Bucishinka Bulalambulwa
1 Pa AbaHebere 11:6 twaebwa ukuti Lesa “aba kalambula wa bamufwayafwaya.” Inshila imo intu alambwilamo ababomfi bakwe abaipeela, ‘aba cishinka pa tunono’ yaba ‘kubalaasa pa fingi.’ (Mat. 25:23) Mu mashiwi yambi, Yehova ilingi line alambula umulimo usuma ukupitila mu kupeela inte shakwe isha cishinka imilimo yalundwako.
2 Bucishinka bwa mutumwa Paulo bwalilambwilwe ukupitila mu kumupaatwila ku butumikishi ubo bwamulengele ukuya mu misumba ne mishi ya ku Bulaya na Asia Minor. (1 Tim. 1:12) Nangu cingati alibombeshe apakalamba pa kufishapo ubutumikishi bwakwe, Paulo akatamike apakalamba ishuko ilyo apokelele. (Rom. 11:13; Kol. 1:25) Alangilile ukuti alitashishe ukufuma ku mutima ukupitila mu kucincila mu kufwayafwaya apali ponse apo engashimikila. Ku kubombesha kwakwe ukwapimpa, alangishe mu nshila yamonekesha ukuti ali ne citetekelo icaba ne milimo. Ica kumwenako cakwe cilatucincisha ukukatamika ishuko lyesu ilya kubomba uyu mulimo.
3 Yehova Alitupeela Ubutumikishi: Ni shani fintu twingalangisha ukuti twalikatamika uyu mulimo nga fintu Paulo alangilile? Tulafwailisha inshila sha kwingilishishamo ubutumikishi. Tulashukila inshita iili yonse ukushimikila mu lyashi fye na ku mwinshi no mwinshi. Tulabwelelako ku bashiba pa mayanda na kuli bonse abasekelela. Kabili tulabaka ifipangano tupanga ifya kutungulula amasambililo ya Baibolo aya mu ng’anda.
4 Ukukuma ku butumikishi bwesu, Paulo akonkomeshe ukuti: ‘Cincileni.’ (2 Tim. 4:2) Icintu ca kucincilila cifwaikwa ukucibombelapo ilyo line fye. Bushe tubomba ubutumikishi bwesu mu kucincila, ukubutangisha pa ntanshi ya cili conse cimbi? Ku ca kumwenako, tatwingafwaya ukuti inshita shesu isha kukokoloka ne fintu fya pa lwesu fimbi pa mpela ya mulungu fipumfyanye inshita iyo tufwile ukubomfya ku butumikishi bwa mwi bala. Apo twalishininwa ukuti impela ya ino micitile ilepalamina lubilo lubilo, twalishinininwa na kabili ukuti ukushimikila imbila nsuma iya Bufumu waba e mulimo wacindamisha uyo twingabomba.
5 Bucishinka bwesu kuli Lesa bwishibikilwa ku kuba abafumacumi kuli wene no kutwalilila ukubomba umulimo untu atupeela. Shi natufishepo ubutumikishi bwesu, pa kuti Yehova akalambule bucishinka bwesu apakalamba.