, pantu baliitemenwe ukulasambilila mu citabo ca Ukwishiba ukucila umuku umo mu mulungu, e fyashimika 1997 Yearbook (amabu. 8, 46, na 56). Catubululwa ukuti bakasabankanya balingile ukutukusha ukusambilila icipandwa cimo ica mu citabo mwi sambililo limo limo, lyonse lintu cingacitika. Nangu cibe fyo, bamo basanga ukuti calyafya ukucita ifyo. Nangu cingati ifingi fikashintilila pa mibele ya musambi umo umo na maka yakwe, bakasambilisha babelesha balitunguluka pa kubomfya imitubululo yakonkapo.
2 Nga fintu ica mu kati ca mu Ubutumikishi Bwesu Ubwa Bufumu ubwa June 1996 calandilepo, cilakabilwa ukukansha umusambi wenu ukupekanishisha isambililo. Pa kutendeka fye pene, kuti cawama ukumulondolwela no kumulangilila fintu tusambilila. Balangeni icitabo cenu ica Ukwishiba. Pekanishisheni capamo isambililo lya kubalilapo. Afweni umusambi ukusanga amashiwi yakatama ayo yaleasuka mu kulungatika icipusho cilembelwe, e lyo mushilepo. Bakasabankanya bamo balipeela fye na basambi babo ica kushililako pa kuti bengalabomfya. Bakoselesheni ukufwaya amalembo yonse ilyo balepekanishisha isambililo. Ilyo mulecita ifyo, na kabili mukalabakansha ukupekanishisha ukusangwa kwi Sambililo lya Citabo pa Cilonganino ne Sambililo lya Ulupungu lwa kwa Kalinda.—Luka 6:40.
3 Kasambilisha musuma akoselesha umusambi ukulaasuka kabili talanda ifingi. Asengauka ukupumbukila ku fishinka finono. Te lingi asanshamo ifyebo fyalundwako. Mu cifulo ca ico, akomaila pa fishinka fikalamba ifili mwi sambililo. Bamo balipayanishisha abasambi ifitabo fyalundwako pa kubaafwa ukusanga ifyasuko ku fipusho fileipushiwa. Mu kulundapo, abalesekelela bakakutika ku fyebo fyapaka ifyalundwako ilyo balesangwa ku kulongana kwa pa cilonganino.
4 Nalimo te kuti mukabile ukubelenga amalembo yaloshiweko yonse mwi sambililo. Ifishinka fikalamba fimo nalimo kuti fyalondololwa mu malembo yambwilwe mu paragrafu. Ilyo mulepitulukamo, komaileni pa malembo yakatama ayo mwacilanshanyapo kabili koselesheni umusambi ukuyebukisha.
5 Isambililo Limo Limo Lifwile Ukulepa Shani?: Isambililo talilekabila ukupeleela fye pe awala limo. Abene mayanda bamo balikwata inshita kabili nakalimo kuti bafwaya ukutantalisha ukusambilila. Nelyo umusambi nalimo kuti afwaya ukulasambilila ukucila umuku umo mu mulungu. Ici kuti canonsha abo bengaba na maka ya kucita ifyo.
6 Nga fintu Esaya 60:8 alangilila, ilelo imyanda ya makana ya bakalumbanya ba kwa Yehova abapya ‘bapupuka nge kumbi, nge nkunda ku miinshi ya shiko’ mu filonganino fya bantu bakwe. Shi ifwe bonse natubombe iciputulwa cesu mu kubombela pamo na Yehova ilyo alekalakasha umulimo wa kulonganika abapala impaanga.—Esa. 60:22.