Ukwesha Ukubombako Umulimo Apapela Amaka Yesu

¹ Umutumwa Paulo akonkomeshe Abena Kristu ukulaenda ukulingana ne fyo Lesa afwaya no ‘kulacite ifyo mu kufikapo.’ (1 Tes. 4:1) Bushe ifi ifyebo Paulo alandile fyalola mwi? Cimo ico twingacita pa kuti tufikepo ukubomba umulimo, kutwalilila ukulafwaya imilimo na imbi iya ku mupashi, no kulaesha na maka yesu yonse ‘ukufishapo bukapyunga bwesu.’—2 Tim. 4:5.

² lcilenga Tulebombesha: Icilenga ukuti tulebombesha mu mulimo wa kushimikila, kufwaya ukuti tufikepo ukubombela Kabumba wesu. Tufwaya ukuti tulunduluke no kufwaya inshila twingabombelamo bwino umulimo wa kushimikila. Ukupekanya bwino ifintu no kwishiba umulandu wine wine uo tubombela umulimo, cikatwafwa ukufikilisha ifyo twapanga ukubomba mu mulimo wa kwa Lesa.—Amalu. 1:1, 2; Fil. 4:6; Heb. 10:24, 25.

³ Nga tulefwaya ukusandulula umulimo wesu uwa kubila imbila ya Bufumu tufwile ukuba no mutima wa kupeela, kabili uwa kuipeelesha. Pa kuti tukwate umutima wa musango uyu tufwile ukutontonkanya sana pa fyo Yesu abombele bwino. (Mat. 20:28) Ilyo Yesu alebomba umulimo wa kushimikila aleumfwa bwino sana ukubombela abantu. (Imil. 20:35) Na ifwe kuti twapashanya Yesu nga tuletemwa abantu no kuba abaiteyanya ukubombako umulimo fye onse uwingamoneka.—Esa. 6:8.

⁴ Umulimo uo Bafyashi Babomba: Abana kuti bafundwa ukubombela abantu bambi no kubombesha mu mulimo wa kushimikila ilyo baali fye abaice. Abana balamona sana ifyo bambi mu lupwa babombesha e lyo ne fyo baacincila mu kusandulula umulimo wa kushimikila. Munyinefwe umo ilyo aali umwaice alikoseleshiwe ukulafwaya sana ukubombako imilimo pa mulandu wa kubomba na bashikulu bakwe imilimo ya mu cilonganino. Ilyo alemona ukubombesha kwa bashikulu bakwe ne fyo bali aba nsansa pa kubomba calengele ukuti na o alefwaisha ukubombela bamunyina. Pali ino nshita mubomfi utumikila.

⁵ Bamunyina Balefwaikwa: “Umuntu nga aletinamina . . . , ninshi mulimo usuma alefwaya.” (1 Tim. 3:1) Aya mashiwi yakoselesha bamunyinefwe ukulafwaya ukubombako imilimo na imbi mu kuteyanya kwa kwa Yehova. Abengabombako imilimo mu cilonganino te bantu fye abacenjela mu kubomba imilimo yaibela. Ico munyinefwe uulefwaya ukubombako imilimo mu kuteyanya afwile ukulacita, kulafwaya Ubufumu bwa kwa Lesa intanshi no kuba uwacincila mu mulimo wa kubila imbila ya Bufumu. (Mat. 6:33; 2 Tim. 4:5) Afwile ukuba ne mibele isuma iyo bambi bengasambililako.

⁶ Icalo Conse: Yehova alelenga umulimo wa kulonganika abantu ukwangufyanya. (Esa. 60:22) Kanshi bonse abapashanya Yesu bafwile ukubikako sana amano ku mulimo wa kubila imbila ya Bufumu pa kuti bafishepo bukapyunga bwabo. Lipoti ya calo conse iya mu 2006 ilelangilila ukuti ababatishiwe umwaka onse baali 248,327. Kanshi nga kubatishiwa cila bushiku kuti twatila abalebatishiwa kuti bacila pali 680! Shi ifwe bonse natutwalilile ukulafwaya ifyo twingacita pa kuti tulefikapo ukubomba mu mulimo wesu.